విద్యార్థులకు ఇస్రో ఆఫర్.. భవిష్యత్ మిషన్ల కోసం కొత్త ఆలోచనలతో రావాలని పిలుపు

అంతరిక్ష రంగంలో ఎవరికీ సాధ్యం కాని విధంగా చంద్రుడి దక్షిణ ధ్రువంపై కాలు మోపి.. సరికొత్త చరిత్ర సృష్టించిన భారత అంతరిక్ష పరిశోధన సంస్థ-ఇస్రో.. మరిన్ని కొత్త ప్రయోగాలకు సిద్ధమైంది. ఇప్పటికే సూర్యుడిపైకి ఆదిత్య ఎల్ 1 ప్రయోగాన్ని విజయవంతంగా ప్రయోగించిన ఇస్రో శాస్త్రవేత్తలు.. వచ్చే ఏడాది గగన్‌యాన్ ప్రయోగానికి సిద్ధమైంది. ఆ తర్వాత శుక్రుడు, అంగారకుడిపైకి కూడా ప్రయోగాలు పంపించేందుకు ఇస్రో భవిష్యత్ ప్రణాళికలు చేస్తోంది. ఈ నేపథ్యంలోనే ఇస్రో ప్రయోగాలకు సంబంధించి భాగస్వామ్యులు అయ్యేందుకు స్టూడెంట్స్‌కు పిలుపునిచ్చింది.

స్పేస్ ఛాలెంజ్‌తో ఇస్రో చేపట్టబోయే భవిష్యత్ మిషన్ల కోసం రోబోటిక్ రోవర్లను ఉపయోగించాలని శాస్త్రవేత్తలు భావిస్తున్నారు. ఈ నేపథ్యంలోనే ఆ రోబోటిక్ రోవర్ల తయారీకి సంబంధించి వినూత్న ఆలోచనలు, డిజైన్ల రూపకల్పన కోసం యువతను ఇస్రో ఆహ్వానిస్తోంది. భవిష్యత్తులో ఇస్రో చంద్రుడు, ఇతర గ్రహాలపై చేసే ప్రయోగాలకు సంబంధించి రోబోటిక్ అన్వేషణ మిషన్లకు సన్నద్ధమవుతున్నట్లు తెలిపింది.

వినూత్న ఆలోచనలు, రోబోటిక్ రోవర్ల రూపకల్పనలను భవిష్యత్ మిషన్‌ల కోసం దేశంలోని యువత నుంచి అంతరిక్ష రోబోటిక్స్ ఛాలెంజ్‌తో బెంగళూరులోని యూఆర్ రావు శాటిలైట్ సెంటర్ ఆహ్వానాలు కోరుతోంది. ఇస్రో ప్రయోగాలకు సంబంధించిన అభివృద్ధి అవకాశాలను అందిస్తోందని తెలిపింది. స్పేస్ రోబోటిక్స్ అండ్ ఇస్రో ఇంటర్‌ప్లానెటరీ మిషన్‌ల కోసం మన దేశంలోని యువతలో సృజనాత్మక ఆలోచనను పెంపొందించడానికి, స్పేస్ రోబోటిక్స్‌లో విద్యార్థులకు అవకాశాన్ని అందించడానికి అని ఇస్రో తెలిపింది. ''లెట్స్ బిల్డ్ ఎ స్పేస్ రోబో'' అనే ట్యాగ్‌లైన్‌తో ఇస్రో రోబోటిక్స్ ఛాలెంజ్-యూఆర్ఎస్‌సీ 2024 ఈ ఆహ్వానాలు అందించింది.

ఈ ఛాలెంజ్‌లో ఇంజినీరింగ్ ప్రాజెక్ట్ ఉంటుందని.. అక్కడ కొన్ని సంస్థాగత బృందాలు అంతరిక్ష రోబోటిక్స్ ఎదుర్కొనే సవాళ్ల ఆధారంగా విధులను నిర్వర్తిస్తుందని పేర్కొంది. ఈ రంగంలో పోటీ చేయడానికి రోబోలను తయారు చేస్తాయని పేర్కొన్నారు. పూర్తి హార్డ్‌వేర్ అండ్ సాఫ్ట్‌వేర్ అభివృద్ధితో కూడిన 'వీల్డ్/లెగ్డ్ రోవర్' రూపకల్పన, సాకారం కోసం విద్యార్థులను ఆహ్వానిస్తున్నట్లు తెలిపింది. ఈ రోబోటిక్స్ ఛాలెంజ్‌లో విద్యార్థులు అందించిన పరిష్కారాలను భవిష్యత్ ఇంటర్‌ప్లానెటరీ రోబోటిక్స్ మిషన్‌లలో చేర్చడానికి ఎక్కువ అవకాశం ఉందని ఇస్రో ఒక ప్రకటనలో తెలిపింది. ఈ ఆన్‌సైట్ పోటీని బెంగళూరులోని యూఆర్ రావు శాటిలైట్ సెంటర్ క్యాంపస్‌లో ఆగస్టు 2024 లో నిర్వహించాలని ఇస్రో ప్లాన్ చేస్తోంది. ఈ పోటీలో స్పేస్ రోబోటిక్స్, దాని అప్లికేషన్ల గురించి లోతైన అవగాహనను పెంపొందించడం, అంతరిక్ష రోబోటిక్స్ రంగంలో అవసరమైన భవిష్యత్ సాంకేతికతలను అభివృద్ధి చేయడం కోసం ఆసక్తి ఉన్న విద్యార్థులను ఆహ్వానిస్తోంది.