ఆస్పత్రి క్యాంటీన్‌ ఆహారంలో ఎలుక.. షాక్ అయిన రోగులు

ఆస్పత్రి అంటేనే నిత్యం డాక్టర్లు, సిబ్బంది, రోగులు, వారి బంధువులు, రోగులను పరామర్శించేందుకు వచ్చే వారితో కిటకిటలాడుతూ ఉంటుంది. ఇక ప్రభుత్వ ఆస్పత్రి అంటే పేద వారి నుంచి సామాన్యుల వరకు అంతా రద్దీగా ఉంటుంది. ఆ ఆస్పత్రికి వచ్చిన వారు తినేందుకు అక్కడే క్యాంటీన్‌లు, హోటల్‌లు ఏర్పాటు చేస్తూ ఉంటారు. అయితే తాజాగా ప్రభుత్వ ఆస్పత్రి క్యాంటీన్‌లో కనిపించిన సన్నివేశం.. అందర్నీ షాక్‌కు గురి చేసింది. అక్కడ ఉన్న ఆహార పదార్థాలపై ఎలుక సంచరిస్తూ వాటిని తింటున్న దృశ్యాలు ఒళ్లు జలదరించేలా కనిపించాయి. ఈ ఘటన తమిళనాడులో చోటు చేసుకుంది.

చెన్నైలోని రాయపురం సమీపంలోని ప్రభుత్వ స్టాన్లీ మెడికల్ కాలేజ్ అండ్ హాస్పిటల్ క్యాంటీన్‌లో ఈ భయంకరమైన సంఘటన జరిగింది. దీనికి సంబంధించిన ఓ వీడియో వైరల్ కావడంతో ఫుడ్ సేఫ్టీ అధికారులు నవంబర్ 12 వ తేదీన ఆ ఆస్పత్రి క్యాంటీన్‌ను మూసి వేశారు. ఆ క్యాంటీన్‌లోని సమోసాలు, బోండాలు ఉన్న ట్రేలో ఎలుక తిరుగుతూ వాటిని తింటున్న వీడియోను అది చూసిన ఓ రోగి బంధువు తీసి సోషల్ మీడియాలో ఉంచడంతో వైరల్‌గా మారింది. ఆ ఆస్పత్రి క్యాంటీన్‌కు ప్రతిరోజు తమిళనాడు వ్యాప్తంగా వేలాది మంది రోగులు సందర్శిస్తారు. ఈ క్రమంలోనే ఆ వీడియో వైరల్‌గా మారడం అందర్నీ తీవ్ర ఆందోళనకు గురి చేస్తోంది.

అయితే తినుబండారాలపై ఎలుక సంచరించడాన్ని వీడియో తీసిన ఒక రోగి బంధువు.. దానిపై క్యాంటీన్ సిబ్బందిని ప్రశ్నించాడు. వెంటనే ఆ ఎలుకను తరిమివేసిన సిబ్బంది.. ఆ సమోసాలు, బోండాలను బయట పడేశారు. ఈ వీడియో సోషల్ మీడియాలో తెగ వైరల్ కావడంతో వెంటనే ప్రైవేట్ కాంట్రాక్టర్ నిర్వహిస్తున్న క్యాంటీన్‌ను మూసివేసినట్లు ఆస్పత్రి డీన్ తెలిపారు. ఆ నిర్వాహకులకు నోటీసులు కూడా జారీ చేసినట్లు వెల్లడించారు. ప్రభుత్వ నిబంధనలకు కట్టుబడి అన్ని రకాల చర్యలు తీసుకుంటామని హామీ ఇచ్చిన తర్వాతే అనుమతి ఇస్తాని ఉన్నతాధికారులు పేర్కొన్నారు. ఈ ఘటనతో చెన్నై నగరంలోని అన్ని ఆస్పత్రుల్లో పనిచేస్తున్న అన్ని రెస్టారెంట్లు, క్యాంటీన్‌లకు హెచ్చరికలు జారీ చేసినట్లు ఫుడ్ సేఫ్టీ అధికారులు వెల్లడించారు. ఆహార భద్రతా నిబంధనలను ఉల్లంఘించిన వారిపై కఠిన చర్యలు తీసుకుంటామని హెచ్చరించారు.