కర్ణాటక ఆర్టీసీ బస్సులో 40 సవర్ల బంగారం మాయం.. మార్గ మధ్యలో బంగారం దొంగతనం
Andhra Pradesh Telugu | Suryaa Desk | Published : Wed, Nov 15, 2023, 07:24 PM
చిత్తూరు జిల్లాలో ఓ బంగారం చోరీ కేసు తలనొప్పిగా మారింది. శ్రీరంగరాజపురానికి చెందిన అక్కాచెల్లెళ్లు రమ, అనసూయ 40 సవర్ల బంగారు నగలతో బెంగళూరు వెళ్లేందుకు కర్ణాటక ఆర్టీసీ బస్సు ఎక్కగా.. కొంత సేపటికే గుర్తు తెలియని వ్యక్తులు బ్యాగులో ఉన్న బంగారు నగలు చోరీ చేశారు. చిత్తూరులో ఈ విషయాన్ని బాధితులు గుర్తించారు.. బస్సులో తనిఖీ చేసినా లాభం లేకుండా పోయింది. ఆ వెంటనే హడావుడిగా బస్సు దిగి వన్ టౌన్ పోలీసులను ఆశ్రయించారు. నగర శివారులోని చెక్పోస్టు దగ్గర చోరీ విషయాన్ని గుర్తించినట్లు బాధితులు తెలపడంతో ఘటన గంగాధర నెల్లూరు పోలీస్ స్టేషన్ పరిధిలో జరిగి ఉంటుందని అక్కడి వెళ్లాలని చెప్పారు.
దీంతో బాధితులు అక్కడికి వెళ్లి పోలీసులకు ఫిర్యాదు చేయగా.. బస్సు ఎక్కిన చోటే (శ్రీరంగరాజపురం)లో చోరీ జరిగి ఉంటుందని అక్కడికి వెళ్లాలని చెప్పారు. . ఆ తర్వాత శ్రీరంగరాజపురం పోలీసులు కేసు నమోదు చేసి దర్యాప్తు చేస్తున్నారు. బంగారం పోగొట్టుకున్న మహిళలు ప్రయాణించిన బస్సులో నలుగురు వ్యక్తులు పలమనేరులో ఎక్కి బంగారుపాళ్యంలో దిగిపోయారని చెబుతున్నారు. వీరి పక్క సీటులో ఖాళీ ఉండటంతో ఓ వ్యక్తి వీరి పక్కసీటులో కూర్చొన్నారు. తాము బ్యాగు కాళ్ల దగ్గర పెట్టుకున్నట్లు చెప్పారు. పోలీసులు ఈ ఘటనపై దర్యాప్తు చేస్తున్నారు.
|
|