రెండో రోజు కొనసాగుతున్న కుల్గాం ఎన్‌కౌంటర్.. ఐదుగురు ఉగ్రవాదులు హతం

జమ్మూ కశ్మీర్‌లోని కుల్గాం జిల్లాలో భద్రతా బలగాలు, ఉగ్రవాదుల మధ్య భీకర ఎదురుకాల్పులు కొనసాగుతున్నాయి. ఇప్పటి వరకూ ఐదుగురు ముష్కరులను హతమార్చినట్టు పోలీసులు శుక్రవారం వెల్లడించారు. ఆపరేషన్ తుది దశకు చేరుకుందని, హతమైన ఉగ్రవాదులను గుర్తించే ప్రక్రియ చేపట్టామని తెలిపారు. కుల్గాం జిల్లా డీహెచ్ పొర ప్రాంతంలోని సామ్నో పోకెట్ వద్ద గురువారం మధ్యాహ్నం మొదలైన ఎన్‌కౌంటర్.. ఇంకా కొనసాగుతోందని జమ్మూ కశ్మీర్ పోలీసులు పేర్కొన్నారు. ఆర్మీ, సీఆర్పీఎఫ్, జమ్మూ కశ్మీర్ పోలీసులు సంయుక్తంగా ఈ ఆపరేషన్ చేపట్టాయి.

సామ్నో పోకెట్ వద్ద ఉగ్రవాదులున్నారనే సమాచారంతో భద్రతా బలగాలు అక్కడకు చేరుకుని కూంబింగ్ చేపట్టాయి. ఈ క్రమంలో ముష్కరులు కాల్పులకు తెగబడటంతో సైన్యం అప్రమత్తమైంది. ముష్కరులను కట్టడి చేయడానికి వెంటనే ఎదురుకాల్పులు ప్రారంభించింది. భద్రతా దళాల కాల్పుల్లో ఐదుగురు ఉగ్రవాదులు హతమయ్యారని, ఘటనా స్థలిలో పేలుడు పదార్థాలను స్వాధీనం చేసుకున్నామని కశ్మీర్ జోన్ పోలీసులు ట్వీట్ చేశారు. తీవ్రవాదులు, సైన్యం మధ్య భీకర కాల్పులు జరిగినట్టు పోలీసులు ధ్రువీకరించారు.

ఆర్మీకి చెందిన 34 రాష్ట్రీయ రైఫిల్స్, 9 పారా (ఎలైట్ స్పెషల్ ఫోర్సెస్ యూనిట్) పోలీస్, సీఆర్పీఎఫ్ ఈ ఆపరేషన్‌లో పాల్గొన్నాయి. రాత్రిపూట ఆ గ్రామాన్ని చుట్టుముట్టిన భద్రతా బలగాలు.. ఎన్‌కౌంటర్ ప్రదేశంలో లైట్లను ఏర్పాటుచేశారు. ఉగ్రవాదులు నక్కిన ప్రాంతం చుట్టూ భద్రతా బలగాలు గట్టి వలయాన్ని నిర్వహించి, రాత్రిపూట ఆపరేషన్‌ను నిలిపివేసినట్లు అధికారులు తెలిపారు. కుల్గామ్‌లోని నేహమా ప్రాంతంలోని సామ్నో వద్ద రాత్రిపూట ప్రశాంతంగా ఉన్న తర్వాత శుక్రవారం తెల్లవారుజామున కాల్పులు ప్రారంభమైనట్టు పేర్కొన్నారు.

ఈ ఉదయం జరిగిన ఎదురుకాల్పుల్లో ఉగ్రవాదులు దాక్కున్న ఇంట్లో మంటలు చెలరేగడంతో వారు బయటకు వచ్చేశారు. సెప్టెంబరు 13న అనంత్‌నాగ్‌ గారోల్ అడవుల్లో వారం రోజుల పాటు జరిగిన ఆపరేషన్‌లో నలుగురు భద్రతా సిబ్బంది, ఇద్దరు టెర్రరిస్టులు హతమైన తర్వాత దక్షిణ కశ్మీర్‌లో జరిగిన అతిపెద్ద ఉగ్రవాద వ్యతిరేక ఆపరేషన్ ఇది. నవంబరు 15న ఉరి సెక్టార్‌లో ఉగ్రవాదుల చొరబాటును సైన్యం తిప్పికొట్టి.. ఇద్దర్ని హతమార్చిన విషయం తెలిసిందే. ఆపరేషన్ కాళీ పేరుతో సైన్యం, పోలీసులు సంయుక్తంగా ఆపరేషన్ చేపట్టింది.