25 ఏళ్ల క్రితం దేశంలోనే తొలి కాలేయమార్పిడి.. కట్ చేస్తే ఇప్పుడు డాక్టర్‌గా

అవయవాల మార్పిడి గత కొన్ని దశాబ్దాల నుంచి మన దేశంలో జరుగుతూనే ఉంది. ఇటీవల మనుషుల అవయవాలే కాకుండా కొన్ని జంతువుల అవయవాలను కూడా మనుషులకు అమర్చుతున్నారు. అందులో కొన్ని సక్సెస్ అవుతుండగా.. మరికొన్ని ఫెయిల్ అయి.. బాధితులు ప్రాణాలు కోల్పోతున్నారు. ఈ క్రమంలోనే తాజాగా ఒక ఆసక్తికరమైన విషయం వెలుగులోకి వచ్చింది. మన దేశంలోనే తొలిసారి కాలేయ మార్పిడీ చేయించుకుని ప్రాణాలు దక్కించుకున్న చిన్నారి.. 25 ఏళ్ల తర్వాత వైద్యుడిగా మారాడు. ఈ సంఘటన తమిళనాడులో జరిగింది.

తమిళనాడుకు చెందిన సంజయ్ కందసామి అనే వ్యక్తి.. ఎంబీబీఎస్ పూర్తి చేసి.. డాక్టర్‌గా తాను పుట్టి పెరిగిన సొంత ఊరు కాంచీపురంలో ప్రాక్టీస్ ప్రారంభించాడు. అయితే పాతికేళ్ల క్రితం కాలేయ మార్పిడితో పునర్జన్మ పొందిన సంజయ్ కందసామి.. ఇప్పుడు అదే వైద్య రంగంలో డాక్టర్‌ అయ్యాడు. దీంతో అవయవ మార్పిడి వల్ల జరిగిన ఒక అద్భుత విజయానికి అతడో సజీవ సాక్ష్యంగా నిలిచాడు. అయితే మన దేశంలోనే మొట్టమొదటి సక్సెస్‌ఫుల్ పీడియాట్రిక్ కాలేయ మార్పిడి గ్రహీత సంజయ్ కందసామి కావడం గమనార్హం.

1998 లో ఓ 20 నెలల చిన్నారికి కాలేయ సమస్య ఏర్పడి.. ఢిల్లీలోని ఇంద్రప్రస్థ అపోలో హాస్పిటల్‌లో చేరాడు. అయితే కాలేయాన్ని మార్చాలని డాక్టర్లు తేల్చారు. అప్పటికీ మన దేశంలో కాలేయ మార్పిడిని విజయవంతంగా నిర్వహించింది లేకపోవడంతో కుటుంబ సభ్యులు భయపడ్డారు. అయితే కందసామికి కాలేయ మార్పిడి చేసిన ఇంద్రప్రస్థ అపోలో ఆస్పత్రి వైద్యులు.. దేశంలోనే మొట్టమొదటి పీడియాట్రిక్ లివర్ ట్రాన్స్‌ప్లాంటీగా కందసామి నిలిచాడు.

అయితే తన ప్రాణాలు కాపాడేందుకు డాక్టర్లు చేసిన కృషి, ప్రయత్నాలతో తాను కూడా వైద్యుడిని కావాలనుకున్నానని కందసామి తెలిపాడు. డాక్టరుగా తాను కూడా రోగుల ప్రాణాలు కాపాడటంలో భాగం కావాలని.. జీవితంలో ఎలాంటి సవాల్‌నైనా స్వీకరించాలని నిర్ణయించుకున్నట్లు చెప్పాడు. కాంచీపురానికి చెందిన కందసామి.. బైలరీ అట్రేసియా అనే కాలేయ వ్యాధితో పుట్టాడు. అది కాస్తా లివర్‌ ఫెయిల్యూర్‌కి దారితీయడంతో కాలేయ మార్పిడి చేయాల్సిన అవసరం వచ్చింది. అయితే కందసామికి కాలేయాన్ని ఇచ్చేందుకు ఆయన తండ్రి ముందుకువచ్చారు.

అయితే లివర్ ట్రాన్స్‌ప్లాంట్ సర్జరీ చేయించుకున్నవారు చాలా కాలం ఆరోగ్యంగా జీవించవచ్చు అనేదానికి కందసామి ఒక ఉదాహరణ అని ఇంద్రప్రస్థ అపోలో హాస్పిటల్స్‌లో గ్రూప్ మెడికల్ డైరెక్టర్, సీనియర్ పీడియాట్రిక్ గ్యాస్ట్రోఎంటరాలజిస్ట్ డాక్టర్ అనుపమ్ సిబల్ తెలిపారు. కందసామి కాలేయ మార్పిడి ఆపరేషన్ తన కెరీర్‌లో గర్వించదగిన క్షణాల్లో ఒకటి అని మరో డాక్టర్‌ మేదాంత లివర్‌ ట్రాన్స్‌ప్లాంటేషన్‌ ఇన్‌స్టిట్యూట్‌ చైర్మన్‌ డాక్టర్‌ ఏఎస్‌ సోయిన్‌ పేర్కొన్నారు. కందసామి ఆపరేషన్ సక్సెస్ తర్వాత అపోలో ఆస్పత్రి వైద్యులు ఇప్పటి వరకు 4,300 కాలేయ మార్పిడి ఆపరేషన్‌లు విజయవంతంగా నిర్వహించారు. ఇందులో 515 మంది పిల్లలు ఉండటం గమనార్హం.