చెప్పులు ఇచ్చి మరీ చెప్పుతో కొట్టించుకున్న ఎమ్మెల్యే అభ్యర్థి

ఐదు రాష్ట్రాల ఎన్నికల సందర్భంగా పార్టీలు, అభ్యర్థులు.. వినూత్న ప్రచారంతో ప్రజల్లోకి చొచ్చుకెళ్తున్నారు. కొందరు అభ్యర్థులు చేస్తున్న కొన్ని కొన్ని పనులు ప్రస్తుతం సోషల్ మీడియాలో విస్తృతంగా వైరల్ అవుతున్నాయి. తాజాగా కాంగ్రెస్ పార్టీకి చెందిన ఓ ఎమ్మెల్యే అభ్యర్థి చేసిన పని వైరల్‌గా మారింది. చెప్పులు తీసుకెళ్లి ఓ వ్యక్తికి ఇచ్చి.. ఆ చెప్పులతో కొట్టించుకున్నారు. అయితే ఇదంతా ఆయన సెంటిమెంట్ అని చెప్పడం గమనార్హం. ఈ సంఘటన మధ్యప్రదేశ్ రాష్ట్రంలో చోటు చేసుకుంది. మధ్యప్రదేశ్‌ అసెంబ్లీ ఎన్నికల్లో భాగంగా రత్లాం నియోజకవర్గం నుంచి కాంగ్రెస్ పార్టీ తరఫున పరాస్ సాక్లేచా బరిలో నిలిచారు. ఈ క్రమంలోనే విస్తృత ప్రచారం నిర్వహించారు. స్థానికంగా రోడ్డు పక్కన ఉండే ఫకీర్‌ చేతిలో చెప్పు దెబ్బలు తిన్నారు. కొత్త చెప్పులు తీసుకెళ్లి ఆ ఫకీర్‌కు పరాస్ సాక్లేచా సమర్పించారు. అనంతరం వాటితో కొట్టించుకుని ఫకీర్ చేతిలో ఆశీర్వాదం తీసుకున్నారు. ఆ చెప్పులను తీసుకున్న బాబా.. పరాస్ సాక్లేచా తలపై కొట్టాడు. ఆ తర్వాత రెండు చెప్పులతో రెండు చెంపలపై చెళ్లుమనిపించాడు.

ఆ ఫకీర్ చెప్పులతో కొడుతున్నంతసేపు పరాస్ సాక్లేచా ఆనందంతో పరవశించిపోవడం గమనార్హం. అయితే ఫకీర్‌ చేతిలో చెప్పు దెబ్బలు తింటే ఎన్నికల్లో విజయం ఖాయం అనే ఉద్దేశంతోనే పరాస్ సాక్లేచా ఇలా చేసినట్లు ఆయన అనుచరులు తెలిపారు. ఈ ఘటనకు సంబంధించిన వీడియో ప్రస్తుతం సోషల్‌ మీడియాలో వైరల్‌ అవుతోంది. దాన్ని చూసిన నెటిజన్లు భిన్నంగా స్పందిస్తున్నారు. చెప్పు దెబ్బలకు పళ్లు రాలుతాయ్ కానీ ఓట్లు రాలుతాయా అంటూ వ్యంగ్యంగా కామెంట్లు చేస్తున్నారు.

చెప్పులతో కొట్టించుకున్న కాంగ్రెస్ ఎమ్మెల్యే అభ్యర్థి అయితే గతంలో పరాస్ సక్లేచా 2008 లో రత్లాం అసెంబ్లీ స్థానంలో ఇండిపెండెంట్‌గా పోటీ చేసి విజయం సాధించారు. ఆ తర్వాత కాంగ్రెస్ పార్టీలో చేరారు. అయితే ఆ తర్వాత 2013 లో పరాజయం పాలై మూడో స్థానంలో నిలిచారు. ఆ తర్వాత 2018 లో కూడా ఓడిపోయిన పరాస్ సక్లేచా.. ఇప్పుడు వరుసగా మూడోసారి ఎన్నికల్లో పోటీ చేస్తున్నారు. ఇక మధ్యప్రదేశ్ అసెంబ్లీ ఎన్నికలు శుక్రవారం పూర్తయ్యాయి. ఒకే విడతలో 230 అసెంబ్లీ స్థానాలకు ఎన్నికల పోలింగ్ నిర్వహించగా.. 76.22 శాతం పోలింగ్ నమోదైనట్లు ఎన్నికల అధికారులు శనివారం వెల్లడించారు. మొత్తం 230 స్థానాలకు 2533 మంది అభ్యర్థులు పోటీ పడ్డారు. 1956 లో మధ్యప్రదేశ్ రాష్ట్రం ఏర్పడినప్పటి నుంచి ఇప్పటివరకు ఈస్థాయిలో ఓటింగ్ శాతం నమోదు కావడం విశేషం.