తిరుమలలో కారు కలకలం.. ,,కారుపై అన్యమత పేరుతో స్టిక్కర్,,,, భక్తుల ఆగ్రహం
Andhra Pradesh Telugu | Suryaa Desk | Published : Wed, Nov 22, 2023, 06:29 PM
తిరుమలలో మరోసారి అన్యమత ప్రచారం వ్యవహారం కలకలంరేపింది. బుధవారం అన్యమతానికి సంబంధించిన పేరుతో ఓ కారు తిరుమల రోడ్లపై చక్కర్లు కొట్టింది.. తమిళనాడు రిజిస్ట్రేషన్తో ఉన్న కారుపై అన్యమత ప్రచారంకు చెందిన గుర్తులు, పేర్లు ఉన్నాయి. తిరుమల రోడ్లపై కారు తిరుగుతున్నా ఎవరూ పట్టించుకోలేదని భక్తులు ఆగ్రహం వ్యక్తం చేస్తున్నారు. శ్రీవారి ఆలయంకు సమీపంలోని అన్నదాన సత్రం సమీపంలో ఈ వాహనం చక్కర్లు కొడుతుంటే కొందరు భక్తులు వాహనం వీడియోలను తీశారు.
తిరుమల కొండపైకి వచ్చే ముందు.. అలిపిరి టోల్ గేట్ దగ్గర ప్రతి వాహనాన్ని క్షుణ్ణంగా తనిఖి చేసిన తర్వాతే అనుమతిస్తారు. అయితే కొందరు విజిలెన్స్ సిబ్బంది నిర్లక్ష్యం కారణంగా తరచూ అన్యమత గుర్తులు, పేర్లు కలిగిన వాహనాలు తిరుమలకు వస్తున్నాయనే విమర్శలొస్తున్నాయి. విజిలెన్స్ సిబ్బంది నిర్లక్ష్యంపై భక్తులు తీవ్రంగా ఆగ్రహం వ్యక్తం చేస్తున్నారు. విజిలెన్స్ సిబ్బంది పట్టించుకోక పోవడంతో ఇలా జరుగుతోందని భక్తులు ఆగ్రహం వ్యక్తం చేస్తున్నారు.
తిరుమలలో అన్యమత ప్రచారం, రాజకీయ పార్టీల ప్రచారం, పార్టీల గుర్తులు, జెండాలను తీసుకుని రాకూడదని నిబంధనలు ఉన్నాయి. అయినా సరే కొందరు నిబంధనలను ఉల్లంఘిస్తూ భక్తుల మనోభావాలు దెబ్బ తీసే విధంగా వ్యవహరిస్తున్నారని భక్తులు అంటున్నారు. గతంలో కూడా కొందరు రాజకీయ పార్టీలకు చెందిన జెండాలతో తిరుమలలో తిరిగిన ఘటనలు ఉన్నాయి. ఇలాంటి ఘటనలు ఎన్ని జరుగుతున్నా టీటీడీ అధికారులు మేల్కొనకపోవడం విచారకరమని హిందూ సంఘాలు ఆవేదన వ్యక్తం చేస్తున్నాయి.
|
|