ఏపీలో కొనసాగుతున్న వర్షాలు,,,,ఆందోళనలో రైతన్నలు

బంగాళాఖాతం నుంచి దక్షిణాది రాష్ట్రాల వైపు తూర్పుగాలులు వీస్తున్నాయి. దీంతో గురువారం కోస్తా, రాయలసీమల్లో అనేకచోట్ల వర్షాలు కురిశాయి. దక్షిణ కోస్తాలో అనేక ప్రాంతాల్లో భారీ వర్షాలు కురవగా.. రాయలసీమలో చాలా చోట్ల ఓ మోస్తరు వాన పడింది. ఈనెల 25న దక్షిణ అండమాన్‌ సముద్రంలో ఉపరితల ఆవర్తనంకు అవకాశం ఉందని.. ఈ ప్రభావంతో 26న అల్పపీడనం ఏర్పడి తరువాత బలపడి వాయుగుండంగా మారుతుందని వాతావరణ శాఖ తెలిపింది. రానున్న 24 గంటల్లోనూ కోస్తా, రాయలసీమల్లో పలుచోట్ల వర్షాలు కురుస్తాయని వాతావరణ శాఖ తెలిపింది. ప్రకాశం, నెల్లూరు, నంద్యాల, కడప, అన్నమయ్య, చిత్తూరు, తిరుపతిలో మోస్తరు వర్షాలు కురుస్తాయంటున్నారు. అల్లూరి సీతారామరాజు, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, కర్నూలు, అనంతపురం, శ్రీసత్యసాయి జిల్లాల్లో తేలికపాటి వానలకు అవకాశం ఉందంటున్నారు.

బాపట్ల జిల్లా కూచినపూడిలో 50.25, అన్నమయ్య జిల్లా మదనపల్లెలో 48.4 మిల్లీమీటర్లు, ఏలూరు జిల్లా నూజివీడులో 47.25, కృష్ణా జిల్లా భావదేవరపల్లిలో 45.5, , ప్రకాశం జిల్లా మర్రిపూడిలో 44.8, నెల్లూరు జిల్లా కందుకూరులో 39.4, అన్నమయ్య జిల్లా వెలిగల్లులో 38, తిరుపతిలో 33.2, పల్నాడు జిల్లా పిడుగురాళ్లలో 31.4, ప్రకాశం జిల్లా పొదిలిలో 29.6, పల్నాడు జిల్లా సత్తెనపల్లిలో 29.4,తిరుపతి జిల్లా వెంకటగిరిలో 29, నెల్లూరు జిల్లా సీతారామపురంలో 27.8, ప్రకాశం జిల్లా వెలిగండ్లలో 26.2, తిరుపతి జిల్లా గూడూరులో 25.8, నెల్లూరు జిల్లా ఉదయగిరిలో 22.4, అన్నమయ్య జిల్లా చిన్నమండెంలో 19, అన్నమయ్య జిల్లా ఆరోగ్యవరంలో 18.6, ప్రకాశం జిల్లా ఒంగోలులో 17.8, తిరుపతి జిల్లా తడలో 17.6, ప్రకాశం జిల్లా చీమకుర్తిలో 16, అన్నమయ్య జిల్లా లక్కిరెడ్డిపల్లెలో 15.6, ప్రకాశం జిల్లా ముండ్లమూరులో 15.2 మిల్లీ మీటర్ల వర్షపాతం నమోదైంది.

ఈ వర్షాలతో ఉమ్మడి పశ్చిమగోదావరి, కృష్ణా, గుంటూరు, ప్రకాశం, నెల్లూరు, చిత్తూరు జిల్లాల్లో వరి, పత్తికి కొద్దిగా నష్టం వస్తుందంటున్నారు రైతులు. వరి పైరు కోసి, ఓదెలపై ఉన్న పనులు, నూర్చి, ఆరబోసిన ధాన్యం తడిసింది. కొన్ని చోట్ల ధాన్యం కుప్పలు తడిసి రైతులు ఇబ్బంది పడ్డారు. ఈ వర్షంతో దక్షిణ కోస్తా జిల్లాల్లోని పత్తి పొలాల్లో తీయాల్సిన పత్తి కూడా స్వల్పంగా తడిసింది. ప్రస్తుత వర్షాలు వరి, పత్తి రైతులకు వర్షాలు నష్టం చేస్తుండగా.. ఇతర పంటలకు ఉపయోగపడుతున్నాయి. . గతవారం బంగాళాఖాతంలో తుఫాన్‌ ఏర్పడినా రాష్ట్రంలో పెద్దగా ప్రభావం చూపలేదు.. దీంతో వరి, పత్తి రైతులు ఊపిరి పీల్చుకున్నారు. ఇప్పుడు మాత్రం మోస్తరు వర్షాలైనా ఇబ్బందిపడుతున్నారు.