మధురవాడ వాంబే కాలనీలో గ్యాస్‌ లీక్‌.. నలుగురికి తీవ్ర గాయాలు
Andhra Pradesh Telugu | Suryaa Desk | Published : Fri, Nov 24, 2023, 08:16 PM
విశాఖ జిల్లా మధురవాడ వాంబే కాలనీలో ఓ ఇంట్లో వంట గ్యాస్‌ లీకై నలుగురు తీవ్రంగా గాయపడ్డారు. మధురవాడ వాంబే కాలనీలో బాలరాజు అనే వ్యక్తి తన భార్య చిన్ని, కుమారులు గిరి, కార్తిక్‌లతో నివాసం ఉంటున్నాడు. ఇవాళ తెల్లవారుజామున వంట గ్యాస్‌ అయిపోవడంతో.. కొత్త సిలిండర్‌కు అతడు రెగ్యులేటర్‌ను అమర్చాడు. కానీ రెగ్యులేటర్ సరిగా అమర్చకపోవడంతో గ్యాస్‌ లీకై ఇళ్లంతా వ్యాపించింది. బాలరాజుతోపాటు తన ఇద్దరు కుమారులు భవానీ మాలధారణ ధరించి ఉన్నారు.. వారు ఉదయాన్నే లేచి గ్యాస్‌ లీక్‌ను గమనించక పూజ చేసేందుకు రెడీ అయ్యారు. పూజ కోసం దేవుడి చిత్ర పటాల దగ్గర దీపారాధన చేయడానికి వెలిగించడంతో ఇంట్లో ఒక్కసారిగా మంటలు వ్యాపించాయి. ఈ ఘటనలో ఇంట్లో ఉన్న నలుగురు తీవ్రంగా గాయపడ్డారు. వస్తువులన్నీ మంటల్లో దగ్ధమయ్యాయి.. వెంటనే గమనించిన స్థానికులు 108 వాహనంతోపాటు ఫైర్ సిబ్బందికి సమాచారం అందించారు. పీఎం పాలెం పోలీసులు ఘటనాస్థలికి చేరుకుని క్షతగాత్రులను కేజీహెచ్‌కు తరలించారు. ఫైర్ సిబ్బంది మంటలను అదుపు చేశారు.
|
|