మోదీ పర్యటనలో భద్రతా వైఫల్యం.. ఓ ఎస్పీ, ఇద్దరు డీఎస్పీలు సహా ఏడుగురు అధికారులు సస్పెండ్

గతేడాది జనవరిలో ప్రధాని నరేంద్ర మోదీ పంజాబ్‌ పర్యటన సందర్భంగా చోటుచేసుకున్న భద్రతా వైఫల్యానికి బాధ్యులను చేస్తూ ఓ ఎస్పీ, ఇద్దరు డీఎస్పీలు సహా ఏడుగురు పోలీస్ అధికారులను సస్పెండ్ చేశారు. పంజాబ్‌లో గతేడాది జనవరి 5న ప్రధాని నరేంద్ర మోదీ పర్యటించారు. షెడ్యూల్ ప్రకారం ప్రధాని ఫిరోజ్‌పూర్‌‌ ర్యాలీలో పాల్గొనాల్సి ఉండగా.. మోదీ కాన్వాయ్ వెళ్తున్న మార్గాన్ని ఆందోళనకారులు దిగ్బంధించారు. దీంతో ప్రధాని కాన్వాయ్ 20 నిమిషాల పాటు ఫ్లైఓవర్‌పై నిలిచిపోగా.. సభను రద్దు చేసుకున్నారు.

భద్రతా లోపాల వల్ల ప్రధాని సభ రద్దయ్యిందని, ఈ విషయమై పంజాబ్ సీఎం చరణ్‌జీత్ చన్నీకి ఫోన్ చేసినా స్పందించలేదని బీజేపీ ఆరోపణలు చేసింది. కానీ ప్రధాని పర్యటన షెడ్యూల్‌ను చివరి క్షణంలో మార్చేశారని కాంగ్రెస్ ధ్వజమెత్తింది. దీనిపై విచారణకు సుప్రీంకోర్టు ఓ కమిటీని ఏర్పాటుచేయగా.. ఈ ఘటనకు పలువురు రాష్ట్ర అధికారులను వైఫ్యలాన్ని ఎత్తిచూపింది. దీంతో పంజాబ్ ప్రభుత్వం ఏడుగురు అధికారులను విధుల నుంచి తప్పిస్తూ నవంబరు 22న ఉత్తర్వులు వెలువరించింది.

అప్పటి ఫిరోజ్‌పూర్ ఎస్పీ గుర్బీందర్ సింగ్ (ప్రస్తుతం బఠిండా ఎస్పీ), డీఎస్పీ ర్యాంకు అధికారులు పర్సన్ సింగ్, జగదీశ్ కుమార్, ఇన్‌స్పెక్టర్లు జితేందర్ సింగ్, బల్వీందర్ సింగ్‌లు, ఎస్ఐ జశ్వంత్ సింగ్, ఏఎస్ఐ రమేశ్ కుమార్‌లను సస్పెండ్ చేసినట్టు పంజాబ్ హోమ్ మంత్రిత్వ శాఖ ఉత్తర్వుల్లో పేర్కొంది. ఈ ఏడుగురు అధికారులపై పంజాబ్ సివిల్ సర్వీసెస్ నిబంధనలు 1970లోని రూల్ 5 కింద చర్యలు తీసుకున్నట్టు తెలిపింది. ఈ నిబంధనల ప్రకారం శిక్షగా ప్రమోషన్‌ను నిలిపివేయడం నుంచి సర్వీస్ నుండి తొలగించడం వరకు ఉంటాయి.