వాళ్లు ఎక్కడికి వెళ్లినా వదిలేది లేదు: నారా లోకేష్

టీడీపీ జాతీయ ప్రధాన కార్యదర్శి నారా లోకేష్ యువగళం పాదయాత్ర దాదాపు రెండున్నర నెలల తర్వాత తిరిగి ప్రారంభమైంది. సోమవారం ఉదయం రాజోలు నియోజకవర్గం పొదలాడలో 210వ రోజు పాదయాత్రను యువనేత మొదలుపెట్టారు. స్కిల్ డెవలప్‌మెంట్ కేసులో టీడీపీ అధినేత చంద్రబాబు అరెస్ట్ తర్వాత సెప్టెంబర్ 9న యువగళం పాదయాత్రకు తాత్కాలికంగా ఆగింది. చంద్రబాబుకు బెయిల్ రావడంతో ఇవాళ యువగళాన్ని తిరిగి ప్రారంభించారు. లోకేష్ పాదయాత్రలో టీడీపీ మాజీ మంత్రులు, ఎమ్మెల్యేలు, మాజీ ఎమ్మెల్సీలు పాల్గొన్నారు. ఇప్పటి వరకూ 209 రోజుల పాటు 2852.4 కిలోమీటర్లు యువనేత పాదయాత్ర చేశారు. పాదయాత్రలో భాగంగా తాటిపాక సెంటర్‌లోని బహిరంగసభలో లోకేష్ మాట్లాడారు. ముఖ్యమంత్రి జగన్, మంత్రులు, వైఎస్సార్‌సీపీ నేతలపై ఘాటు వ్యాఖ్యలు చేశారు.

చంద్రబాబు అరెస్ట్‌ అయిన తర్వాత అన్ని వర్గాల ప్రజలు ఆయనకు అండగా నిలిచారన్నారు. ఆయన్ను జైలుకు పంపితే తన పాదయాత్ర ఆగుతుందని అధికార పార్టీ నేతలు అనుకున్నారని.. ఎన్ని అడ్డంకులు కలిగించినా యువగళం ఆగదన్నారు. వ్యవస్థలను మేనేజ్‌ చేసి చంద్రబాబును 53 రోజులు జైల్లో పెట్టారని.. తనపైనా సీఐడీ అధికారులు కేసులు నమోదు చేసిందన్నారు. కానీ ఈ కేసుల్లో ఒక్క ఆధారమూ చూపలేకపోయారని.. ఏ తప్పూ చేయనందునే మళ్లీ ఇక్కడ నిలబడ్డానన్నారు. పాదయాత్ర మొదలుపెట్టిన మొదటి రోజు నుంచే తనపై కుట్రలు చేశారని.. అడ్డుకునే ప్రయత్నం జరిగిందన్నారు. పోలీసుల్ని పంపారని, పిల్ల సైకోలను పంపినా వెనక్కు తగ్గలేదన్నారు. తన మైక్, స్టూల్ లాక్కున్నారని.. ఎన్టీఆర్ ఇచ్చిన గొంతు ఆపే మగాడు పుట్టలేదని.. సాగనిస్తే పాదయాత్ర.. అడ్డుకుంటే దండయాత్ర అవుతుందన్నారు. యువగళం వాలంటీర్ల మీద కేసులు పెట్టారని.. నేతల మీద కేసులు పెట్టారన్నారు. చంద్రబాబును చూస్తే జగన్‌కు భయమని.. అందుకే అక్రమంగా అరెస్ట్ చేశారని ఆరోపించారు. మూడు నెలలు ఓపిక పడితే టీడీపీ కార్యకర్తల్ని వేధించిన వారికి వడ్డీ తో సహా చెల్లిస్తానన్నారు. రాజోలు లో ఉన్నా రష్యా పారిపోయినా వెనక్కు తీసుకొచ్చి జైలుకు పంపండ ఖాయమన్నారు.

మరోమూడు నెలల్లో టీడీపీ అధికారంలోకి రావడం పక్కా అంటున్నారు లోకేష్. కచ్చితంగా ఈ వేధింపులకు బదులు తీర్చుకుంటామన్నారు. రాజారెడ్డి రాజ్యాంగం పనైపోయిందని.. అంబేద్కర్ రాజ్యాంగం కాపాడాల్సిన బాధ్యత అందరిపై ఉందన్నారు. 80 ఏళ్ల కార్యకర్త కూడా బెదిరింపులకు భయపడకుండా తొడకొట్టి సవాల్ చేస్తారని.. అది టీడీపీ పవర్ అన్నారు లోకేష్. చంద్రబాబుపై నమోదు చేసిన స్కిల్‌ కేసులో ఒక్క ఆధారమైనా చూపించారా? అని ప్రశ్నించారు. టీడీపీ ఖాతాలోకి డబ్బు వచ్చిందని నిరూపించగలరా?.. తనపై ఆరు కేసులు పెట్టారు.. అయినా వెనక్కి తగ్గేదిల లేదన్నారు. మంత్రులకు చెబుతున్నా.. అందరికి కౌంట్‌డౌన్‌ మొదలైందన్నారు. నాడు జనసేన అధినేత పవన్‌కల్యాణ్‌ వస్తుంటే ఎలా అడ్డుకున్నారో చూశామని.. తమపై ఎన్ని కేసులు పెడతారో పెట్టుకోవచ్చని.. తాము కూడా ఈలాగే కక్షసాధిస్తే వైఎస్సార్‌సీపీ నేతలంతా జైలులోనే ఉంటారన్నారు. అధికారంలోకి వచ్చాక వడ్డీతో సహా చెల్లించే బాధ్యత తాను తీసుకుంటానన్నారు. భయం ఎలా ఉంటుందో పరిచయం చేస్తానన్నారు. వైఎస్సార్‌సీపీ బస్సు యాత్ర కాస్త తుస్సు యాత్రగా మారిందని ఎద్దేవా చేశారు లోకేష్. ఇప్పుడు ‘వై ఏపీ నీడ్స్‌ జగన్‌’ అంటున్నా.. వారిని ఎవరూ పట్టించుకోవడం లేదన్నారు. జగన్‌ పాలనలో సామాజిక అన్యాయం జరిగిందని.. అనేక మంది దళితులను వేధించి చంపారని ఆరోపించారు.