తన ఎత్తు ఏంటో తెలిసిందా అంటూ,,,,ప్రియాంక గాంధీకి సింధియా కౌంటర్ సెటైర్

మధ్యప్రదేశ్‌లో కమలం ప్రభంజనం సృష్టించింది. 230 స్థానాలకు జరిగిన ఎన్నికల్లో సుమారు 167 చోట్ల విజయం సాధించే దిశగా బీజేపీ దూసుకెళ్తోంది. బీజేపీ, కాంగ్రెస్ మధ్య హోరాహోరీ పోరు సాగుతుందని ఎగ్జిట్ పోల్స్ అంచనా వేయగా.. ఎగ్జిట్ పోల్స్ అంచనాలను తలకిందులు చేస్తూ కమలం పార్టీ మధ్యప్రదేశ్‌లో విజయ ఢంకా మోగించింది. ఈ నేపథ్యంలో ఎన్నికల ప్రచారం సందర్భంగా కాంగ్రెస్ ప్రధాన కార్యదర్శి ప్రియాంక గాంధీ వాద్రా చేసిన వ్యాఖ్యలకు జ్యోతిరాధిత్య సింధియా కౌంటర్ ఇచ్చారు. నా ఎత్తు ఏంటో ఇప్పుడు తెలిసిందా అంటూ వ్యాఖ్యానించారు.

ఐదురాష్ట్రాల ఎన్నికల ప్రచారంలో భాగంగా గతనెల దతియాలో జరిగిన ఎన్నికల ప్రచారంలో ప్రియాంక గాంధీ పాల్గొన్నారు. ఈ సందర్భంగా జ్యోతిరాధిత్య సింధియా మీద విమర్శలు గుప్పించిన ప్రియాంక గాంధీ.. తనను ఓ నమ్మక ద్రోహిగా అభివర్ణించారు. బీజేపీ నాయకులు అందరూ విచిత్రంగా ఉంటారన్న ప్రియాంక గాందీ.. సింధియా గురించి కూడా ప్రస్తావించారు. జ్యోతిరాధిత్య సింధియాతో యూపీలో కలిసి పనిచేశానన్న ప్రియాంక.. అతని ఎత్తు కొంచెం తక్కువే అయినా అహంకారం మాత్రం ఎక్కువంటూ వ్యాఖ్యానించారు.

సింధియాను కలిసేందుకు వెళ్లే కార్యకర్తలు, ప్రజలు అంతా అతన్ని మహరాజ్ అని పిలవాలని, లేకుంటే వారి పని జరగదని ప్రియాంక విమర్శించారు. సింధియా ఇంకా తన రాచరిక లక్షణాలను కొనసాగిస్తున్నాడన్న ప్రియాంక.. చాలామంది మోసం చేస్తుంటారని, కానీ సింధియా గ్వాలియర్, చంబా ప్రాంత ప్రజలకు చేసిన మోసం మాత్రం మరిచిపోలేదని ఆరోపించారు. సింధియా కారణంగానే కాంగ్రెస్ ప్రభుత్వం కూలిపోయిందని విమర్శించారు. ఈ నేపథ్యంలో ఎన్నికల ఫలితాల్లో బీజేపీ ఘనవిజయం సాధించడంతో ప్రియాంక వ్యాఖ్యలపట్ల జ్యోతిరాధిత్య సింధియా కౌంటర్ ఇచ్చారు. కొంతమంది తన ఎత్తు గురించి మాట్లాడారన్న సింధియా... ఎంత ఎత్తులో ఉన్నామో గ్వాలియర్, మాల్వా ప్రజలు చూపించారంటూ పరోక్షంగా ప్రియాంక గాంధీకి కౌంటర్ వేశారు.

2018 శాసనసభ ఎన్నికల్లో కాంగ్రెస్ పార్టీ అతిపెద్ద పార్టీగా అవతరించింది. ఆ తర్వాత కమల్ నాథ్ నేతృత్వంలో కాంగ్రెస్ ప్రభుత్వం కొలువు దీరింది. అయితే 2020లో తన వర్గపు ఎమ్మెల్యేలతో కలిసి జ్యోతిరాధిత్య సింధియా ఆ పార్టీని వీడారు. దీంతో కమల్ నాథ్ సర్కారు కుప్పకూలింది. ఆ తర్వాత బీజేపీలో చేరిన జ్యోతిరాధిత్య సింధియా కేంద్ర మంత్రివర్గంలోనూ స్థానం సంపాదించారు. పౌరవిమానయాన శాఖ మంత్రిగా బాధ్యతలు చేపట్టారు. గ్వాలియర్ ప్రాంతంలో సింధియాకు మంచి పట్టుంది. ఈ నేపథ్యంలో ఈసారి ఎన్నికల్లో ఆ ప్రాంతంలో బీజేపీ అత్యధిక స్థానాల్లో విజయం సాధించింది. మరోవైపు జ్యోతిరాధిత్య సింధియా పేరు ఈసారి సీఎం రేసులోనూ ప్రముఖంగా వినిపిస్తోంది. ప్రస్తుత సీఎం శివరాజ్ సింగ్ చౌహాన్‍‌తో పాటుగా జ్యోతిరాదిత్య సింధియా, కైలాస్‌ విజయ్‌ వర్గీయ సీఏం పదవి కోసం పోటీ పడుతున్నట్లు సమాచారం.