కాంగ్రెస్ నుంచి కాపీ కొట్టిన పథకంతో అధికారంలోకి బీజేపీ

మధ్యప్రదేశ్‌లో అధికారాన్ని నిలబెట్టుకునే దిశగా బీజేపీ అడుగులు వేస్తోంది. 230 స్థానాలున్న మధ్యప్రదేశ్ శాసనసభలో బీజేపీ 160కి పైగా స్థానాల్లో గెలుస్తుందని ఎన్నికల ఫలితాల సరళి సూచిస్తోంది. మధ్యప్రదేశ్‌లో హోరాహోరీ పోరు సాగుతుందని మెజారిటీ ఎగ్జిట్ పోల్స్ అంచనా వేశాయి. కానీ ఎగ్జిట్ పోల్స్ అంచనాలను తలకిందులు చేస్తూ కమలం పార్టీ స్వీప్ చేస్తోంది. 230 స్థానాల్లో ఎన్నికలు జరిగితే 160 చోట్ల బీజేపీ ఆధిక్యంలో కొనసాగుతోంది. మరోవైపు మధ్యప్రదేశ్‌లో ప్రభుత్వ వ్యతిరేకతను అధిగమించి మరీ.. బీజేపీ అధికారం నిలబెట్టుకోవడానికి శివరాజ్ సింగ్ చౌహాన్ సర్కారు ఇచ్చిన హామీలకు తోడు అమలు చేసిన ఓ పథకం కూడా కారణమని.. విశ్లేషకులు చెబుతున్నారు. ఎన్నికల సమయంలో ఓటర్లను ఆకర్షించే దిశగా బీజేపీ అనేక హామీలు ఇచ్చింది. రైతులకు కనీస మద్దతు ధర లభించేలా క్వింటా గోధుమలను రెండు వేల 700 రూపాయలకు, ధాన్యాన్ని 3 వేల 100 రూపాయలకు కొనుగోలు చేస్తామని హామీ ఇచ్చింది. ఆడపిల్లలకు పీజీ వరకూ ఉచిత విద్యను అందిస్తామని మ్యానిఫెస్టోలో ప్రకటించింది. లాడ్లీ బెహ్నా పథకం కింద 450 రూపాయలకే గ్యాస్ సిలిండర్ అందిస్తామన్న కమలం పార్టీ.. ఐదేళ్లపాటు పేదలందరికీ ఉచితంగా రేషన్ అందిస్తామని ప్రకటించింది. 15 లక్షల మంది మహిళలకు నైపుణ్య అభివృద్ధి శిక్షణ అందిస్తామని మ్యానిఫెస్టోలో ప్రకటించింది.

మరోవైపు లాడ్లీ బెహ్నా యోజన కింద నిరుపేద మహిళలకు ప్రతి నెలా 1250 రూపాయల ఆర్థిక సాయం అందించే పథకానికి శివరాజ్ సింగమ్ చౌహాన్ సర్కారు ఇటీవల శ్రీకారం చుట్టింది. ఎన్నికలకు కొద్ది నెలల ముందు ఈ పథకాన్ని ప్రవేశపెట్టారు. దీనిపై విపక్షాల నుంచి తీవ్ర వ్యతిరేకత వ్యక్తమైంది. అధికారాన్ని నిలబెట్టుకోవటం కోసం ఎన్నికల స్టంట్‌లో భాగంగా ఈ పథకాన్ని ప్రారంభించారని కాంగ్రెస్ నేతలు విమర్శించారు. అయితే ఇదే పథకమే బీజేపీకి ఈ సారి కలిసి వచ్చిందనే విశ్లేషణలు వినిపిస్తున్నాయి. ఇదే సమయంలో ఆదివాసీలు సైతం కమలం పార్టీకే జైకొట్టినట్లు తెలుస్తోంది. మరోవైపు తెలంగాణ కాంగ్రెస్ పార్టీ కూడా ఇదే తరహా హామీ ఇచ్చింది. కర్ణాటకలో ఇదే ఫార్ములాతో విజయం సాధించిన గ్రాండ్ ఓల్డ్ పార్టీ.. తెలంగాణలో గృహలక్ష్మి పథకం కింద ఈ హామి ఇచ్చింది. తాము అధికారంలోకి వస్తే నిరుపేద మహిళలకు ప్రతినెలా 2 వేల 500 రూపాయల ఆర్థిక సాయాన్ని అందిస్తామని, ఐదువందలకే గ్యాస్ సిలిండర్ ఇస్తామని ప్రకటించింది. కర్ణాటకలో ఈ హామీ విజయం సాధించటంతో మధ్యప్రదేశ్ సర్కారు కూడా ఇదే తరహా పథకాన్ని అమలు చేయడం ప్రారంభించింది. ప్రస్తుత ఎన్నికల్లో మధ్యప్రదేశ్‌లో బీజేపీకి ఇదే పథకం కలిసి వచ్చినట్లు విశ్లేషణలు వినిపిస్తున్నాయి.