ఎమ్మెల్యేలు, మంత్రులకు కొత్త కార్లు కొనలేం.. పాతవే వాడుకోవాలని సీఎం సూచన

ఇటీవల జరిగిన మిజోరం ఎన్నికల్లో ఘన విజయం సాధించిన జోరం పీపుల్స్‌ మూవ్‌మెంట్‌ పార్టీ అధికారాన్ని చేపట్టింది. కొత్త సీఎంగా ఆ పార్టీ అధ్యక్షుడు లాల్‌దుహోమా బాధ్యతలు చేపట్టారు. ఈ క్రమంలోనే లాల్ దుహోమా కీలక నిర్ణయం తీసుకున్నారు. మిజోరం రాష్ట్ర ఆర్థిక పరిస్థితిని దృష్టిలో ఉంచుకొని.. ప్రజా ధనాన్ని వృథా చేయకుండా కొత్తగా ఎన్నికైన ఎమ్మెల్యేలకుగానీ, మంత్రులకుగానీ కొత్త కార్లు కొనుగోలు చేయకూడదని నిర్ణయం తీసుకున్నారు. గత ప్రభుత్వంలో ఉన్న మంత్రులు, ఎమ్మెల్యేలు ఉపయోగించిన కార్లనే వాడుకోవాలని అందరికీ సూచించారు.

కొత్తగా మళ్లీ కార్లు కొనుగోలు చేయడంతో ప్రజాధనం వృథా అవుతుందని మిజోరం సీఎం అభిప్రాయపడ్డారు. దీంతోపాటు గత ప్రభుత్వంలోని మంత్రులు, ఎమ్మెల్యేలకు కల్పించిన సౌకర్యాలతో పోలిస్తే తాము దాదాపు 50 శాతం తగ్గించుకుంటామని లాల్ దుహోమా స్పష్టం చేశారు. ఇక మిజోరం ప్రభుత్వం రైతు సంక్షేమానికి పెద్దపీట వేస్తుందని తెలిపారు. మిజోరంను అవినీతి రహితంగా మార్చాలని.. అందుకు మంత్రులు, ఎమ్మెల్యేలు, పార్టీ కార్యకర్తలు, స్వచ్ఛంద సంస్థలు పూర్తి స్థాయిలో కృషి చేయాలని లాల్ దుహోమా పిలుపునిచ్చారు. పసుపు, చెరకు, మిరప, వెదురు వంటి పంట ఉత్పత్తులను రైతుల నుంచి ప్రభుత్వమే నేరుగా కొనుగోలు చేసి.. కనీస మద్దతు ధర చెల్లిస్తామని హామీ ఇచ్చారు.

అటు.. పంటలను ప్రభుత్వానికే విక్రయించాలన్న నిబంధనలను ఏమీ లేవని.. ప్రైవేటు వ్యక్తులెవరైనా ఎక్కువ ధర చెల్లిస్తే వారికైనా అమ్ముకోవచ్చని లాల్ దుహోమా స్పష్టం చేశారు. మరోవైపు.. మిజోరం రాష్ట్ర అభివృద్ధి కోసం 12 అంశాలను గుర్తించినట్లు చెప్పారు. వాటిని అమలు చేసేందుకు ఒక ప్రత్యేక కమిటీని కూడా ఏర్పాటు చేస్తున్నట్లు తెలిపారు. ఆ కమిటీలో ప్రభుత్వంతోపాటు గుర్తింపు పొందిన పార్టీ నాయకులు, ఎన్జీవోలు, మత సంఘాలకు, మిజోరం పీపుల్స్‌ ఫోరానికి చెందిన సభ్యులను కూడా భాగస్వాములు చేస్తామని చెప్పారు. పొదుపు చర్యలు, పెట్టుబడుల ఉపసంహరణ, విద్యుత్ సరఫరా వంటి అంశాలను ఈ కమిటీ పర్యవేక్షిస్తుందని వెల్లడించారు.

తమ పార్టీ జడ్‌పీఎం విధివిధానాలకు అనుగుణంగా రాష్ట్ర బడ్జెట్‌ను రూపొందించాలని అన్ని శాఖల అధికారులకు మిజోరం సీఎం లాల్‌దుహోమా ఆదేశించారు. వివిధ శాఖల మంత్రులు బడ్జెట్ రూపకల్పనను పర్యవేక్షించాలని తెలిపారు. అవినీతిని సహించేది లేదని స్పష్టం చేసిన లాల్‌దుహోమా.. రాష్ట్రంలో ఇప్పటికే నమోదైన అవినీతి కేసులపై సీబీఐతో విచారణ జరిపిస్తామని చెప్పారు. గత ప్రభుత్వాలు ఆమోదం తెలిపిన కాంట్రాక్టు పనులు ఇప్పటికే ప్రారంభమైతే.. కాంట్రాక్టర్లు ఎలాంటి ఆందోళన చెందాల్సిన అవసరం లేదని చెప్పారు. పనులు కొనసాగించవచ్చని.. ప్రాజెక్టుల్లో నాణ్యత లోపిస్తే మాత్రం ఎట్టి పరిస్థితుల్లో ఊరుకునేది లేదని హెచ్చరికలు జారీ చేశారు. ప్రభుత్వ ఆఫీసుల్లో సిబ్బంది సమయానికి రావాలని.. బయోమెట్రిక్‌ వ్యవస్థను ఏర్పాటు చేస్తామని చెప్పారు.