ఏపీలో వైసీపీకి మరో షాక్.. ఈసారి గాజువాక నుంచి

ఆంధ్రప్రదేశ్ రాజకీయాలు ఉన్నట్లుండి వేడెక్కాయి. గుంటూరు జిల్లా మంగళగిరి వైసీపీ ఎమ్మెల్యే ఆళ్ల రామకృష్ణారెడ్డి సోమవారం తన పదవికి రాజీనామా చేశారు. ఎమ్మెల్యే పదవితో పాటుగా వైసీపీ సభ్యత్వానికి కూడా ఆయన రాజీనామా చేశారు. రాజీనామాలకు కారణం చెప్పనప్పటికీ 2024 అసెంబ్లీ ఎన్నికల్లో మంగళగిరి సీటు తనకు దక్కకపోవచ్చనే కారణంతోనే రాజీనామా చేసినట్లు తెలుస్తోంది. ఈసారి మంగళగిరి నుంచి బీసీ అభ్యర్థిని బరిలోకి దింపాలని వైసీపీ అధిష్టానం భావిస్తున్నట్లు సమాచారం. ఇదే సమయంలో టీడీపీ నుంచి వైసీపీలోకి చేరిన చిరంజీవి సైతం దూసుకెళ్తున్నారు. దీంతోనే రామకృష్ణారెడ్డి రాజీనామా చేసినట్లు ప్రచారం జరుగుతోంది.

అయితే మంగళగిరి ఎమ్మెల్యే ఆళ్ల రామకృష్ణారెడ్డి రాజీనామా నుంచి తేరుకోకముందే వైఎస్ఆర్ కాంగ్రెస్ పార్టీకి మరో షాక్ తగిలింది. ఈసారి ఉత్తరాంధ్ర నుంచి మరో కీలక నేత రాజీనామా చేశారు. గాజువాక ఎమ్మెల్యే తిప్పల నాగిరెడ్డి కుమారుడు దేవన్ రెడ్డి వైసీపీ పార్టీకి రాజీనామా చేశారు. దేవన్ రెడ్డి ప్రస్తుతం గాజువాక వైఎస్ఆర్సీపీ ఇంఛార్జిగా వ్యవహరిస్తున్నారు. గాజువాక నుంచి ఈసారి బరిలో నిలవాలని దేవన్ రెడ్డి భావిస్తున్నారు. అయితే 2024 ఎన్నికల్లో గాజువాక సీటును బీసీలకు, అందులోనూ యాదవ సామాజికవర్గానికి కేటాయించాలని అధిష్ఠానం నిర్ణయించినట్లు సమాచారం. ఈ నేపథ్యంలోనే ఇంఛార్జి పదవికి రాజీనామా చేసినట్లు తెలుస్తోంది.

మరోవైపు తిప్పల నాగిరెడ్డి 2019 ఎన్నికల్లో గాజువాక నియోజకవర్గం నుంచి ఎమ్మెల్యేగా ఎన్నికయ్యారు. వైసీపీ నుంచి పోటీచేసిన తిప్పల నాగిరెడ్డి జనసేన అధినేత పవన్ కళ్యాణ్‌పై 16వేల 753 ఓట్ల మెజారిటీతో గెలుపొందారు. తిప్పల నాగిరెడ్డి 2009లో జరిగిన అసెంబ్లీ ఎన్నికల్లో గాజువాక నియోజకవర్గం నుండి స్వతంత్ర అభ్యర్థిగా పోటీ చేసి రెండవ స్థానంలో నిలిచారు. అనంతరం వైసీపీలో చేరిన ఆయన.. 2014లో వైసీపీ నుంచి పోటీ చేసి ఓడిపోయారు.అయితే 2019లో మరోసారి వైసీపీ నుంచి పోటీచేసి ఎమ్మెల్యేగా గెలుపొందారు.

అయితే తిప్పల నాగిరెడ్డి తనయుడు తిప్పల దేవన్ రెడ్డి గాజువాక వైసీపీ ఇంఛార్జిగా వ్యవహరిస్తూ పార్టీ కార్యక్రమాల్లో చురుగ్గా పాల్గొంటున్నారు. నియోజకవర్గ వ్యాప్తంగా పార్టీ కార్యక్రమాలను చక్కబెడుతూ వచ్చిన దేవన్ రెడ్డి.. ఈసారి ఎమ్మెల్యే టికెట్ ఆశించారు. అయితే గాజువాక సీటులో ఈసారి యాదవ సామాజిక వర్గానికి చెందిన అభ్యర్థిని నిలపాలని అధిష్టానం భావిస్తున్నట్లు సమాచారం. ఈ కారణంతోనే తిప్పల దేవన్ రెడ్డి రాజీనామా చేసినట్లు సమాచారం. గడిచిన 15 ఏళ్లుగా తమ కుటుంబం పార్టీ కోసం పనిచేసిందని.. అయితే అధిష్టానం నిర్ణయం బాధిస్తున్నట్లు సన్నిహితుల వద్ద దేవన్ రెడ్డి వాపోయినట్లు తెలిసింది.