వైసీపీలో తెలంగాణ టెన్షన్.. 11చోట్ల ఇంఛార్జులను మార్చేసిన సీఎం జగన్..

మరో మూడు నెలల్లో శాసనసభ ఎన్నికలు జరుగుతాయన్న ఊహాగానాల మధ్య ఏపీలో రాజకీయాలు జోరందుకున్నాయి. ఇదే సమయంలో తెలంగాణ ఎన్నికల ప్రభావం కూడా ఏపీపై పడింది. ఈ నేపథ్యంలో పలు చోట్ల సిట్టింగులను మార్చేందుకు సీఎం జగన్ నిర్ణయించినట్లు సమాచారం. అందులో భాగంగా తొలిదశలో 11 నియోజకవర్గాలలో ఇంఛార్జులను మారుస్తూ సీఎం జగన్ సంచలన నిర్ణయం తీసుకున్నారు.

ఇందులో భాగంగా చిలకలూరిపేట నుంచి ప్రాతినిధ్యం వహిస్తున్న వైద్యారోగ్యశాఖ మంత్రి విడదల రజినీని గుంటూరు వెస్ట్‌కు మార్చారు. అదే సమయంలో రాజేష్ నాయడుకు చిలకలూరిపేట ఇంఛార్జిగా నియమించారు. అలాగే మాజీ హోంమంత్రి మేకతోటి సుచరిత స్థానాన్ని కూడా మార్చారు. సుచరితను ప్రత్తిపాడు నుంచి తాడికొండకు మారుస్తూ.. సీఎం జగన్ నిర్ణయం తీసుకున్నారు. ప్రత్తిపాడుకు బాలసాని కిరణ్ కుమార్‌ను ఇంఛార్జిగా నియమించారు. కొండపికి ఆదిమూలపు సురేష్‌ను, వేమూరుకు అశోక్ బాబును ఇంఛార్జిగా నియమించారు. సంతనూతలపాడుకు మేరుగ నాగార్జునను ఇంఛార్జిగా నియమించిన వైసీపీ.. రేపల్లెకు ఈవూరు గణేష్‌ను ఇంఛార్జిగా నియమించింది. అద్దంకి నియోజకవర్గ బాధ్యతలను పాణెం హనిమిరెడ్డికి అప్పగించారు

మరోవైపు మంగళగిరి ఎమ్మెల్యే పదవికి ఆళ్ల రామకృష్ణారెడ్డి రాజీనామా చేసిన నేపథ్యంలో మంగళగిరి నియోజవర్గానికి బీసీ నేత గంజి చిరంజీవిని ఇంఛార్జిగా నియమించారు. అలాగే గాజువాక ఇంఛార్జిగా ఉన్న దేవన్ రెడ్డి కూడా తనపదవికి ఇవాళ రాజీనామా చేశారు. దీంతో ఆయన స్థానంలో రామచంద్రరావుకు ఇంఛార్జిగా బాధ్యతలు అప్పగించారు. మరోవైపు జగన్ ఈ నిర్ణయం తీసుకోవడానికి తెలంగాణ ఎన్నికల ఫలితాలు కూడా కారణంగా తెలుస్తోంది.

తెలంగాణ అసెంబ్లీ ఎన్నికల్లో సీఎం కేసీఆర్ సిట్టింగ్‌లకు టికెట్లు ఇచ్చి దెబ్బతిన్నారు. సిట్టింగ్‌ల మీద ప్రజా వ్యతిరేకతతో బీఆర్ఎస్ పార్టీ ఓటమిపాలైంది.ఈ నేపథ్యంలోనే ఏపీలో ఇలాంటి ఫలితాలు ఎదురుకాకుండా సిట్టింగ్‌లను మార్చాలని సీఎం జగన్ నిర్ణయించినట్లు తెలిసింది. సుమారు 40 నుంచి 50 చోట్ల సిట్టింగ్ ఎమ్మెల్యేలను మార్చే అవకాశాలు కనిపిస్తున్నాయి. అందులో భాగంగా తొలిదశలో 11నియోజకవర్గాలలో ఇంఛార్జులను మార్చుతూ నిర్ణయం తీసుకున్నారు. వైనాట్ 175 అనే నినాదంతో ముందుకెళ్తున్న జగన్.. ఎమ్మెల్యేల స్థానాలను మార్చడం ద్వారా వారిపై ఉన్న ప్రజావ్యతిరేకతను తగ్గించవచ్చని ఆలోచిస్తున్నారు.