మా కొడుకు నిరపరాధి.. న్యాయపోరాటం చేస్తాం: పార్లమెంట్ దాడి మాస్టర్ మైండ్ తండ్రి

పార్లమెంట్‌లో భద్రతా వైఫల్యం ఘటనపై ఢిల్లీలో పోలీసులు విచారణ కొనసాగుతోంది. ఐదుగురు నిందితులు ఐదెంచల భద్రతను ఎలా ఉల్లంఘించి లోపలికి ప్రవేశించారో తెలుసుకోవడానికి యాంటీ టెర్రర్ సెల్ ప్రశ్నిస్తోంది. ఈ దాడికి కోల్‌కతాకు చెందిన లలిత్ ఝా ఈ ప్లాన్ చేసినట్లు అధికారులు భావిస్తున్నారు. అయితే ఝా కుటుంబం మాత్రం అతడి ప్రమేయం లేదని, అవసరమైతే కోర్టును ఆశ్రయించేందుకు సిద్ధమని తేల్చిచెప్పింది. తమ కుమారుడు నిర్దోషని, నా కొడుకు బాధ్యతాయుతమైన పౌరుడని లలిత్ తండ్రి దేవానంద్ ఝా అన్నారు.

‘ఈ సంఘటన గురించి మేము నిన్ననే తెలుసుకున్నాం.. ఇందులో నా కొడుకు ప్రమేయం లేదు.. బ్యాచిలర్ డిగ్రీ పూర్తి చేసి కళాశాలలో ప్రశంసలు అందుకున్నాడు.., బాధ్యతాయుతమైన పౌరుడు’ అని ఉద్ఘాటించారు. ప్రాథమిక విచారణ తర్వాత పోలీసులు ప్రకటన గురించి మాట్లాడుతూ..‘లలిత్‌కు ఎల్లప్పుడూ మా శ్రేయస్సు గురించే ఆందోళన.. నా కొడుకు నేరస్థుడు కాదు.. మేము కోర్టుకు వెళ్తాం.. మీరు నా కొడుకు గురించి గ్రామస్థులను అడిగితే ఎలాంటి వాడో చెబుతారు’అని ఆయన చెప్పారు. లలిత్ ఝా తల్లి తన కుమారుడిని చాలా మంచివాడని అన్నారు. మాకు అర్ధం కావడం లేదని, ఈ విషయం గురించి మాకు ఎటువంటి సమాచారం లేదని ఆమె అన్నారు. తమ కుమారుడు అమాయకుడని తల్లిదండ్రులు అన్నారు.

మరోవైపు, ఈ ఘటనలో నిందితులు తొలుత తమకు తాము నిప్పంటించుకోవడం, కరపత్రాలను విసిరేయడం వంటి ప్రణాళికలూ రూపొందించినట్లు పోలీసులు వెల్లడించారు. కానీ, చివరకు ఆ ప్రయత్నాలను విరమించి, బుధవారం అమలు చేసిన ప్లాన్‌తో ముందుకెళ్లినట్లు తెలిపారు. విచారణలో భాగంగా నిందితులు ఈ విషయాలను వెల్లడించినట్లు చెప్పారు. అటు, నిందితులకు విజిటర్ పాసులు జారీ చేసిన బీజేపీ ఎంపీ ప్రతాప్ సింహా వాంగ్మూలాన్ని కూడా పోలీసులు నమోదు చేయాలని యోచిస్తోన్నట్లు సమాచారం. న

కాగా, నలుగురు నిందితులు ఏడు స్మోక్ క్యాన్లతో ఘటనను నిర్వహించేందుకు వచ్చారని ఢిల్లీ పోలీసు వర్గాలు ఏఎన్ఐ మీడియాకు తెలిపాయి. స్మోక్ స్ప్రే ఘటనకు కుట్ర పన్నిన నిందితులు.. గూగుల్‌లో పార్లమెంటు పరిసర ప్రాంతాలను శోధించారని, అక్కడ భద్రతకు సంబంధించిన పాత వీడియోలను కూడా కలిగి ఉన్నారని విచారణలో వెల్లడైంది. అంతేకాదు, పోలీసులు గుర్తించలేని విధంగా సేఫ్ చాట్‌లు ఎలా నిర్వహించాలో కూడా నిందితులు గూగుల్‌లో వెతికడం గమనార్హం. తాము పట్టుబడకుండా ఉండేలా సిగ్నల్ యాప్‌లో మాట్లాడుకునేవారని పోలీసు విచారణలో తేలింది.