పవన్ కళ్యాణ్‌పై జగన్ వ్యాఖ్యలు.. బర్రెలక్క కౌంటర్

ఆంధ్రప్రదేశ్ రాజకీయాల్లో తెలంగాణకు చెందిన బర్రెలక్క ప్రస్తావన తెరపైకి వచ్చింది. ఇటీవల శ్రీకాకుళం జిల్లా పర్యటనకు వెళ్లిన సీఎం జగన్ పవన్ కళ్యాణ్ టార్గెట్‌గా విమర్శలు చేశారు. తెలంగాణ అసెంబ్లీ ఎన్నికల్లో బర్రెలక్క కంటే జనసేనకు తక్కువ ఓట్లు వచ్చాయంటూ సెటైర్లు పేల్చారు. ఆ తర్వాత జనసేన, వైఎస్సార్‌సీపీల మధ్య మాటల యుద్ధం జరిగింది. అయితే ఈ క్రమంలో ఈ ఎపిసోడ్‌‌పై బర్రెలక్క స్పందించారు.. ఓ కార్యక్రమానికి హాజరైన ఆమె ఈ కామెంట్స్ చేశారు. ఎవరి పార్టీ వారిది, ఎవరి రాజకీయ జీవితం వారిది అన్నారు బర్రెలక్క. పవన్ కళ్యాణ్‌ను తక్కువచేసి మాట్లాడటం బాధగా అనిపించిందని.. 'ఆయన పవర్ ఆయనది.. నా పవర్ నాది' అన్నారు. తాను కూడా ఆయన అభిమానిని అని చెప్పుకొచ్చారు.. ఆయన ఎంత మంచోడో జనాలకు తెలుసని.. ఆయనను తక్కువ చేసి మాట్లాడట కోసం.. తనతో పోల్చడం బాధగా ఉందన్నారు. పవన్ కళ్యాణ్ గ్రేట్ పర్సన్.. ఆయనను అభిమానిస్తున్నట్లు చెప్పారు. ఆయనను మైనస్ చేయడం కోసం తన ప్రస్తావన తీసుకురావడం సరికాదన్నారు. ఈ వీడియోను జనసైనికులు వైరల్ చేస్తున్నారు.. ముఖ్యమంత్రి జగన్ చేసిన కామెంట్స్‌కు బర్రెలక్క కౌంటర్ ఇదే అని వ్యాఖ్యానిస్తున్నారు.

శ్రీకాకుళం జిల్లా పలాసలో జరిగిన కార్యక్రమంలో ముఖ్యమంత్రి పవన్ కళ్యాణ్‌పై సెటైర్లు పేల్చారు. దత్తపుత్రుడికి తెలంగాణలో బర్రెలక్క కంటే తక్కువ ఓట్లు వచ్చాయంటూ ఎద్దేవా చేశారు. తెలంగాణ ఎన్నికల్లో జనసేన పార్టీ పోటీ చేస్తే కనీసం డిపాజిట్లు కూడా సాధించలేకపోయిందన్నారు. కనీసం కొల్లాపూర్‌‌లో బర్రెలక్కకు వచ్చినన్ని ఓట్లు కూడా తెచ్చుకోలేకపోయారన్నారు. తెలంగాణ అసెంబ్లీ ఎన్నికల సమయంలో పవన్ వ్యాఖ్యలు వింటే ఆశ్చర్యం కలిగిందని.. తెలంగాణలో పుట్టనందుకు పవన్ బాధపడుతున్నారట అంటూ సెటైర్లు పేల్చారు. సీఎం జగన్ చేసిన వ్యాఖ్యలకు జనసేన పార్టీ కూడా కౌంటరిచ్చింది. బర్రెలక్క సంగతి సరే.. 2014లో జరిగిన తెలంగాణ అసెంబ్లీ ఎన్నికల్లో వైఎస్సార్‌సీపీకి ఎన్ని ఓట్లు వచ్చాయని లెక్కలతో సహా ట్వీట్ చేశారు. కొల్లాపూర్ నుంచి పోటీ చేసిన వైఎస్సార్2సీపీ అభ్యర్థికి కేవలం 1240 ఓట్లు వచ్చాయని ఎద్దేవా చేశారు. బర్రెలక్కకు అన్ని ఓట్లు వస్తే.. వైఎస్సార్‌సీపీ అభ్యర్థికి ఎన్నో కూడా చెబితే బావుంటుందన్నారు. పక్క రాష్ట్రం గురించి కాకుండా ఏపీలో పనికొచ్చే పనులకు సమయం కేటాయిస్తే మంచిందని కౌంటర్ ఇచ్చారు. బర్రెలక్కుకు ఇండిపెండెంట్‌గా పోటీ చేసే దమ్ము ఉందని.. తెలంగాణలో పోటీచేసే దమ్ము జగన్‌కు, వైఎస్సార్‌సీపీ లేదంటూ ధ్వజమెత్తారు. 2014 తెలంగాణ అసెంబ్లీ ఎన్నికల్లో పోటీచేసిన వైఎస్సార్‌సీపీకి 56 స్థానాల్లో నోటాకు వచ్చినన్ని ఓట్లు కూడా రాలేదని సెటైర్లు పేల్చారు. ఇలా వార్ నడుస్తున్న సమయంలో బర్రెలెక్క ఈ కామెంట్స్‌పై స్పందించారు.