జనసేన నుండి బరిలోకి సినీ నిర్మాత
Andhra Pradesh Telugu | Suryaa Desk | Published : Wed, Dec 20, 2023, 01:56 PM
ప్రముఖ నిర్మాత, ప్రముఖ నిర్మాణ సంస్థ గీత ఆర్ట్స్ లో అల్లు అరవింద్ తో పాటు పలు చిత్రాలు నిర్మించిన బన్నీ వాసు ఈసారి ప్రత్యక్ష రాజకీయాల్లోకి రావటం ఖాయం అనిపిస్తోంది. కొన్ని రోజుల క్రితం జనసేన అధినేత పవన్ కళ్యాణ్, నిర్మాత బన్నీ వాసుకి పార్టీ ప్రచార బాధ్యతలు అప్పగించిన సంగతి తెలిసిందే. బన్నీవాసుకి జనసేన పార్టీ కి అనుబంధం ఇప్పటిది కాదు. జనసేన ఆవిర్భావం నుండి బన్నీ వాసు, జనసేన అధ్యక్షులు పవన్ కళ్యాణ్ తో చాలా దగ్గరగా పని చేస్తూ వస్తున్నారు. అయితే ఎప్పుడూ ప్రత్యక్షంగా అతను పని చేస్తున్నట్టు ప్రచారాల్లో గానీ, బయటివాళ్ళకి గానీ తెలియదు. కానీ పార్టీ కి బన్నీవాసు పనిచేస్తూ తన సూచనలు, సలహాలు ఇస్తూ వుంటారు. పవన్ కళ్యాణ్ కి అత్యంత సన్నిహితుల్లో బన్నీవాసు ఒకరు అని, వారానికి రెండు రోజులు పూర్తిగా ఆంధ్రలో పర్యటనకోసమే వినియోగిస్తూ ప్రజల దగ్గర నుండి సేకరించిన సమాచారం నేరుగా పవన్ కళ్యాణ్ కి ఈరోజు వరకూ ఇస్తూ ఉంటారని అంటారు. మామూలుగా అయితే బన్నీ వాసు తన స్వగ్రామం అయిన పాలకొల్లు నుండి పోటీ చేస్తారు అని అనుకుంటూ వుంటారు, కానీ ఇప్పుడు సామాజిక మాధ్యమంలో మాత్రం పిఠాపురం నుండి ఉదయ శ్రీనివాస్ (బన్నీ వాసు) పేరు వినిపిస్తోంది. జనసేన, తెలుగుదేశం పొత్తు పెట్టుకొని పోటీ చేస్తున్నాయి కాబట్టి, కొన్ని నియోజకవర్గాలు మారే అవకాశం ఉన్నందున బన్నీ వాసుకి పిఠాపురం వచ్చినట్టుగా చెపుతున్నారు.
|
|