ఇంట్లో తల్లికి, చెల్లికి విలువ ఇవ్వని సీఎం మనకెందుకు,,,, పవన్

తన ఇంట్లో తల్లికి, చెల్లికి విలువ ఇవ్వని ముఖ్యమంత్రి మనకెందుకు అని జనసేన అధ్యక్షుడు పవన్ కళ్యాణ్ అన్నారు. ‘మార్చాల్సింది ఎమ్మెల్యేలను కాదు.. ముఖ్యమంత్రిని’ అంటూ వైఎస్సార్‌ కాంగ్రెస్ పార్టీ పాలనను ఉద్దేశించి ఘాటు వ్యాఖ్యలు చేశారు. మార్పు తీసుకొస్తాం - వచ్చే ఎన్నికల్లో వైఎస్ జగన్‌ను ఇంటికి పంపిస్తామని పవన్ అన్నారు. బుధవారం (డిసెంబర్ 20) విజయనగరం జిల్లా నెల్లిమర్లలోని పోలిపల్లి వద్ద టీడీపీ నిర్వహించిన ‘యువగళం - నవశకం’ బహిరంగ సభలో జనసేనాని ప్రసంగించారు. ఈ సభకు తెలుగు దేశం పార్టీ, జనసేన పార్టీల నేతలు, కార్యకర్తలు పెద్ద సంఖ్యలో తరలివచ్చారు.

జగన్‌ను ఇంటికి పంపించాలంటే, ఓట్లు చీలిపోకూడదని.. ఓట్లు చీలొద్దనే టీడీపీతో పొత్తుకు సిద్ధమయ్యామని పవన్ కళ్యాణ్ చెప్పారు. ‘బీజేపీ కూడా దీన్ని అర్థం చేసుకొని ఆశీస్సులు అందిస్తుందని భావిస్తున్నా’ అని ఆయన అన్నారు. టీడీపీతో పొత్తు తప్ప మరో ప్రత్యామ్నాయం లేదని కేంద్రంలోని బీజేపీ పెద్దలకు వివరించానని పవన్ తెలిపారు. ‘మరోసారి వైసీపీ ప్రభుత్వం వస్తే, నాతో సహా అందరూ.. వైసీపీ గూండాలను ఎదుర్కోవడానికి కర్రో, కత్తో పట్టుకోవాల్సి వస్తుందని కేంద్రంలోని పెద్దలకు, అమిత్ షాకు చెప్పాను’ అని పవన్ కళ్యాణ్ అన్నారు. పొత్తు సాధ్యమైనంత ఎక్కువ కాలం ఉండాలని ఆశిస్తున్నట్లు పవన్ కళ్యాణ్ తెలిపారు.

బుగ్గలు నిమిరే యాత్ర కాదు..!

యువగళం పాదయాత్ర.. జగన్‌ మాదిరిగా బుగ్గలు నిమిరే యాత్ర కాదంటూ ఎద్దేవా చేశారు పవన్ కళ్యాణ్. ‘నేను నడుద్దామంటే నడిచే పరిస్థితి లేదు. పాదయాత్ర వల్ల చాలా మంది కష్టసుఖాలు తెలుసుకోవచ్చు. అలాంటి అవకాశం నాకు రానందుకు బాధపడుతున్నా. లోకేష్ దిగ్విజయంగా పూర్తి చేసినందుకు ఆనందంగా ఉంది. ఇది మాటల యాత్ర కాదు. చేతల యాత్ర’ అని పవన్ అన్నారు.

టీడీపీ కష్టాల్లో ఉన్నప్పుడు అండగా నిలిచా..

చంద్రబాబు నాయుడిని జైల్లో పెట్టినప్పుడు చాలా బాధ కలిగిందని పవన్ కళ్యాణ్ అన్నారు. సాటి మనిషి కష్టాల్లో ఉన్నప్పుడు అండగా ఉంటానని చెప్పిన పవన్.. టీడీపీ కార్యకర్తలు, చంద్రబాబు కుటుంబసభ్యులు కష్టంలో ఉన్నప్పుడు మద్దతు ఇచ్చానని గుర్తుచేశారు. ‘నేను మాటకు, మైత్రికీ చాలా విలువ ఇస్తాను. కష్టాలు వస్తే, ఒంటరితనం ఎలా ఉంటుందో తెలిసినవాణ్ని’ అని పవన్ అన్నారు.

‘4 దశాబ్దాల సుదీర్ఘ రాజకీయ అనుభవం ఉన్న వ్యక్తిని, జాతీయ స్థాయిలో ఎన్డీఏ పక్షానికి బాధ్యత వహించిన వ్యక్తిని జైల్లో పెట్టడం చాలా బాధ కలిగించింది. జగన్‌ చేసిన తప్పులకు సోనియా గాంధీ.. ఆయణ్ని జైల్లో పెట్టించారు. ఆ కక్షతో చంద్రబాబును జైల్లో పెట్టించడం దారుణం’ అని పవన్ కళ్యాణ్ అన్నారు.

‘అప్పట్లో ఒక దశాబ్ద కాలం పాటు అండగా నిలుద్దామని భావించాను. దురదృష్టవశాత్తు అభిప్రాయ భేదాల వల్ల 2019లో ముందుకు తీసుకెళ్లలేకపోయాను. ఆ లోటు తాలూకు ఫలితమే జగన్ ప్రభుత్వం వచ్చింది. దశాబ్ద కాలంపాటు సుదీర్ఘ రాజకీయ నేత కావాలని భావించాను. దురదృష్టవశాత్తు మిస్ అయ్యాం. 2024లో మనం ప్రభుత్వం స్థాపిస్తున్నాం. మార్పు తెస్తున్నాం. జగన్‌ను ఇంటికి పంపిద్దాం. చంద్రబాబు, నేను కలిసి రానున్న రోజుల్లో భారీ సభ ఏర్పాటు చేసి ఉమ్మడి మ్యానిఫెస్టో విడుదల చేస్తాం’ అని పవన్ కళ్యాణ్ అన్నారు.