141 మంది ప్రతిపక్ష ఎంపీల సస్పెన్షన్.. 3 కొత్త న్యాయ చట్టాలకు లోక్‌సభ ఆమోదం

బ్రిటీష్ కాలం నాటి న్యాయ చట్టాలకు చరమ గీతం పాడుతూ తీసుకువచ్చిన 3 కొత్త క్రిమినల్ చట్టాల బిల్లులు లోక్‌సభలో ఆమోదం పొందాయి. ఇండియన్ పీనల్ కోడ్ - ఐపీసీ, క్రిమినల్ ప్రొసీజరల్ కోడ్ - సీఆర్‌పీసీ, సాక్ష్యాల చట్టం - ఎవిడెన్స్‌ యాక్ట్‌ స్థానంలో కేంద్రంలో అధికారంలో ఉన్న నరేంద్ర మోదీ సర్కార్ తీసుకువచ్చిన 3 కొత్త న్యాయ చట్టాలు లోక్‌సభలో ఆమోదం పొందాయి. భారతీయ న్యాయ సంహిత, భారతీయ నాగరిక్‌ సురక్షా సంహిత, భారతీయ సాక్ష్య చట్టం పేరుతో కేంద్ర హోం శాఖ మంత్రి అమిత్ షా ప్రవేశపెట్టిన బిల్లులకు లోక్‌సభ బుధవారం ఆమోదం తెలిపింది. ఈ 3 బిల్లులపై దిగువ సభలో చర్చ జరిగిన తర్వాత మూజువాణి ఓటుతో సభ్యులు ఆమోదం తెలిపారు.

ఈ బిల్లులపై కేంద్ర హోం శాఖ మంత్రి అమిత్ షా బుధవారం లోక్‌సభలో ప్రసంగించారు. ఇకపై మూకదాడి ఘటనల్లో దోషిగా తేలిన వారికి మరణశిక్ష విధించే నిబంధన ఈ బిల్లుల్లో ఉందని తెలిపారు. ఇక స్వాతంత్ర సమరయోధులను జైలులో పెట్టడానికి బ్రిటీష్ వారు తీసుకువచ్చిన దేశ ద్రోహ చట్టాన్ని తొలగించాలని కేంద్ర ప్రభుత్వం నిర్ణయించినట్లు కేంద్రమంత్రి అమిత్ షా ప్రకటించారు. ఈ కొత్త బిల్లులు.. శిక్షకు బదులుగా న్యాయంపై దృష్టి సారించేలా దేశంలో నేర న్యాయ వ్యవస్థను పునరుద్ధరించాలని కేంద్ర ప్రభుత్వం లక్ష్యంగా పెట్టుకుందని వెల్లడించారు.

భారతీయ న్యాయ సంహిత బిల్లు-2023, భారతీయ నాగరిక్ సురక్ష సంహిత బిల్లు-2023, భారతీయ సాక్ష్య బిల్లు-2023 లను తొలిసారిగా కేంద్ర ప్రభుత్వం ఈ ఏడాది పార్లమెంటు వర్షాకాల సమావేశాల్లో ప్రవేశపెట్టింది. ప్రస్తుతం జరుగుతున్న శీతాకాల సమావేశాల్లో ఆ 3 బిల్లులను ఉపసంహరించుకుని.. వాటిలో సవరణలు తీసుకువచ్చి మరోసారి ప్రవేశపెట్టారు. ఈ 3 కొత్త న్యాయ చట్టాలు పోలీసుల జవాబుదారీతనాన్ని బలోపేతం చేసే వ్యవస్థగా తీసుకువస్తామని అమిత్ షా లోక్‌సభలో స్పష్టం చేశారు. ఏదైనా కేసులో అరెస్ట్ అయిన వ్యక్తులు గురించి వివరాలు ఇప్పుడు ప్రతీ పోలీస్ స్టేషన్‌లో నమోదు చేయాలని ఆ రికార్డులను నిర్వహించే బాధ్యత ఆ స్టేషన్ పోలీస్ అధికారిదే అని తెలిపారు. ఇక అక్రమ రవాణా చట్టాలను లింగ తటస్థంగా మార్చిందని చెప్పారు. 18 ఏళ్ల లోపు బాలికలపై అత్యాచారం చేస్తే.. కొత్త చట్టాల ప్రకారం పోక్సో చట్టానికి సమానమైన నిబంధనలు వర్తిస్తాయని అమిత్ షా వెల్లడించారు.