సీఎం జగన్ బర్త్ డే,,,,విష్ చేసిన ప్రధాని మోదీ, చంద్రబాబు, పవన్

సీఎం జగన్ పుట్టిన రోజు సందర్భంగా డిసెంబర్ 21న రాష్ట్రం మొత్తం పండుగ వాతావరణం కనిపించింది. వైఎస్సార్సీపీ శ్రేణులు తమ అభిమాన నేత పుట్టిన రోజు వేడుకలను ఘనంగా నిర్వహించాయి. ఎక్కడికక్కడ ఫ్లెక్సీలతోపాటు న్యూస్ పేపర్లలో ప్రకటనల ద్వారానూ జగన్‌కు విషెస్ తెలిపారు. అల్లూరి సీతారామరాజు జిల్లా పాడేరు నియోజకవర్గంలోని చింతపల్లి ప్రభుత్వ పాఠశాలల విద్యార్థుల మధ్య సీఎం జగన్ తన పుట్టిన రోజు జరుపుకొన్నారు. జగన్ పుట్టిన రోజు సందర్భంగా వైఎస్సార్సీపీ నేతలే కాకుండా ప్రధాని మోదీ, టీడీపీ అధినేత చంద్రబాబు నాయుడు, జనసేన అధినేత పవన్ కళ్యాణ్ తదితరులు శుభాకాంక్షలు తెలిపారు. మిగతా రోజుల్లో ఎన్ని మాటలు అనుకున్నా.. ఒకరిపై మరొకరు విమర్శలతో విరుచుకుపడినా.. పుట్టిన రోజున మాత్రం విమర్శలు, ఆరోపణల జోలికెళ్లకుండా శుభాకాంక్షలు చెప్పాలనే సంప్రదాయాన్ని ఈ నేతలు పాటించారు.

అయితే టీడీపీ సీనియర్ నేత అయ్యన్నపాత్రుడు మాత్రం తనదైన శైలిలో జగన్‌కు బర్త్ డే విషెస్ తెలిపారు. సీఎం జగన్ గారికి జన్మదిన శుభాకాంక్షలు.. మీకు ఆయురారోగ్యాలు కలగలంటూ తన పోస్టును ప్రారంభించిన అయ్యన్న.. సీఎం హోదాలో మీకు ఇదే చివరి బర్త్ డే అన్నారు. మరో 3-4 నెలల్లో మీరు మాజీ సీఎం అవ్వబోతున్నారంటూ ఆయన జోస్యం చెప్పారు. అయితే అయ్యన్న అక్కడితో ఆగిపోలేదు. ‘‘ఈ విషయం మీకూ పూర్తిగా అర్ధం అయినట్లు ఉంది. అందుకే ఒక్కరోజులో మీ పుట్టినరోజు ప్రకటనల పేరుతో సొంత పత్రిక కోసం రూ.100 కోట్లు కొల్లగొట్టారు. నిబంధనలకు విరుద్ధంగా ప్రభుత్వ శాఖల నుంచి కోట్లు కుమ్మరించి శుభాకాంక్షలకు ప్రకటనలా? ప్రైవేటు సంస్థలను బెదిరించి మరీ యాడ్స్ పేరుతో వసూలు చేస్తారా? పుట్టిన రోజు నాడూ అబద్ధాలు చెప్పడమే మీ నైజమా? బర్త్ డే పేరుతో ఒక్క రోజులో 100 కోట్లు కొట్టేసిన ఏకైక సీఎం మీరే. పుట్టిన రోజును సైతం ఆర్థిక ఉగ్రవాదానికి వేదికగా చేసుకుంటారు కాబట్టే.. ముఖ్యమంత్రి గా మీకు ఇది చివరి పుట్టిన రోజు అవుతుంది. అక్రమ పద్దతిలో, అధికారిక దోపిడీలో మీకు మీరే సాటి. రాష్ట్రం మాత్రం లూటీ’’ అంటూ అయ్యన్న తన పోస్టును కొనసాగించారు.

దీంతో జగన్ అభిమానులు, వైఎస్సార్సీపీ శ్రేణులు అయ్యన్నపాత్రుడిపై ఆగ్రహం వ్యక్తం చేస్తున్నారు. విషెస్ వరకే పరిమితమై బాగుండేదని.. అంతకు మించి మాట్లాడావ్ అంటూ తమదైన శైలిలో టీడీపీ నేతపై విరుచుకుపడుతున్నారు. బూతులతో కామెంట్లు చేస్తూ అయ్యన్నకు మనశ్శాంతి కరువు చేసే ప్రయత్నం చేశారు. అయినా పుట్టిన రోజునాడు కుదిరితే అభినందిస్తూ ఓ ట్వీట్ వేసి.. ఆ తర్వాత రోజున ఇవన్నీ పోస్టు చేసుకోవచ్చు కదా. అయ్యన్న ఇలా పోస్టు చేయకుండా ఉండాల్సిందని టీడీపీ అభిమానులే అనుకునేలా ఆయన విషెస్ ఉన్నాయి. బహుశా ఇంత వరకూ ఏ రాజకీయ నాయకుడికి మరే రాజకీయ నాయకుడు ఇలా విషెస్ చెప్పలేదేమో. ఆ మాటకొస్తే ఇలా విషెస్ చెప్పకపోతేనే బెటర్.