జనసేనలో చేరిన వైసీపీ ఎమ్మెల్సీ వంశీకృష్ణ యాదవ్,,,ఇది ఆరంభం మాత్రమే.. త్వరలో మరిన్ని చేరికలు

వైఎస్సార్ కాంగ్రెస్ పార్టీ ఎమ్మెల్సీ, విశాఖపట్నం నాయకుడు చెన్నుబోయిన వంశీకృష్ణ యాదవ్.. జనసేన పార్టీలో చేరారు. మంగళగిరిలో జనసేన ప్రధాన కార్యాలయంలో బుధవారం (డిసెంబర్ 27) జరిగిన కార్యక్రమలో పవన్ కళ్యాణ్ సమక్షంలో వంశీకృష్ణ యాదవ్ తన అనుచరులతో కలిసి జనసేన పార్టీలో చేరారు. పవన్ కళ్యాణ్ వారికి జనసేన కండువాలు కప్పి సాదరంగా పార్టీలోకి ఆహ్వానించారు. ఈ సందర్భంగా చెన్నుబోయిన వంశీకృష్ణ యాదవ్‌తో తనకున్న అనుబంధాన్ని పవన్ కళ్యాణ్ గుర్తుచేసుకున్నారు.

ప్రజారాజ్యం పార్టీలో ఉన్నప్పుడు యువరాజ్యం విభాగం తరఫున వంశీకృష్ణ యాదవ్‌ తనతో కలిసి పనిచేశారని, కలిసి రాజకీయ ప్రయాణ చేశారని పవన్ కళ్యాణ్ అన్నారు. అలాంటి వంశీకృష్ణ తిరిగి జనసేనలోకి రావడం సొంత ఇంటికి రావడం లాంటిదేనన్నారు. ఇది ఆరంభం మాత్రమేనన్న పవన్ కళ్యాణ్.. భవిష్యత్తులో తమ పార్టీలో మరిన్ని చేరికలు ఉంటాయని తెలిపారు. ‘ఆంధ్రప్రదేశ్ రాష్ట్ర భవిష్యత్తే జనసేన పార్టీ లక్ష్యం. ఉన్నతమైన దశలో రాష్ట్రాన్ని నిలబెట్టే ప్రక్రియలో జనసేన పార్టీ కీలక భూమిక పోషిస్తుంది. వైసీపీ పాలనలో ఎలాంటి అభివృద్ధి జరిగిందో తెలుసుకొని మళ్లీ తిరిగి వస్తున్నారు. ఉత్తరాంధ్రలో జనసేన పార్టీ బలోపేతం అవుతోంది’ అని పవన్ కళ్యాణ్ అన్నారు.

‘వంశీకృష్ణ యాదవ్‌ మా పార్టీలోకి వస్తున్న సమయంలో వైసీపీపై ఎలాంటి వ్యాఖ్యలు చేయలేదు. జనసేన భావజాలం నచ్చి పార్టీలోకి వస్తున్నానని చెప్పడం నన్ను ఆకట్టుకుంది. ఆయణ్ని ఒక నియోజకవర్గానికి సంబంధించిన నాయకుడిగా చూడటంలేదు. ఆయన రాష్ట్ర నాయకుడిగా ఎదగాలి’ అని పవన్ కళ్యాణ్ అన్నారు. వంశీకృష్ణ యాదవ్‌ నామినేటెడ్ ఎమ్మెల్సీ కాదని, స్థానిక సంస్థల ఎమ్మెల్సీ ఎన్నికల్లో గెలిచి ఎన్నికైన వ్యక్తి అని జనసేన రాజకీయ వ్యవహారాల కమిటీ ఛైర్మన్ నాదెండ్ల మనోహర్ గుర్తుచేశారు. సుదీర్ఘ అనుభవం ఉన్న వ్యక్తి అని, అందరికీ అందుబాటులో ఉంటూ సేవలు అందించారని కొనియాడారు. జనసేన పార్టీ బలోపేతం కోసం పనిచేస్తారని చెప్పారు. వచ్చే ఎన్నికల్లో వంశీకృష్ణ యాదవ్.. విశాఖ నగరంలోని ఒక అసెంబ్లీ స్థానం నుంచి పోటీ చేసే అవకాశం ఉన్నట్లు తెలుస్తోంది.