మహిళ చేసిన పనికి గుక్కపెట్టి ఏడ్చిన మగ కండక్టర్

తెలంగాణలో అమలవుతోన్న మహిళలకు ఉచిత బస్సు ప్రయాణం పథకానికి విశేష స్పందన లభిస్తోంది. ఎప్పుడూ లేనంతగా 100 శాతం ఆక్సుపెన్సీ వస్తోందంటే.. మహిళా ప్రయాణికులు ఈ పథకాన్ని ఎంత వినియోగించుకుంటున్నారో అర్థం చేసుకోవచ్చు. అయితే.. ఈ పథకం మహిళలకు ఎంత సౌకర్యంగా ఉందో.. అటు మగవారికి, కండక్టర్లకు అంత తలనొప్పులు తెచ్చిపెడుతోంది. ఇటీవలే.. ఫుట్‌బోర్డుపై ఉన్న ప్రయాణికురాలిని లోపలికి రావాలనందుకు లేడీ కండక్టర్‌ను ఇష్టమున్నట్టు దూషించింది. దాంతో.. ఆ కండక్టరమ్మ తీవ్ర మనస్థాపంతో బస్సు దిగి ఏడుస్తూ కూర్చుండిపోయింది. మరోదగ్గర.. ప్రయాణికులను ఎక్కించుకున్నందుకు ఆటో డ్రైవర్లు.. బస్సు డ్రైవర్, కండక్టర్ మీద దాడి చేశారు. ఇంకో చోట గుర్తింపు కార్డు అడిగినందుకు ఘర్షణకు దిగి బస్సు అద్దాలు ధ్వంసం చేశారు. ఈ ఘటనలపై ఇప్పుటికే.. ఆర్టీసీ ఎండీ సజ్జనార్ ఆగ్రహం వ్యక్తం చేశారు. ఆర్టీసీ సిబ్బందిని దూషించినా, వారిపై దాడికి పాల్పడినా సహించేది లేదని.. ప్రయాణికులు సహకరించాలని సూచించారు. కాగా.. ఇప్పుడు ఓ మహిళా ప్రయాణికురాలు చేసిన పనికి ఓ మగ కండక్టర్ వెక్కి వెక్కి ఏడుస్తున్న వీడియో ఇప్పుడు సోషల్ మీడియాలో తెగ వైరల్ అవుతోంది.

ఇంతకీ ఆ కండక్టర్ ఎందుకు అంతగా ఏడ్చాడంటే.. ఓ మహిళా ప్రయాణికురాలు బస్సు ఎక్కింది. అయితే.. తనతో పాటు ఓ బాబు కూడా ఎక్కాడు కానీ.. ఆ బాబును తన లంగాలో దాచేసి.. ఆఫ్ టికెట్ తీసుకోకుండా తప్పించుకుంది. ఆమెతో ఎక్కిన బాబును ఆ కండక్టర్ గమనించకపోవటంతో.. తాను కూడా సైలెంట్‌గా ఊరుకున్నాడు. ఇంతలోనే.. మార్గ మధ్యలో చెకింగ్ ఆఫీసర్లు బస్సును తనిఖీ చేశారు. చెక్ చేసే క్రమంలో మహిళతో పాటు బాబు కూడా కనిపించగా.. ఆ అబ్బాయికి టికెట్ తీసుకోలేదు. ఆ అబ్బాయికి టికెట్ ఎందుకు తీసుకోలేదంటే.. కండక్టర్ ఇవ్వలేదని ఆమె చెప్పింది. దీంతో.. ఆ కండక్టర్ ఒక్కసారిగా అవాక్కయ్యాడు. ఎందుకు ఇవ్వలేదని కండక్టర్‌ను ఆరా తీయగా.. అతను వెక్కి వెక్కి ఏడ్వటం మొదలు పెట్టాడు.

టికెట్ తీసుకోకుండా బాబును లంగాలో దాచిపెట్టిందని.. నేనేం చేయాలి అంటూ ఆఫీసర్ల ముందు ఆ కండక్టర్ బోరున ఏడ్చేశాడు. మీరంటేనే నాకు భయం అంటూ చిన్నపిల్లాడిలా గుక్కపెట్టి ఏడ్చాడు. దీంతో చేసేదేమీలేక.. ఇది మొదటిసారే కాదా.. ఏమన్నట్లేం నువ్వు ఏడవకంటూ కండక్టర్‌ను బుజ్జగించారు. అయితే.. బస్సులో ఉన్నవాళ్లు ఈ సన్నివేశాన్ని వీడియో తీసి.. సోషల్ మీడియాలో పెట్టగా.. అది కాస్త ఇప్పుడు వైరల్ అవుతోంది. అయితే.. ఈ ఘటన ఎక్కడ జరగిందన్నది తెలియాల్సి ఉంది. అయితే.. ఆ కండక్టర్ మాట్లాడే యాసను బట్టి.. ఇది ఆంధ్రప్రదేశ్‌లో జరిగినట్టుగా తెలుస్తోంది. ఆ కండక్టర్ ఏడవటం చూసి.. నెటిజన్లు రకరకాలుగా స్పందిస్తున్నారు. ఆఫ్ టికెట్ తప్పించుకునేందుకు ఇంత దిగజారుతారా.. ఓ కండక్టర్ ఉద్యోగాన్నే రిస్కులో పడేస్తారా.. ఇంత ఘోరమా అంటూ కొందరు ఆ కండక్టర్ మీద జాలి చూపిస్తూ, మహిళను తిట్టిపోస్తున్నారు. మరోవైపు.. ఆ కండక్టర్ ఏడుపు చూసి నవ్వుకుంటున్నారు మరికొందరు నెటిజన్లు.