ప్రధాని మోదీకి పవన్ కళ్యాణ్ లేఖ.. టార్గెట్ జగన్ సర్కార్, సీబీఐతో విచారణ చేయాలని!

జనసేన అధినేత పవన్ కళ్యాణ్ ప్రధాని నరేంద్ర మోదీకి లేఖ రాశారు. ఆంధ్రప్రదేశ్‌‌లో వైఎస్సార్‌సీపీ ప్రభుత్వ హయాంలో గృహ నిర్మాణాల్లో జరిగిన అత్యంత భారీ అవినీతిపై దృష్టి సారించి.. వెంటనే సీబీఐతో విచారణ చేయించాలని కోరారు. పేదలకు సొంతిల్లు పేరుతో కేవలం స్థలాలను సేకరించడం కోసం వైసీపీ ప్రభుత్వం రూ.35,141 కోట్ల నిధులను వెచ్చించిందని.. ఇందుకు సంబంధించి ఖర్చు చేసిన నిధుల్లో గోల్‌ మాల్‌ జరిగిందన్నారు. భారీగా నిధులు పక్కదారి పట్టాయని.. పేదలకు సంబంధించి ఇళ్ల నిర్మాణ ప్రాజెక్టు వ్యయం రూ.1,75,421 కోట్లు అయితే.. ప్రభుత్వం మాత్రం రూ.91,503 కోట్లుగా చెబుతోందన్నారు. ఈ అంశంలో అనేక సందేహాలున్నాయన్నారు.

ఇళ్ల విషయంలో ప్రభుత్వం పేదలను మోసం చేయడమే కాకుండా.. ప్రజాధనాన్ని పూర్తిగా దోపిడీ చేసినట్లుగా కనిపిస్తోందన్నారు. ఆంధ్రప్రదేశ్‌‌లో ప్రభుత్వం వచ్చిన తర్వాత పేదలందరికీ ఇళ్లు పథకం పేరుతో 30 లక్షల గృహాలు నిర్మిస్తామని చెప్పిందని గుర్తు చేశారు. కానీ 29,51,858 మంది మహిళల పేరుతో స్థలాలను ఇవ్వాలని నిర్ణయించారని.. అయితే వాస్తవంలో 21,87,985 మందికే పట్టాలకు లబ్ధిదారులను గుర్తించారన్నారు. మొదట చెప్పినట్లుగా 30 లక్షల గృహాలను నిర్మించకుండా.. కేవలం 17,005 జగనన్న లే అవుట్లలో.. కేవలం 12,09,022 ఇళ్ల స్థలాలు మాత్రమే ఇచ్చారన్నారు.

ఈ మొత్తం పథకంలో ప్రజలు ఎన్నుకున్న ప్రభుత్వం ప్రజాధనాన్ని భారీగా పక్కదారి పట్టించిందన్నారు. పథకం పేరుతో వైఎస్సార్‌సీపీ నేతలు భారీగా లాభపడ్డారని పవన్ లేఖలో ప్రస్తావించారు. ప్రభుత్వం తీసుకొచ్చిన పేదలందరికీ ఇళ్లు పథకంలో కేంద్ర ప్రభుత్వ గృహ స్కీంలను కలిపేసింది. పీఎంఏవై (అర్బన్‌, రూరల్‌), బేజేఎం, ఎంజీఎన్‌ఆర్‌ఈజీపీ, ఎస్బీఎం తదితర కేంద్ర పథకాల నిధులను ఇష్టానుసారం కలిపేసి ఆ నిధులను ఏపీ ప్రభుత్వాన్ని పథకానికి వాడుకున్నారని ఆరోపించారు.

పేదలందరికీ ఇళ్లు పథకం నిర్వహణ ప్రక్రియలో వైసీపీ ప్రభుత్వం తేదీల వారీగా ఇలా చేసిందని.. మే 29, 2021 - 30 లక్షల ఇళ్ల స్థలాలను పేదలకు అందిస్తామన్నన్నారన్నారు. జూన్‌ 10, 2021- 30.76 లక్షల ఇళ్ల స్థలాలను అందించేందుకు 68,381 ఎకరాల భూమిని సేకరించారని.. 28.30 లక్షల ఇళ్లు నిర్మిస్తున్నట్లు చెప్పారు. (నీతి ఆయోగ్‌ కి ఇచ్చిన నివేదికలో సమాచారం ప్రకారం) అక్టోబరు 7, 2022 -31 ఇళ్ల స్థలాలు, ఒక్కో స్టలం ఖరీదు రూ.5 నుంచి రూ.10 లక్షలు అని తెలిపారు. మార్చి 17, 2022 - 30.76 లక్షల ఇళ్ల స్థలాలు. దీనికోసం 71,811 ఎకరాల భూమి సేకరణ. మార్కెట్‌ విలువ ప్రకారం రూ.25 వేల కోట్లతో సేకరించారన్నారు. మే 29, 2022 - 30 లక్షల ఇళ్ల స్థలాల పంపిణీ అని ప్రకటించారన్నారు.

నవంబరు 9, 2022 - 30.20 లక్షల ఇళ్ల స్థలాలను పంపిణీ అని గృహ నిర్మాణ శాఖ మంత్రి ప్రకటన చేశారన్నారు. డిసెంబరు 30, 2022 - 21.26 లక్షల లబ్ధిదారుల కోసం చేస్తామన్న ఖర్చు రూ. 53,296 కోట్లు.. ఇళ్ల స్థలాల పట్టాలు మొత్తం 30.76 లక్షలు.. దీని కోసం పెట్టిన మొత్తం ఖర్చు రూ.75,670.05 కోట్లు అని తెలిపారు. ఈ పథకంపై రాష్ట్ర ప్రభుత్వం అక్టోబరు 12, 2023న 5 లక్షల ఇళ్లకు గృహప్రవేశం అంటూ ఇచ్చిన పత్రికా ప్రకటనలో దీనికోసం రూ.56,102 కోట్లు భూ సేకరణ కోసం ఖర్చు చేసినట్లు పేర్కొందన్నారు.

ఇది మొదట చెప్పిన లెక్కకు దాలా వ్యత్యాసం. మొదట్లో కేవలం భూ సేకరణ కోసం రూ.35,151 కోట్లు ఖర్చు చేస్తున్నట్లు చెప్పిన లెక్కకు, పత్రికా ప్రకటనలో చెప్పిన లెక్కకు చాలా తేడా ఉందన్నారు. గృహ నిర్మాణం కోసం వైసీపీ ప్రభుత్వం గత అయిదు రాష్ట్ర బడ్జెట్‌ లలో రూ.23,106.85 కోట్లు మేర కేటాయించిందన్నారు. అయితే దీనిలో వ్యయం చేసింది మాత్రం 1 కేవలం రూ.11,358.87 కోట్లు అన్నారు. ఇదే సమయంలో కేంద్ర ప్రభుత్వం పీఎంఏవై (అర్బన్‌) పథకం ద్వారా రాష్ట్రానికి విడుదల చేసింది రూ.14,366.08 కోట్లు అన్నారు. ఈ మొత్తం పథకంలో ఉన్న అన్ని విషయాలను గమనించి.. ఈ పథకం అమలు తీరుపై సీబీఐతో పాటు ఈడీ విచారణ చేపడితే పేదల గృహ నిర్మాణ పథకంలో చోటు చేసుకున్నా మరింత లోతైన అవినీతి బయటపడే అవకాశం ఉందన్నారు. వేల కోట్లు ప్రజా ధనం ఏ విధంగా పక్కదారి పట్టిందో బయటపడుతుంది అన్నారు.