వైఎస్ షర్మిల వెంటే నడుస్తా.,,, మంగళగిరి ఎమ్మెల్యే ఆర్కే

వైఎస్సార్‌ తెలంగాణ పార్టీ అధ్యక్షురాలు షర్మిల కాంగ్రెస్‌కు వెళ్లేది నిజమైతే తానూ ఆమె వెంటే నడుస్తానన్నారు మంగళగిరి ఎమ్మెల్యే ఆళ్ల రామకృష్ణారెడ్డి. పొమ్మన లేక పొగపెట్టారని.. మంగళగిరి అభివృద్ధికి రూ.1,250 కోట్లు ఇస్తామన్నారు.. కనీసం రూ.120 కోట్లు కూడా ఇవ్వలేదన్నారు. మంగళగిరిలో అభివృద్ధి పనులకు తన సొంత నిధులు ఖర్చు చేశానన్నారు. వైఎస్సార్‌సీపీ ప్రభుత్వం అవినీతి బయటకు రాగానే కోర్టుల్లో కూడా కేసు వేస్తానని.. తాను ఏ పార్టీలో ఉంటాను అనేది కాలం నిర్ణయిస్తుందన్నారు. షర్మిల కాంగ్రెస్‌లో చేరతారనే ప్రచారం జరుగుతోందని.. తాను వైఎస్సార్ కుటుంబానికి చెందిన వ్యక్తినని.. షర్మిల ఏ నిర్ణయం తీసుకున్నా ఆమె వెంట ఉంటానన్నారు. వివిధ పార్టీల నుంచి ఆహ్వానం వచ్చింది.. షర్మిలతోనే నడుస్తానని తేల్చి చెప్పారు.

వైఎస్సార్‌సీపీకి తాను ఎంత సేవ చేశానో తనకు తెలుసని.. సర్వస్వం పోగొట్టుకున్నానన్నారు. వైఎస్సార్‌సీపీకి సిద్దాంతాలు ఉండాలని.. ఎంచుకున్న అభ్యర్థులను ఓడించాలి అంటే ఆ నియోజకవర్గ పరిధిలో అభివృద్ధి చెయ్యాలన్నారు. మంగళగిరి ప్రజలు అభివృద్ధిని కోరుకుంటున్నారని.. గత 50 ఏళ్లలో జరగని అభివృద్ధి నాలుగేళ్లలో చేసి చూపించానన్నారు. మంగళగిరి అభివృద్ధికి నిధులు విడుదల కాలేదని.. కాంట్రాక్టర్లు తనపై ఒత్తిడి తెచ్చినా.. తాను సీఎంవోకు పదే పదే వెళ్లి అడిగానన్నారు. స్వయంగా తానే రూ.8కోట్ల వరకు బయట అప్పులు తెచ్చి కాంట్రాక్టర్లకు ఇచ్చానన్నారు. తన సొంత డబ్బుతో ఎంటీఎంసీ దుగ్గిరాల పరిధిలో అభివృద్ధి పనులు చేశామని.. లోకేష్‌ను ఓడించిన తనకు సహకారం అందించకపోతే ఎలా అని ప్రశ్నించారు.

తాను ఎవరిని నిందించడం లేదని.. మంగళగిరికి నిధులు మంజూరు చేస్తానని తనకు ధనుంజయ రెడ్డి చాలా సార్లు మేసేజీలు పెట్టారన్నారు. ఎన్నికలు దగ్గరకు వచ్చినా ఎప్పుడు నిధులు మంజూరు చేస్తారని ప్రశ్నించారు. తాను స్పీకర్ ఫార్మాట్‌లో రాజీనామా ఇచ్చానని.. రాజీనామా ఆమోదించకపోవడం అనేది వాళ్ళ ఇష్టమన్నారు. మంగళగిరి ప్రజలకు తాను దూరంగా ఉండనని.. ఎవరు గెలవాలి అనేది ప్రజలు నిర్ణయిస్తారన్నారు. తాను ఏ పార్టీలో చేరినా.. ఆరోజు తన నిర్ణయం చెప్తానన్నారు. ఉంటే వైఎస్సార్‌సీపీలో ఉంటానని చెప్పా.. ఇప్పుడు మాత్రం పార్టీని వీడానన్నారు.తాను చేసిన వ్యాఖ్యలకు సీఎం జగన్ మోహన్ రెడ్డి సమాధానం చెప్పాలన్నారు. చాలా మంది తనను పార్టీలోకి రావాలని ఆహ్వానించారని.. తాను వైఎస్ కుటుంబంతో ఉంటానన్నారు. చంద్రబాబుపై వేసిన కేసులపై న్యాయ పోరాటం చేస్తానని.. ఇన్నర్ రింగ్ రోడ్డు కేసులో కూడా కేసును వెనక్కి తీసుకొనన్నారు. రేవంత్ రెడ్డి కాంగ్రెస్‌లో ఉన్నా.. షర్మిల కాంగ్రెస్‌లోకి వచ్చినా తన పోరాటం ఆగదన్నారు. రేవంత్ రెడ్డి సీఎం అయితే ఏమైనా గొప్పా.. తప్పు ఎవ్వరూ చేసినా తప్పేనన్నారు. వైఎస్సార్‌సీపీ ప్రభుత్వం తప్పు చేస్తే వాటిపై కేసులు వేసేందుకు అయినా వెనకాడనన్నారు. తప్పులు ఎవరు చేశారు అనేది న్యాయ స్థానాలు తెలుస్తాయని.. తాను లేకపోయినా మంగళగిరి అభివృద్ధి ఆగదన్నారు. తనకు జగన్ టికెట్ ఇవ్వలేదని తాను పార్టీని వీడలేదని.. తనకు, చిరంజీవికి, జగన్ మధ్య ఏమి జరిగింది అనేది అందరికీ తెలుసని.. తాను టికెట్ లేదని పార్టీని వీడలేదన్నారు.