అయోధ్యలో ప్రధాని మోదీ.. రైల్వేస్టేషన్, ఎయిర్‌పోర్ట్ సహా రూ.15 వేల కోట్ల పనుల ప్రారంభోత్సవాలు

అయోధ్య రైల్వే స్టేషన్, ఎయిర్‌పోర్ట్ సహా రూ.15,700 కోట్ల అభివృద్ధి పనులకు ప్రారంభోత్సవాలు, శంకుస్థాపనలు చేసేందుకు ప్రధానమంత్రి నరేంద్ర మోదీ.. అయోధ్యలో పర్యటిస్తున్నారు. వచ్చే నెల 22 వ తేదీన అయోధ్యలో భవ్య రామమందిరాన్ని ప్రారంభించడానికి ముందు ప్రధాని మోదీ.. ఈ పర్యటనకు వెళ్లారు. దీంతో అయోధ్య నగరాన్ని సర్వాంగ సుందరంగా ముస్తాబు చేశారు. మరోవైపు.. ఎలాంటి భద్రతా లోపాలు తలెత్తకుండా గట్టి బందోబస్తును ఏర్పాటు చేశారు. ఇప్పటికే అయోధ్యకు చేరుకున్న ప్రధాని మోదీ.. ముందుగా రోడ్‌షో నిర్వహించారు.

ఈ పర్యటనలో ఇటీవల అయోధ్యలో నిర్మించిన మహర్షి వాల్మీకీ ఇంటర్నేషనల్ ఎయిర్‌పోర్టును ప్రారంభించనున్నారు. దీంతోపాటు అయోధ్య రైల్వే స్టేషన్‌ను అభివృద్ధి చేసి అయోధ్య ధామ్ జంక్షన్ రైల్వే స్టేషన్‌ను కూడా జాతికి అంకితం ఇవ్వనున్నారు. దీంతోపాటు హైవేలు, రైల్వే లైన్ డబ్లింగ్‌ పనులు, 6 వందే భారత్ రైళ్లు, 2 అమృత్ భారత్ రైళ్లకు జెండాలు ఊపి ప్రారంభించనున్నారు. ఈ మొత్తం పర్యటనలో రూ.15,700 కోట్ల విలువైన ప్రాజెక్టులకు శంకుస్థాపన, ప్రారంభోత్సవాలు చేయనున్నారు.

శ్రీ మాతా వైష్ణో దేవి కత్రా - న్యూఢిల్లీ, అమృత్‌సర్ - న్యూఢిల్లీ, కోయంబత్తూరు-బెంగళూరు, మంగళూరు-మడ్‌గావ్, జల్నా-ముంబై, అయోధ్య-ఆనంద్ విహార్ టెర్మినల్‌తో పాటు అయోధ్య-దర్భంగా, మాల్దా టౌన్ మధ్య నడిచే 6 వందే భారత్ ఎక్స్‌ప్రెస్ రైళ్లను ప్రారంభించనున్నారు. వీటితోపాటు మరో 2 అమృత్ భారత్ రైళ్లకు కూడా ప్రధాని జెండా ఊపనున్నారు. ఇక జనవరి 17 వ తేదీ నుంచి అయోధ్యను బెంగళూరు కోల్‌కతాకు అనుసంధానించే డైరెక్ట్ ఫ్లైట్‌ను ప్రారంభిస్తున్నట్లు ఎయిర్ ఇండియా ఇప్పటికే ప్రకటించింది. ఈ నెల ప్రారంభంలో విమానయాన సంస్థ అయోధ్య, ఢిల్లీ మధ్య నేరుగా విమానాన్ని ప్రకటించింది.

ఈ పర్యటనలో ప్రధాని మొత్తం 46 ప్రాజెక్టులకు ప్రారంభోత్సవాలు, శంకుస్థాపనలు చేస్తారు. అయోధ్య ధామ్ జంక్షన్ నుంచి 6 వందే భారత్, 2 అమృత్ భారత్ రైళ్లను జెండా ఊపి ప్రారంభించనున్నారు. అనంతరం మహర్షి వాల్మీకి అంతర్జాతీయ విమానాశ్రయాన్ని ప్రారంభించి అక్కడే నిర్వహించనున్న బహిరంగ సభలో ప్రసంగిస్తారు. తర్వాత సహదత్‌గంజ్ నుంచి కొత్త ఘాట్ వరకు ఉన్న రామ్ పథ్, అయోధ్య ప్రధాన రహదారి నుంచి హనుమాన్ గర్హి మీదుగా శ్రీరామ జన్మభూమి వరకు ఉన్న భక్తి పథ్, జాతీయ రహదారి 27 నుంచి నయా ఘాట్ పాత వంతెన వరకు ఉన్న ధర్మ పథ్‌లను ప్రారంభించనున్నారు. రాజర్షి దశరథ్ అటానమస్ స్టేట్ మెడికల్ కాలేజీని ప్రారంభించనున్నారు. ఎన్‌హెచ్ 27 బైపాస్, మహోబ్రా బజార్ మీదుగా తేధి బజార్ శ్రీరామ జన్మభూమి వరకు 4 లేన్ల రహదారితోపాటు, మహర్షి అరుంధతి పార్కింగ్, కమర్షియల్ కాంప్లెక్స్.. అయోధ్య-సుల్తాన్‌పూర్ జాతీయ రహదారి-330 నుంచి విమానాశ్రయానికి 4 లేన్ల రహదారి.. జౌన్‌పూర్-అయోధ్య-బారాబంకి రైల్ లైన్ ప్రాజెక్టు కింద నాలుగు సెక్షన్ల రెట్టింపు పనులను ప్రారంభించనున్నారు.