రామమందిర ప్రారంభం.. క్యూఆర్ కోడ్ విరాళాల పేరుతో భక్తులకు టోకరా

అయోధ్యలోని రామమందిర మహాప్రాణప్రతిష్ఠకు ముహూర్తం సమీపిస్తున్న వేళ.. విరాళాల పేరుతో భక్తులను దోచుకునే రాకెట్ వెలుగులోకి వచ్చింది. రామాలయానికి విరాళాలు ఇవ్వాలని కోరుతూ సైబర్ నేరగాళ్లు సోషల్ మీడియాలో మెసేజ్‌లు పెడుతున్నట్టు విశ్వహిందూ పరిషత్ (వీహెచ్‌పీ) హెచ్చరించింది. వీటిలో QR కోడ్ కూడా ఉంటుందని, స్కాన్ చేసి చెల్లించి డబ్బు మోసగాళ్లకు చేరుతుందని తెలిపింది. ఈ అంశంపై కేంద్ర హోం మంత్రిత్వ శాఖ, యూపీ పోలీసు ఉన్నతాధికారులకు ఫిర్యాదు చేసినట్టు వీహెచ్‌పీ అధికార ప్రతినిధి వినోద్ బన్సాల్ వెల్లడించారు.

ఆలయ నిర్మాణాన్ని పర్యవేక్షిస్తోన్న శ్రీరామ జన్మభూమి తీర్థ క్షేత్ర ట్రస్ట్.. నిధుల సేకరణ బాధ్యతలను ఎవరికీ అప్పగించలేదని ఆయన నొక్కి చెప్పారు. ఆలయం పేరు మీద డబ్బు వసూలు చేయడానికి నేరగాళ్ల ప్రయత్నాల గురించి ఇటీవల తమకు సమాచారం అందిందని ఆయన చెప్పారు. ‘శ్రీరామ జన్మభూమి తీర్థ క్షేత్ర న్యాస్ నిధులను సేకరించడానికి ఎవరికీ అధికారం ఇవ్వలేదు. ప్రజలు ఇలాంటి మోసాలకు గురికాకుండా కఠిన చర్యలు తీసుకోవాలని కోరుతూ నేను హోం మంత్రిత్వ శాఖ, ఉత్తరప్రదేశ్ డీజీపీ, ఢిల్లీ పోలీసు కమిషనర్‌కు లేఖ రాశాను.. ప్రజలు అప్రమత్తంగా ఉండాలి’ అన్నారు.

‘ఇది సంతోషకరమైన సందర్భం.. ఆలయ ప్రారంభోత్సవానికి మేము ఆహ్వానాలు పంపుతున్నాం... ఎటువంటి విరాళాన్ని అంగీకరించం’ అని స్పష్టం చేశారు. ఆలయానికి విరాళాలు ఇవ్వాల్సిందిగా సామాజిక మాధ్యమాల్లో మెసేజ్‌లు, ఫోన్ కాల్స్ రావడంతో ఈ విషయం వెలుగులోకి వచ్చింది. ఇటువంటి కాల్‌ను స్వీకరించిన వారిలో ఒకాయన వీహెచ్‌పీ కార్యకర్తలతో పంచుకున్నారు. ఓ కార్యకర్త ఆ నంబర్‌కు ఫోన్ చేయడంతో మోసగాళ్ల కుట్రలు బయటపడ్డాయి. ఈ సమయంలో రికార్డ్ చేసిన ఫోన్ కాల్ ఆడియో క్లిప్‌ను వీహెచ్‌పీ షేర్ చేసింది. కాల్ చేసిన వ్యక్తి తాను రూ. 11,000 విరాళం ఇవ్వాలనుకుంటున్నానని, గ్రామంలోని ఇతరులు కూడా విరాళాలు ఇవ్వడానికి ఆసక్తిగా ఉన్నారని చెప్పినప్పుడు.. అవతలి వైపు ఉన్న మోసగాడు QR కోడ్‌ను పంపడానికి వాట్సాప్ నంబర్‌ను అడగటం వినిపిస్తుంది. కాల్ చేసిన వ్యక్తిని ఒప్పించేందుకు దాతల పేర్లు, వివరాలను నమోదు చేస్తున్నామని, నిర్మాణ పనులు పూర్తయిన తర్వాత వారిని రామమందిరానికి ఆహ్వానిస్తామని నమ్మబలికాడు. అంతేకాదు, ‘హిందూ, ముస్లిం సమాజాల మధ్య యుద్ధం జరిగిందని, ఆలయ నిర్మాణాన్ని కొనసాగించనివ్వడం లేదని చెప్పాడు. అందుకే గుడి కట్టేందుకు విరాళాలు సేకరిస్తున్నాం’ అని చెప్పడం గమనార్హం.