ప్రకృతి ప్రేమికులకు షాక్.. వారం పాటు వంజంగి కొండల సందర్శనకు బ్రేక్

శీతాకాలం వచ్చిందంటే చాలు.. హిల్ స్టేషన్స్‌కి పర్యాటకులు క్యూ కడుతుంటారు. అయితే, ఆంధ్రప్రదేశ్‌లో చాలా హిల్ స్టేషన్ల ఉన్నా అరకు-పాడేరుకు ఉండే ప్రత్యేకతే వేరు. మన్యంలోని పాడేరు, వంజంగి హిల్స్‌‌లో సూర్యకాంతిలో మబ్బుల దృశ్యాలు పర్యాటకులను ఎంతగానో ఆకట్టుకుంటాయి. ఇక, నవంబరు నుంచి ఫిబ్రవరి వరకూ వంజంగి కొండలు వీక్షించేందుకు భారీ స్థాయిలో పర్యాటకులు పాడేరు ఏజెన్సీకి వెళ్తుంటారు. శీతకాలంలో లంబసింగి సోయగాలు సహా వంజంగి హిల్స్‌ అద్భుతమైన ప్రకృతి మంచు అందాల దృశ్యాల పర్యాటకులను ఆకట్టుకుంటున్నాయి. ప్రతిరోజూ సూర్యోదయం కాగానే కళ్ల ముందు కనిపించే మంచు మేఘాలు, చేతికి అందేంత దూరంలో తేలియాడే మబ్బులు, చుట్టుపక్కల ప్రకృతి అందాలు పర్యాటకులను ఇట్టే కట్టిపడేస్తుంటాయి. అయితే, అటువంటి అందాల వీక్షణకు బ్రేక్ పడింది. జనవరి 2 నుంచి 9 వరకూ వారం రోజుల పాటు వంజంగి కొండల సందర్శనను మూసివేస్తున్నట్లు అల్లూరి జిల్లా కలెక్టర్ సుమిత్ కుమార్ ఓ ప్రకటన విడుదల చేశారు.

వంజంగి పర్యాటక కేంద్రం కాలుష్యం, ప్లాస్టిక్ వ్యర్ధాలతో నిండిపోయిందని, వాటి తొలగింపు, రహదారి మరమ్మత్తులు తదితర కార్యక్రమాల నిర్వహణ నిమిత్తం వారం రోజుల పాటు మూసివేస్తున్నట్లు కలెక్టర్ వివరించారు. ఈ నేపథ్యంలో పర్యాటకులు గమనించి జనవరి 2 నుంచి 9వ తేదీ వరకూ వంజంగి మంచు మేఘాల కొండ సందర్శనకు రావద్దన్న కలెక్టర్ సుమిత్ కుమార్ విజ్ఞ‌ప్తి చేశారు. కాగా, సముద్ర మట్టానికి 3,400 అడుగుల ఎత్తులో ఉండే ఈ అందమైన హిల్‌స్టేషన్‌ ట్రెక్కింగ్ ప్రియులకు కూడా అద్భుతమైన గమ్యస్థానం. ఈ వంజంగి హిల్స్‌పై నుంచి సూర్యోదయం చూడటానికి రెండు కళ్లూ చాలవంటే అతిశయోక్తి కాదు. సహజంగా ఏదైనా సంతోషకరమైన సందర్భాన్ని అనుభూతి చెందేటప్పుడు ‘ఐ యాం ఆన్ క్లౌడ్ 9’ అనే పదం వాడుతుంటారు. అంటే మనం మేఘాలపై విహరిస్తున్నామనే భావన కలుగుతుందని అర్థం. ఈ వంజంగి హిల్స్‌కు వెళితే నిజంగానే ‘క్లౌడ్‌ 9’ పై విహరిస్తున్న అనుభూతి కలుగుతుంది.