తిరుమలలో ఫిబ్రవరి 3 నుంచి ధార్మిక సదస్సు.. దేశవ్యాప్తంగా పీఠాధిపతులు హాజరు

సనాతన హైందవ‌ ధర్మ ప్రచారంలో భాగంగా ఫిబ్రవరి 3 నుంచి 5 వ‌ర‌కు దేశంలోని ప్రముఖ పీఠాధిపతులు, మఠాధిపతులు, ధార్మిక సంస్థ‌ల‌తో తిరుమలలో సదస్సు నిర్వ‌హించ‌నున్నట్లు టీటీడీ ఈవో ధర్మారెడ్డి తెలిపారు. తిరుమల ఆస్థాన మండపంలో నిర్వహించనున్న ధార్మిక సదస్సుకు దేశంలోని ప్రముఖ మఠాధిపతులు, పీఠాధిపతులను ఆహ్వానించాలని అధికారులను ఆదేశించారు. సదస్సుకు విచ్చేసే స్వామీజీలకు ఎలాంటి అసౌకర్యం కలగకుండా దర్శనం, వసతి, రవాణా ఏర్పాటు చేయాలన్నారు. సదస్సులో స్వామీజీల సూచనలు, సలహాల మేరకు సనాతన హైందవ ధర్మ ప్రచారంకు చర్యలు తీసుకోనున్నట్లు ఆయన వివరించారు. అనంతరం సదస్సు నిర్వహణకు సీనియర్ అధికారులతో వివిధ కమిటీలను ఏర్పాటు చేసి ఈవో సమీక్షించారు.

అంతకు ముందు డయల్ యువర్ ఈవో కార్యక్రమంలో ఆయన పలువురి భక్తులు ఫోన్‌లో అడిగిన సందేహాలు, ప్రశ్నలకు సమాధానం ఇచ్చారు. ఈ సందర్భంగా తిరుపతిలోని అలిపిరి సప్తగోప్రదక్షిణ మందిరంలో జరుగుతున్న శ్రీనివాస దివ్యానుగ్రహ విశేష హోమంలో పాల్గొనే భక్తులు తిరుమలలో రూ.300 ప్ర‌త్యేక ప్ర‌వేశ ద‌ర్శ‌నం క్యూ లైన్‌లో టికెట్ కొనుగోలుచేసి శ్రీవారిని దర్శించుకునే అవకాశం కల్పిస్తున్నామని ఆయన చెప్పారు. ధనుర్మాస కార్యక్రమాల ముగింపులో భాగంగా జనవరి 15న తిరుపతిలోని టీటీడీ పరిపాలన భవనం ప్రాంగణం పేరేడ్‌ మైదానంలో సాయంత్రం 6.30 నుంచి 8.30 గంటల వరకు ‘శ్రీ గోదా కళ్యాణం’ వైభవంగా నిర్వహిస్తారు. తిరుమ‌ల‌లో జనవరి 16న కనుమ పండుగ సందర్భంగా శ్రీవారి పార్వేట ఉత్సవం, జనవరి 25న శ్రీరామకృష్ణతీర్థ ముక్కోటి వైభ‌వంగా నిర్వ‌హిస్తామని ఈవో తెలియజేశారు. అలాగే, టీటీడీ పేరిట ఉన్న నకిలీ వెబ్‌సైట్ల కారణంగా మోసపోకూడదనే ఉద్దేశంతో టీటీడీ అధికారిక వెబ్‌సైట్‌ ttdevasthanams.ap.gov.inలో మాత్రమే ఆర్జితసేవలు, దర్శనం, విరాళాలు, వసతి బుక్‌ చేసుకోవాలని భక్తులకు సూచించారు.

కాగా, కలియుగ వైకుంఠవాసుడు తిరుమల శ్రీవారి హుండీ ఆదాయం వరుసగా 22 నెల రూ.100 కోట్ల మార్క్ దాటింది. డిసెంబరులో శ్రీవారికి హుండీ ద్వారా రూ.116.73 కోట్ల సమకూరినట్టు తిరుమల తిరుపతి దేవస్థానం (టీటీడీ) వెల్లడించింది. గత నెలలో శ్రీవారిని 19.16 లక్షల మంది భక్తులు దర్శించుకున్నారని తెలిపింది. అంటే సగటున రోజుకు 62 వేల మంది స్వామిని దర్శించుకున్నారు. మొత్తం కోటి 46 లక్షల లడ్డూలను విక్రయించామని, 40.77 లక్షల మంది భక్తులు అన్నప్రసాదం స్వీకరించినట్టు టీటీడీ పేర్కొంది. ఇక, 6.87 లక్షల మంది భక్తతులు తలనీలాలు సమర్పించారు.