వైసీపీకి 151కి పైగా సీట్లు వస్తాయి.... ఆర్ కృష్ణయ్య

 ఏపీలో ఎన్నికల హడావిడి మొదలైంది. అధికార పార్టీలో ఇప్పటికే మార్పులు చేర్పులు పెద్ద ఎత్తున జరుతుండటం చర్చనీయాంశంగా మారింది. ఈ క్రమంలోనే.. వైసీపీ నుంచి అసంతృప్తులు కూడా బయటికి వస్తున్నారు. అటు ప్రతిపక్షాల్లోనూ.. కొందరు కీలక నేతలు బయటికి వస్తూ.. రాజకీయాలను రసవత్తరంగా మార్చేస్తున్నారు. ప్రతిసారి వై నాట్ 175 అంటూ సీఎం జగన్.. తన పార్టీ నేతల్లో ఉత్సాహం కల్పిస్తుండగా.. మారుతున్న ప్రస్తుత రాజకీయ సమీకరణాల దృష్ట్యా ఎన్ని సీట్లు వస్తాయన్నది ఇప్పుడు ఆసక్తి రేకెత్తిస్తోంది. అయితే.. ఈ నేపథ్యంలోనే వైసీపీ రాజ్యసభ సభ్యుడు ఆర్ కృష్ణయ్య కీలక కామెంట్లు చేశారు. వచ్చే అసెంబ్లీ ఎన్నికల్లో ఎన్ని సీట్లు వస్తాయన్నది అంచనా వేశారు.

వచ్చే ఎన్నికల్లో ఏపీలో వైసీపీకి 151కి పైగా సీట్లు వస్తాయని రాజ్యసభ సభ్యుడు ఆర్ కృష్ణయ్య తెలిపారు. వైఎస్ జగన్ మోహన్ రెడ్డిని మళ్లీ అధికారలోకి తేవాల్సిన బాధ్యత బీసీ, ఎస్సీ, ఎస్టీల వర్గాలపై ఉందని ఆర్ కృష్ణయ్య తెలిపారు. జగన్ రాజకీయ వేత్త కాదని.. గొప్ప సంఘ సంస్కర్త అని అభివర్ణించారు. వచ్చే ఎన్నికల్లో ఏపీలోని బీసీలంతా జగన్‌కే ఓట్లు వేయాలని సూచించారు. బీసీల అభివృద్ధి కోసం జగన్ కృషి చేస్తున్నారని.. రాబోయే ఎన్నికల్లో జగన్ కాకుండా ఎవరైనా అధికారంలోకి వస్తే సంక్షేమ పథకాలు తీసేస్తారంటూ సంచలన వ్యాఖ్యలు చేశారు. మరోవైపు.. బీసీలపై ప్రతిపక్షాలు మొసలి కన్నీరు కారుస్తున్నాయని ఆర్ కృష్ణయ్య దుయ్యబట్టారు. ఆదివారం రోజు మీడియాతో మాట్లాడిన ఆర్ కృష్ణయ్య.. చట్ట సభల్లో బీసీ రిజర్వేషన్ల కోసం ఈ నెల 29వ తేదీన ఛలో ఢిల్లీ కార్యక్రమం నిర్వహిస్తున్నామని ప్రకటించారు. బీసీల ఛైతన్యం కోసం ఏపీ వ్యాప్తంగా పర్యటించానన్నారు. త్వరలోనే 4 లక్షల మందితో ఉత్తరాంధ్రలో బీసీ సభను కూడా నిర్వహిస్తామని ఆర్ కృష్ణయ్య తెలిపారు.