చంద్రబాబు నాకు తాత లాంటి వారు.. వైసీపీ ఎమ్మెల్యే అభ్యర్థి

చంద్రగిరి నియోజకవర్గంలో దొంగ ఓట్లపై అధికార వైఎస్ఆర్సీపీ, ప్రతిపక్ష టీడీపీ మధ్య మాటల యుద్ధం జరుగుతోంది. ఈ అంశంపై ఇరు పార్టీలు పోటాపోటీగా తిరుపతి ఆర్టీఓ కార్యాలయం వద్ద సోమవారం నిరసన చేపట్టాయి. ఇదే అంశంపై టీడీపీ అధినేత చంద్రబాబు నాయుడు ఎన్నికల కమిషన్‌కు ఫిర్యాదు చేశారు. దీనిపై చంద్రగిరి వైఎస్ఆర్సీపీ అభ్యర్థి చెవిరెడ్డి మోహిత్ రెడ్డి మాట్లాడుతూ.. చంద్రబాబు తనకు తాత లాంటివారని, ఆయన రాజకీయాల్లోకి వచ్చిన 20 ఏళ్లకు నేను పుట్టానని అన్నారు.

‘పెద్దలైన చంద్రబాబు, మా తాత ఇద్దరూ కలిసి చదువుకున్నారు.. మీరు నాకు తాత లాంటి వారు.. నా వయసు 25 ఏళ్లు.. చంద్రబాబు తాత మీరు రాజకీయాల్లోకి వచ్చి 45 ఏళ్లయ్యింది.. మీరు రాజకీయాల్లోకి వచ్చిన 20 సంవత్సరాలకు నేను పుట్టాను... ఈ రోజు చంద్రబాబు తాత మీరు పెట్టిన ప్రెస్‌మీట్, ఎన్నికల కమీషన్‌కు చేసిన ఫిర్యాదు చూసి ఆశ్చర్యపోయాను... చంద్రబాబు నాయుడు మా మీదా అరోపణలు చేశారు.. చంద్రగిరిలో లక్ష నకిలీ ఓట్లు ఉన్నాయి.. మాతాత వయసు ఉన్న వ్యక్తి అరోపణలు చేయడం తగింది కాదు.. నిజాలు తెలుసుకోవాలి’ అని అన్నారు.

‘నియోజకవర్గంలో 3.08 లక్షల ఓట్లు ఉన్నాయి... కేవలం 2019-24 మధ్య 16వేల ఓట్లు పెరిగాయి.. రూరల్ మండలంలో 10 వేల ఓట్లు పెరిగాయి.. 5,500 ఇల్లు పెరిగినప్పుడు రూరల్ మండలంలో పదివేల ఓట్లు పెరిగాయి‌... స్థానిక నాయకుల ఇచ్చిన సమాచారంతో మీరు అలా మాట్లాడటం కరెక్ట్ కాదు... దీనిపై న్యాయ పోరాటము చేస్తాం... నేను అమరణ దీక్షకు సిద్దం.. మేము నిరంతరం ప్రజలతో ఉన్నాం... ప్రభుత్వం ఇచ్చిన సంక్షేమ పథకాలతో మా గెలుపు ఖాయమైంది.’ అని మోహిత్ రెడ్డి ధీమా వ్యక్తం చేశారు. ‘14వేల ఓట్లు డీలీట్ చేయడం.. తప్పుడు ఫారం-7తో తొలగింపు జరిగింది‌... దీనిపై విచారణలో టీడీపీ కుట్ర బయటపడింది.. దీనిపైన అరు పోలీసు స్టేషన్‌లో పిర్యాదు చేశాం.. అరోపణలు చేసే ముందు పెద్దల విజ్ఞత పాటించాలి.. ఎన్నికల కమిషన్ విచారణ చేస్తే చాలా మంది టీడీపీ వారు అరెస్ట్ అవుతారు’ అని చెవిరెడ్డి మోహిత్ రెడ్డి పేర్కొన్నారు.