ఆ పదం వల్ల బాధపడి ఉంటే క్షమించండి.. అలా అనకుండా ఉండాల్సింది: వైసీపీ ఎమ్మెల్యే

ఎక్సైజ్‌ డిపార్టుమెంటుకు చెందిన అధికారులను ఉద్దేశించి తాను అన్న పదానికి ఎవరైనా బాధపడి ఉంటే మనస్ఫూర్తిగా మన్నించమని కోరుతున్నానన్నారు ప్రొద్దుటూరు ఎమ్మెల్యే రాచమల్లు శివప్రసాద్ రెడ్డి. ఎస్పీకి కాదు.. వాళ్ల బాబుకి చెప్పుకో అన్న పదాన్ని వెనక్కి తీసుకుంటున్నానన్నారు. ఒక ప్రజాప్రతినిధిగా ఆ పదజాలాన్ని వినియోగించడం సరికాదన్నాు. ఈ పదం జిల్లాలో బూతు పదం కాదని.. సాధారణ ప్రజలు వారి బాధను వెలిబుచ్చే సమయంలో ఈ పదాన్ని వాడతారన్నారు. ఆ పదాన్ని ప్రజాజీవితంలో బాధ్యతగా ఉన్న వ్యక్తిగా తాను ఉపయోగించరాదన్నారు.

ఒక వ్యక్తి మూడు మద్యం సీసాలే కొనుగోలు చేయాలనే చట్టాన్ని మార్పు చేయాల్సిన అవసరం ఉందన్నారు. విదేశీ, ఇతర రాష్ట్రాల మద్యాన్ని బ్లాక్‌ మార్కెట్‌లో వినియోగించకుండా ఉండేందుకు ఈ చట్టం ఉపయోగపడుతుందన్నారు. రాష్ట్ర ప్రభుత్వం విక్రయించే మద్యం పాలసీకి ఈ చట్టంలో మార్పులు చేయాలని తాను ముఖ్యమంత్రికి లేఖ రాయడంతో పాటు స్వయంగా వెళ్లి లేఖను అందిస్తానన్నారు.ప్రొద్దుటూరులో ప్రత్యేక ఎన్‌ఫోర్స్‌మెంట్‌ బ్యూరో ఎస్‌ఐ అలీబేగ్‌పై ఎమ్మెల్యే రాచమల్లు పరుష పదజాలంలో మండిపడ్డారు. సెబ్‌ కార్యాలయానికి తన అనుచరులతో వెళ్లి కుర్చీల్లో కూర్చుని వారిపై తీవ్ర ఆగ్రహం వ్యక్తం చేశారు.

పోలీసులు, అధికారులను కించపరుస్తూ వ్యాఖ్యానించిన ప్రొద్దుటూరు ఎమ్మెల్యే రాచమల్లు శివప్రసాదురెడ్డిపై పోలీసులు సుమోటోగా కేసు నమోదు చేయాలని టీడీపీ డిమాండ్ చేసింది. రాష్ట్రంలో వైఎస్సార్‌‌సీపీ అరాచకపాలనకు ప్రొద్దుటూరు ఎమ్మెల్యే ప్రవర్తించిన తీరే నిదర్శనమన్నారు. ఎస్‌ఈబీ పోలీసులపై రాచమల్లు వ్యవహరించిన తీరును తామే ఖండిస్తున్నామన్నారు. అధికారులను నిలబెట్టి వారి కుర్చీలో కూర్చుని పరుషపదజాలంతో దూషించడం చూస్తుంటే.. అసలు రాష్ట్రంలో రాజ్యాంగం అమలవుతుందా అనే అనుమానం ఉందన్నారు.

అధికారులు తమ విధులను సక్రమంగా నిర్వర్తించాలని సూచించారు తెలుగుదేశం పార్టీ పొలిట్‌బ్యూరో సభ్యుడు శ్రీనివాసరెడ్డి. రాష్ట్రప్రభుత్వం నూతనంగా తీసుకువచ్చిన భూ యాజమాన్య హక్కు చట్టం కబ్జాదారులకు, వైఎస్సార్‌సీపీ నేతల దోపిడీలకు ఆసరాగా నిలుస్తుందన్నారు. ఎక్కడైనా లోపం జరిగితే భూ యజమాని కోర్టుకు వెళ్లే ఆస్కారం ఉండదని, తక్షణమే ఈ చట్టాన్ని రద్దు చేయాలని డిమాండ్‌ చేశారు.

ఎస్‌ఈబీ అధికారిని బెదిరించి, ఎస్పీని ధూషించిన ఎమ్మెల్యే రాచమల్లు శివప్రసాదురెడ్డి, ఆయన అనుచరులను అరెస్టు చేయాలని టీడీపీ జిల్లా అధ్యక్షుడు లింగారెడ్డి డిమాండు చేశారు. పరిమితికి మించిన మద్యం సీసాలను పట్టుకున్న అధికారి కుర్చీలో కూర్చుని.. ఆయనను నిలబెట్టి అవమానించడం సరికాదన్నారు. మద్యం విడుదల చేయాలని ఎమ్మెల్యే దౌర్జన్యం చేయడం వైఎస్సార్‌సీపీ అరాచక పాలనకు నిదర్శనమన్నారు. చట్టాలను మార్చమని అధికారికి చెప్పడం విడ్డూరంగా ఉందన్నారు. చట్టసభలో చట్టాలు చేస్తారని ఎమ్మెల్యే తెలుసుకోవాలన్నారు.. వైఎస్సార్‌సీపీ నాలుగున్నరేళ్ల పాలనలో నాయకులు చెప్పిన అన్ని అక్రమ పనులు చేశారని ఆరోపించారు. పోలీసులు చట్టాలకు లోబడి విధులు నిర్వహించకుండా వైఎస్సార్‌సీపీ నేతలు అడ్డుకుంటున్నారన్నారు. ప్రజలు వైఎస్సార్‌సీపీని ఓడించి గుణపాఠం చెప్పాలన్నారు.