గ్యాంగ్‌స్టర్‌ను ట్రాప్ చేసి పోలీసులకు పట్టించిన మోడల్ దారుణ హత్య

గురుగ్రామ్‌ హోటల్‌లో మంగళవారం రాత్రి మాజీ మోడల్ దివ్య వహుజా హత్య కలకలం సృష్టించింది. ఈ ఘటనకు సంబంధించిన సీసీటీవీ ఫుటేజ్‌ను పోలీసులు స్వాధీనం చేసుకున్నారు. హోటల్ యజమాని అభిజీత్‌ సింగ్‌, తన సహాయకులతో కలిసి ఈ హత్యకు పాల్పడ్డినట్లు పోలీసులు వెల్లడించారు. మృతదేహాన్ని మాయం చేసేందుకు ప్రయత్నిస్తుండగా.. ముగ్గురిని అదుపులోకి తీసుకున్నట్లు తెలిపారు. హరియాణకు చెందిన గ్యాంగ్‌స్టర్‌ సందీప్‌ గడోలీ నకిలీ ఎన్‌కౌంటర్‌ కేసులో నిందితురాలిగా ఉన్న దివ్య పహుజ.. ఏడేళ్ల పాటు జైలులో ఉన్నారు. గతేడాది జూన్‌లో బాంబే హైకోర్టు ఆమెకు బెయిల్ మంజూరు చేసింది.

బెయిల్‌పై బయటకొచ్చిన ఆమె అనూహ్యంగా హత్యకు గురయ్యింది. గ్యాంగస్టర్ సందీప్ గడోలీని ట్రాప్ చేసి, పట్టించడంలో పోలీసులకు దివ్య సహకరించారు. 18 ఏళ్ల వయసులో మోడలింగ్‌లో అడుగుపెట్టిన దివ్యకు అండర్ వరల్డ్‌తో అనుబంధం మొదలైంది. 2016లో ముంబయి అంతర్జాతీయ విమానాశ్రయం సమీపంలోని ఓ హోటల్‌లో ఆమె ప్రియుడు, కరుడగట్టిన గ్యాంగస్టర్ సందీప్ గడోలీని హరియాణా పోలీసులు ఎన్‌కౌంటర్ చేశారు. ఈ బూటకపు ఎన్‌కౌంటర్‌కు సహకరించారనే ఆరోపణలపై ముంబయి పోలీసులు దివ్యను అరెస్టు చేశారు. గ్యాంగ్‌స్టర్ ఆచూకీని వెల్లడించినందుకు దివ్యతో పాటు పలువురు పోలీసు అధికారులను అదుపులోకి తీసుకున్నారు. ఏడేళ్ల పాటు జైల్లో ఉన్న ఆమెకు హైకోర్టు బెయిల్ ఇచ్చింది. కానీ, బయటకు వచ్చిన ఆరు నెలల్లోనే హత్యకు గురయ్యారు.

దివ్య పహుజాను అభిజీత్‌ సింగ్‌ మంగళవారం రాత్రి హోటల్‌ రూమ్‌కు తీసుకెళ్లి కాల్చి చంపినట్లు పోలీసులు పేర్కొన్నారు. తనతో సన్నిహితంగా ఉన్న కొన్ని ఫొటోలతో బెదిరించి డబ్బు డిమాండ్‌ చేసేదని.. అందుకే ఈ హత్యకు పాల్పడ్డట్లు విచారణలో అభిజీత్‌ వెల్లడించినట్టు పోలీసులు చెప్పారు. ‘నిందితుడు అభిజీత్ జనవరి 2న దివ్య పహుజాతో కలిసి హోటల్ సిటీ పాయింట్‌కి వచ్చి, ఆమె ఫోన్‌లో తన అసభ్యకరమైన ఫోటోలను డిలీట్ చేయాలనుకున్నానని వెల్లడించాడు. అయితే దివ్య పహుజా తన ఫోన్ పాస్‌వర్డ్ చెప్పలేదని చెప్పాడు.. దీంతో అభిజీత్‌తో పాటు హోటల్‌లో క్లీనింగ్, రిసెప్షన్‌లో పనిచేస్తున్న హేమ్‌రాజ్, ఓం ప్రకాష్‌లు ఆమెను కాల్చి చంపారు. అనంతరం అభిజీత్‌కు చెందిన బీఎండబ్ల్యూ కారులో మృతదేహాన్ని ఉంచారు. అనంతరం మృతదేహాన్ని మాయం చేయడానికి సిబ్బందికి కారును ఇచ్చాడు’ అని పోలీసులు పేర్కొన్నారు.

అయితే, ఈ ఆరోపణలను దివ్య కుటుంబ సభ్యులు తీవ్రంగా ఖండించారు. అభిజీత్‌ సింగ్‌ సహా హోటల్‌లో పనిచేసే ముగ్గురు సిబ్బంది ప్రస్తుతం పోలీసుల అదుపులో ఉన్నారు. మృతదేహాన్ని ఓ తెల్లటి వస్త్రంలో చుట్టి హోటల్‌ లాబీ నుంచి లాక్కెళ్తున్న దృశ్యాలు అక్కడ సీసీటీవీల్లో రికార్డయినట్టు పోలీసులు తెలిపారు. దివ్య రి నైనా పహుజా మాత్రం ఫిర్యాదులో భిన్నమైన ఆరోపణలు చేశారు. సందీప్‌ గడోలీ సోదరి సుదేశ్‌ కటారియా, సోదరుడు బ్రహ్మ ప్రకాశ్‌లే అభిజీత్‌తో కలిసి ఈ హత్య చేయించారని ఆమె ఆరోపించారు. గ్యాంగ్‌స్టర్‌ గడోలీ 2016 ఫిబ్రవరి 6న ముంబయిలో జరిగిన కాల్పుల్లో చనిపోయాడు. అయితే, నకిలీ ఎన్‌కౌంటర్‌ అని ముంబయి పోలీసులు వెల్లడించారు. తన ప్రియురాలు దివ్య పహుజా సాయంతో ట్రాప్ చేసి చంపేసినట్లు ఆరోపించారు.