బ్రిటన్ రాణి ఎలిజబెత్-2 మరణంపై వెలుగులోకి ఆసక్తికర విషయం

బ్రిటన్ రాణి ఎలిజిబెత్-2 2022 సెప్టెంబరులో కన్నుమూసిన విషయం తెలిసిందే. అయితే, ఆమె ఎలా మరణించారనే విషయాన్ని ఓ పుస్తకం తాజాగా వెల్లడించింది. ఎలిజబెత్-2 ఎటువంటి బాధలేకుండా ప్రశాంతంగా కన్నుమూసినట్టు ఆమె వ్యక్తిగత కార్యదర్శి సర్ ఎడ్వర్డ్ యంగ్ పేర్కొన్నారు. రాణి నిద్రలోనే చనిపోయారని, ఈ విషయం ఎవరికీ తెలియదని తెలిపారు. ప్రముఖ రచయిత రాబర్ట్ హార్డ్‌మాన్ రాసిన బ్రిటన్ రాణి జీవిత చరిత్రలో ఈ సమాచారం వెల్లడైంది. అయితే, ఈ అనధికారిక జీవిత చరిత్రపై బకింగ్‌హామ్ ప్యాలెస్ వ్యాఖ్యానించకూడదని నిర్ణయించుకుంది.

బ్రిటన్‌కు చెందిన డైలీ మెయిల్‌లో సీరియల్‌గా వచ్చిన పుస్తకం ప్రకారం.. తన తల్లి చనిపోయినప్పుడు కింగ్ ఛార్లెస్-3 సమీపంలో పుట్టగొడుగులను కొంటున్నట్లు ప్రస్తావించారు. సెప్టెంబరు 8, 2022న రాణి మరణం గురించి సర్ ఎడ్వర్డ్ మెమో రాస్తూ.. ‘చాలా ప్రశాంతంగా ఉంది.. ఆమె నిద్రలోకి జారిపోయింది. వృద్ధాప్యంలో ఆమెకు ఎటువంటి నొప్పి గానీ ఏమీ తెలియలేదు’ అని వివరించారు. ఈ డాక్యుమెంట్ రాయల్ ఆర్కైవ్స్‌లో ఉన్నట్లు విశ్వసిస్తున్నారు. హార్డ్‌మాన్ ఇటీవల ప్రచురించిన ‘చార్లెస్ III: న్యూ కింగ్, న్యూ కోర్ట్.. ది ఇన్‌సైడ్ స్టోరీ’ అనే పుస్తకంలో ఓ భాగం ఇందులో ఉంది.

పుస్తకం ప్రకారం.. దివంగత రాణి పడక గదిలో రెండు లేఖలతో సురక్షితంగా లాక్ చేసిన ఎరుపు రంగు పెట్టె కనుగొన్న విషయాన్ని నొక్కి చెబుతుంది. లేఖలలో ఒకటి అప్పటి ప్రిన్స్ చార్లెస్‌, మరొకటి సర్ ఎడ్వర్డ్‌ను ఉద్దేశించింది. ఎలిజబెత్-2 మరణానికి ముందు.. రాజు, క్వీన్ కెమిల్లాలతో ఆమె వ్యక్తిగతంగా గంట గడిపారు. అనంతరం రాజు తన కుమారులిద్దరినీ సంప్రదించి, వీడ్కోలు పలికేందుకు వెంటనే స్కాట్‌లాండ్‌కు రావాలని వారిని కోరినట్లు నివేదించింది. తన తల్లిని కలిసి అక్కడ నుంచి బయటకు వచ్చి పుట్టగొడుగులు తీసుకుని బాల్మోరల్‌కు వెళ్తుండగా మరణ వార్త గురించి ఆయనకు తెలిసిందని పుస్తకంలో వివరించారు.