రేపు ఏపీకి రానున్న ప్రధాని.. లేపాక్షి సందర్శన్న

ప్రధాని నరేంద్ర మోదీ రేపు శ్రీ సత్యసాయి జిల్లాలో పర్యటించనున్నారు. ప్రముఖ పుణ్యక్షేత్రమైన లేపాక్షి ఆలయానికి నరేంద్ర మోదీ రానున్నారు. దీంతోపాటు పాల సముద్రంలో పలు ప్రాజెక్టులను జాతికి అంకితం చేయనున్న ప్రధాని నరేంద్ర మోదీ.. అక్కడ నిర్వహించనున్న బహిరంగ సభలో ప్రసంగించనున్నారు. ఈనెల 16 వ తేదీన శ్రీ సత్యసాయి జిల్లాలోని లేపాక్షి ఆలయంలో ప్రధాని పర్యటించనున్నారు. అనంతరం పాల సముద్రంలోని నేషనల్‌ అకాడమీ ఆఫ్‌ కస్టమ్స్, ఇన్‌ డైరెక్ట్‌ ట్యాక్సెస్‌ అండ్‌ నార్కోటిక్స్‌ను ప్రధాని మోదీ సందర్శించనున్నారు. అనంతరం అక్కడే ఏర్పాటు చేయనున్న బహిరంగ సభలో ప్రధాని పాల్గొననున్నారు.

మధ్యాహ్నం పాల సముద్రంకు చేరుకోనున్న ప్రధాని నేషనల్ అకాడమీ ఆఫ్ కస్టమ్స్, ఇన్‌ డైరెక్ట్ ట్యాక్సెస్ అండ్ నార్కోటిక్స్‌ను సందర్శించి.. ఆ భవనంలోని మొదటి అంతస్తులో ఉన్న యాంటీక్యూస్ స్మగ్లింగ్ స్టడీ సెంటర్‌ను, నార్కోటిక్స్ స్టడీ సెంటర్‌ను పరిశీలించనున్నారు. అదే విధంగా వైల్డ్ లైఫ్ క్రైమ్ డిటెక్షన్ కేంద్రాన్ని కూడా ప్రధాని సందర్శిస్తారు. అనంతరం గ్రౌండ్ ఫ్లోర్‌లోని ఎక్స్- రే, బ్యాగేజ్ స్క్రీనింగ్ కేంద్రాన్ని పర్యవేక్షించనున్నారు. తర్వాత అకాడమీ బ్లాక్ వద్ద రుద్రాక్ష మొక్కలను నాటి అక్కడ నిర్మాణ కార్మికులతో మాట్లాడి వారితో గ్రూప్ ఫోటో దిగనున్నారు.

ఆ తర్వాత 74, 75 వ బ్యాచ్‌ల ఆఫీసర్ ట్రైనీలతో కాసేపు ముచ్చటించనున్నారు. ఇక అక్కడ నిర్వహించనున్న బహిరంగ సభలో ఫ్లోరా ఆఫ్ పాలసముద్రం అనే పుస్తకాన్ని ప్రధాని మోదీ ఆవిష్కరించనున్నారు. అనంతరం నేషనల్ అకాడమీ ఆఫ్ కస్టమ్స్, ఇన్‌ డైరెక్ట్ ట్యాక్సెస్ అండ్ నార్కోటిక్స్ కేంద్రానికి అక్రిడిటేషన్ సర్టిఫికెట్‌ను అందిస్తారు. ప్రధాని మోదీ పర్యటించనున్న నేపథ్యంలో రాష్ట్ర ప్రభుత్వం అందుకు తగిన ఏర్పాట్లు చేస్తోంది. ప్రధాని పర్యటన ఏర్పాట్లపై సీఎస్‌ జవహర్‌ రెడ్డి.. అధికారులతో సమీక్ష నిర్వహించారు. అయితే ప్రధాని పర్యటనలో గవర్నర్ అబ్దుల్ నజీర్, ముఖ్యమంత్రి జగన్‌ మోహన్ రెడ్డి కూడా పాల్గొనే అవకాశం ఉందని సీఎస్ వెల్లడించారు. ఈ సందర్భంగా ప్రధాని రానున్న నేపథ్యంలో పటిష్ట భద్రతా చర్యలు చేపట్టాలని డీజీపీని ఆదేశించారు. ప్రధాని నరేంద్రమోదీ తన ఆంధ్రప్రదేశ్ పర్యటనను ముగించుకుని అక్కడి నుంచి కేరళ చేరుకోనున్నారు.