విశాఖ కొమిర ఊరమెట్టపై సొరంగం.. లోపల నిధులున్నాయా..?
Andhra Pradesh Telugu | Suryaa Desk | Published : Tue, Jan 16, 2024, 07:26 PM
విశాఖ కొమిర గ్రామంలోని ఊరమెట్ట ప్రాంతంలో ఓ పురాతన సొరంగం వెలుగు చూసింది. జల్‌జీవన్‌ మిషన్‌ పనుల్లో భాగంగా పైపులైను ఏర్పాటుకు కాలువ తవ్వుతుండగా గ్రామ సచివాలయ భవనానికి సమీపంలోని షటిల్‌ కోర్టు వద్ద ఈ సొరంగం బయిటపడింది. దీని పక్కనే జగనన్న కాలనీలో కోళ్ల అర్జున అనే వ్యక్తి ఇల్లు ఉంది. సమీపంలోని గ్రామ సచివాలయం, రైతు భరోసా కేంద్రంతో పాటు నూతన భవనాలు నిర్మాణంలో ఉన్నాయి.
పైపులైను వేసేందుకు మూడు అడుగుల లోతులో గొయ్యి తీయగా సొరంగం కనిపించడంతో ఇద్దరు కూలీలు తాళ్ల సాయంతో లోపలకు దిగారు. 15 అడుగుల దూరం వెళ్లి వెనక్కి తిరిగొచ్చారు. సొరంగం ఎంత దూరం ఉందో తెలుసుకునేందుకు మరికొందరు లోపలకు వెళ్లేందుకు యత్నించగా మట్టి పెళ్లలు పడుతుండటంతో గ్రామస్థులు వారించారు. ఎవరూ వెళ్లకుండా ముళ్లకంపతో కంచె వేయించినట్లు గ్రామ సర్పంచి చెప్పారు. పోలీసులకు సమాచారం ఇవ్వగా ఎస్సై ఉమామహేశ్వరరావు గ్రామానికి చేరుకుని సొరంగాన్ని పరిశీలించారు.
కొండ ప్రాంతం కావడంతో పైన రాతి పనుకులు ఉన్నాయని, కింద భాగంలో గుహగా కనిపిస్తోందని ఎస్సై చెప్పారు. అయితే లోపల నిధులు ఉన్నాయనే ప్రచారం జరుగుతోంది. విషయం ఆనోటా ఈనోటా పాకి సమీప గ్రామాల ప్రజలు అక్కడికి చేరుకొని సొరంగాన్ని చూస్తున్నారు. సొరంగం ఎంతదూరం ఉంది.. అందులో ఏమున్నాయనేది తెలియటానికి మరికొంత సమయం పట్టే అవకాశం ఉంది.
|
|