సెల్‌ఫోన్ యూజర్లకు గుడ్‌న్యూస్.. 50 ఏళ్ల పాటు ఛార్జింగ్ ఉండే బ్యాటరీ తయారీ

సెల్‌ఫోన్ అనేది ఇప్పుడు ప్రతీ ఒక్కరి జీవన విధానంలో భాగం అయిపోయింది. మనం ఇంట్లో నుంచి బయటికి వెళ్తున్నాం అంటే చాలు.. సెల్‌ఫోన్ లేకుండా అడుగు బయట పెట్టలేం. అయితే సెల్‌ఫోన్‌లో బ్యాటరీ అయిపోతుందని ఎప్పటికప్పుడు చూసుకుంటూనే ఉంటాం. ఇలాంటి ఛార్జింగ్ సమస్యలకు చెక్ పెట్టేందుకు శాస్త్రవేత్తలు పరిశోధనలు నిర్వహించారు. ఎటువంటి ఛార్జింగ్‌ లేకుండా 50 ఏళ్లపాటు పని చేసే బ్యాటరీని చైనాకు చెందిన ఒక కంపెనీ తయారు చేస్తోంది. ఈ బ్యాటరీకి సంబంధించిన వివరాలను ఆ కంపెనీ ఇటీవల వెల్లడించింది.

బీజింగ్‌కు చెందిన బీటావోల్ట్‌ అనే ఓ స్టార్టప్‌ కంపెనీ ఈ న్యూక్లియర్‌ బ్యాటరీని తయారు చేస్తోంది. బీవీ 100 పేరు గల ఈ బ్యాటరీ సైజు చాలా చిన్నగా ఉండనుంది. ఒక కాయిన్‌ కంటే చిన్నదిగా ఉండే ఆ బీవీ 100 బ్యాటరీని నికెల్‌-63 ఐసోటోప్‌, డైమండ్‌ సెమీ కండక్టర్‌లతో రూపొందిస్తున్నారు. 3 వోల్టుల వద్ద ఇది 100 మైక్రోవాట్ల శక్తిని విడుదల చేస్తుందని శాస్త్రవేత్తలు వెల్లడించారు. 2025 నాటికి ఈ బీవీ 100 బ్యాటరీని ఒక వాట్‌ ఉత్పత్తి చేసే లక్ష్యంగా ప్రయత్నాలు చేస్తున్నారు. అణు శక్తిని అత్యంత సూక్ష్మీకరణ చేసి ఈ బ్యాటరీని అభివృద్ధి చేసినట్లు తెలిపిన బీటావోల్ట్‌ కంపెనీ.. ఇది ప్రపంచంలోనే మొదటిది అని వెల్లడించింది. ప్రస్తుతం ఈ బ్యాటరీ పరీక్షల దశలో ఉందని బీటావోల్ట్ సంస్థ పేర్కొంది.

అయితే ఈ బీవీ 100 బ్యాటరీలను సెల్‌ఫోన్లలోనే కాకుండా ఏరో స్పేస్‌, ఆర్టిఫిషియల్ ఇంటెలిజెన్స్, చిన్న డ్రోన్లు, మైక్రో రోబోలలోనూ వాటిని ఉపయోగించుకోవచ్చని బీటావోల్ట్‌ కంపెనీ తెలిపింది. అయితే బీవీ 100 బ్యాటరీ నుంచి వచ్చే రేడియేషన్‌ మానవ శరీరానికి ఎలాంటి హాని కలిగించదని తెలిపింది. పేస్‌మేకర్ల వంటి వైద్య పరికరాల తయారీకి దీన్ని ఉపయోగించవచ్చని పేర్కొంది. పరీక్షల తర్వాత దీన్ని భారీ స్థాయిలో ఉత్పత్తి చేసేందుకు బీటావోల్ట్‌ సంస్థ సన్నాహాలు చేస్తున్నట్లు సమాచారం.