విమానంలో ఓ నిండు ప్రాణాన్ని కాపాడిన డాక్టర్.. మనసుల్ని తడిమే రియల్ స్టోరీ!

అది కొచ్చిన్ నుంచి ముంబై వెళ్తున్న ఆకా‌శ ఎయిర్‌లైన్స్ విమానం. ఓ డాక్టర్ శనివారం కొచ్చిన్ నుంచి ముంబై వెళ్లాల్సింది. కానీ ఆయన తన ప్రయాణాన్ని మరుసటి రోజుకు వాయిదా వేసుకోవాల్సి వచ్చింది. ఆయన ఏ కారణంతో జర్నీ వాయిదా వేసుకున్నారో తెలీదు గానీ.. అలా చేయడం వల్ల ఓ ప్రాణం నిలబడింది. అసలేం జరిగిందో ఆ డాక్టర్ మాటల్లోనే..

‘ఓ డాక్టర్‌గా విమానంలో ప్రయాణిస్తున్న సమయంలో మూడున్నరేళ్ల తర్వాత నేను తొలిసారి స్టెతస్కోప్ వాడాను. ఆకాశ ఎయిర్‌లైన్స్‌లో కొచ్చి నుంచి ముంబై వెళ్తుండగా ఇది జరిగింది.. పగలంతా పని చేయటంతోపాటు రాత్రి సమయంలో ప్రయాణం కావడంతో అప్పటికే నేను అలసిపోయాను. దీంతో నిద్రపోవడానికి ప్రయత్నిస్తున్నాను.

కానీ నా పక్క సీట్లో కూర్చున్న వ్యక్తి ఊపిరి పీల్చుకోవడానికి ఇబ్బందిపడుతున్నాడు. దీంతో ఎయిర్ హోస్టెస్ ఆయనకు నెబ్యులైజేషన్ ద్వారా అత్యవసరంగా ఇన్‌హాలేషనల్ ట్రీట్మెంట్ ఇస్తోంది. దీంతో నెబ్యులేజెషన్ మెషీన్ పని చేసేలా ఆమెకు నేను సాయం చేశాను. ఆయన సరిగా మాట్లాడలేకపోతున్నారు. నెబ్యులైజేషన్ పెట్టినా ఆయన పరిస్థితి మెరుగవలేదు.

ఆయన వేలికి ఉన్న ఆక్సీమీటర్ చూస్తే.. ఆక్సిజన్ సాచ్యురేషన్ 36 శాతంగా ఉంది. దీంతో మీకు ఆస్తమా ఉందా అని అడిగాను. దానికి ఆయన లేదని బదులిచ్చాడు. మరి ఆస్తమా లేనప్పుడు నెబ్యులైజేషన్ కిట్ ఎందుకని నాకు అనిపించింది. దీంతో స్టెతస్కోప్ సాయంతో ఆయన ఛాతిని పరిశీలించాను. ఎడమవైపు ఊపిరితిత్తి నుంచి ఎలాంటి శబ్దం వినిపించలేదు. అందులోకి నీరు చేరింది. ఈ పరిస్థితిని ప్లూరల్ ఎఫ్యూజన్ అంటారు.

అతి కష్టం మీద శ్వాస తీసుకుంటూ.. నా కిడ్నీలు బాగోలేవని ఆయన చెప్పారు. మీకు డయాలిసిస్ చేస్తున్నారా..? అని నేను అడగ్గా.. మూడు రోజులకోసారి చేస్తున్నారని.. మరుసటి రోజు డయాలిసిస్ చేయాల్సి ఉందని, గత రాత్రే మందులు అయిపోయాయని చెప్పారు. ప్రిస్క్రిప్షన్ చూడటం కోసం ఆయన ఫోన్ తీసుకొని ఫొటోలు చూశాను. గతంలో ఆయనకు ఎక్కువగా హై బీపీకి సంబంధించిన మందులు రాశారు. దీంతో ఆయన బీపీ చెక్ చేయగా.. రక్తపోటు 280/160గా ఉంది. ఊపిరితిత్తులు నీటితో నిండుతున్న కొద్దీ ఆయనకు బీపీ పెరుగుతోంది. ఎమర్జెన్సీ ల్యాండింగ్ కోసం మాకు ఇంకా గంట సమయం ఉంది. అప్పటి వరకూ ఆయన ప్రాణాలను మేం కాపాడాలి.

ఆ తర్వాత ఏం జరిగిందో నాకు ఐడియా లేదు, కానీ నేను ఐసీయూలో ఉన్నట్టుగా భావించి వెంటవెంటనే నిర్ణయాలు తీసుకోవడం మొదలుపెట్టాను. కుడివైపు నరానికి డబుల్ పంక్చర్ చేశాను. డయాలిసిస్ కారణంగా అతడి అప్పర్ లింబ్‌కు ఫిస్టులా ఉంది. దీంతో దాన్ని నేను వాడలేకపోయాను. వెంటనే ఆయన తుంటికి ఫ్రుసెమైడ్ ఇంజెక్షన్ ఇచ్చాను. ఆయన ఇబ్బంది పడుతుండటం, విమానంలో కొద్దిగా ఇబ్బంది ఉండటంతో ఆయన నరాలను వెతికి పట్టుకోవడం కష్టం. అందుకే నొప్పిగా ఉన్నాసరే తుంటికి ఆ ఇంజెక్షన్ ఇవ్వాల్సి వచ్చింది. ఓ దశలో ఆయన నా భుజం మీదకు జారిపోయి, రొప్పడం మొదలుపెట్టాడు. ఆయనకు కంఫర్ట్ ఇస్తూనే.. కంగారేం లేదు మరో అర గంటలో విమానం దిగుతామని చెప్పాను.

ఆకాశ ఎయిర్‌లైన్స్‌కు చెందిన ఇద్దర అటెండెంట్లు చాలా ప్రశాంతంగా నా సూచనలను పాటిస్తూ.. నేను ప్రశాంతంగా పని చేసేందుకు సహకరించారు. వెంటనే ఆక్సిజన్ సిలిండర్లను మార్చేశారు. దీంతో ఆయన ఆక్సిజన్ లెవల్స్ 90 శాతానికి చేరుకున్నాయి. విమానంలోని ఈఆర్ కిట్‌లో బీపీ తగ్గించే మందులు కనిపించడంతో.. వాటిని ఆయనతో మింగించాను. ఆయన్ను విమానం నుంచి దింపేలోపు.. నా చేతిలో తన ఫోన్ ఉంచి.. మీ ఫోన్ నంబర్ ఎంటర్ చేయండని కోరారు. నేను నా ఫోన్ నంబర్ ఎంటర్ చేసి.. ఆయన ఫోన్‌ను తిరిగి ఆయన పౌచ్‌‌లో పెట్టేశాను.

విమానంలో ఆ గంటసేపు పడిన టెన్షన్.. రోజంతా ఐసీయూలో ఉన్నట్టుగా అనిపించింది. మేం అనుకున్న టైం కంటే ముందే ల్యాండయ్యాం. అప్పటికి ఆయన నీరసంగా కనిపించారు, శ్వాస తీసుకోవడంలో ఇంకా ఇబ్బందిపడుతున్నారు. కానీ బీపీ కంట్రోల్‌లోకి వచ్చింది. విమానం ల్యాండ్ కాగానే.. ఫోన్ ద్వారా ఆయన కుటుంబ సభ్యులకు సమాచారం ఇచ్చాను. వాళ్లు వెంటనే వచ్చి అంబులెన్స్‌లో ఆయన్ను దగ్గర్లోని హాస్పిటల్‌కు తీసుకెళ్లారు.

మరుసటి రోజు ఆయన ఆరోగ్యం బాగుందని.. ఆయన కుటుంబ సభ్యులు నాకు మెసేజ్ చేశారు. సాయంత్రం నా పాడ్‌కాస్ట్ రికార్డింగ్ అయిపోయాక.. ఆ పేషెంటే నాకు కాల్ చేసి ఎమర్జెన్సీ డయాలసిస్ అయిపోయాక తనను ఐసీయూ నుంచి షిఫ్ట్ చేశారని చెప్పారు. తన శరీరంలో పొటాషియం లెవల్స్ 9గా ఉందని.. కిడ్నీ పనితీరు నియంత్రణ కోల్పోయిందని చెప్పారు. డయాలిసిస్ సమయంలో ఎక్స్‌ట్రా ఫ్లూయిడ్‌ను తొలగించడంతో.. రాత్రయ్యే సరికి ఆయన ఆరోగ్యం మెరుగైంది. ఆకాశ ఎయిర్‌‌లైన్స్ సిబ్బంది, నేను కలిసి ఓ వ్యక్తి ప్రాణాలను కాపాడగలిగాం. ఆ హడావుడిలో నాకు సాయం చేసిన ఆ ఇద్దరి పేర్లు అడగలేకపోయాను. కానీ వాళ్ల సాయం లేకపోతే ఇది సాధ్యమయ్యేది కాదు’ అని కొచ్చికి చెందిన హెపటాలిజస్ట్ అండ్ లివర్ ట్రాన్స్‌ప్లాంట్ ఫిజిషియన్ అయిన ఆ డాక్టర్ తన అనుభవాన్ని ఎక్స్‌ (ట్విటర్)లో పోస్టు చేశారు. ఆ పేషెంట్ భార్య వాట్సాప్ ద్వారా తనతో చేసిన చాట్‌ను కూడా డాక్టర్ సోషల్ మీడియాలో ఉంచారు. ఆ దేవుడు మిమ్మల్ని చల్లగా చూడాలి. మీరు ఇలా పని చేయండి.. ఆ దేవుడే మీ ద్వారా ఇదంతా చేయిస్తున్నాడని ఆమె ఆ డాక్టర్‌‌కు కృతజ్ఞతలు తెలిపారు.