తీరు మార్చుకోని చైనా.. అతి ప్రమాదకరమైన కరోనా వైరస్‌పై ప్రయోగాలు.. సోకితే మరణమే

ప్రపంచం మొత్తాన్ని వణికించిన ప్రమాదకరమైన కరోనా వైరస్ నుంచి ఇప్పుడిప్పుడే అన్ని దేశాలు కోలుకుంటున్నాయి. ఇటీవల మరోసారి కొన్ని దేశాల్లో కొవిడ్ సబ్ వేరియంట్‌ వెలుగుచూసింది. దీంతో మళ్లీ కొవిడ్ భయాలు నెలకొన్నాయి. అయితే ఈ సబ్ వేరియంట్ కారణంగా మరణాల సంఖ్య పెరగకపోవడంతో అంతా ఊపిరి పీల్చుకున్నారు. ఈ క్రమంలోనే మరో పిడుగు లాంటి వార్త బయటికి వచ్చింది. కరోనా వైరస్ జాతికి చెందిన అత్యంత ప్రమాదకరమైన సబ్ వేరియంట్‌పై చైనా ప్రయోగాలు చేస్తున్నట్లు వార్తలు రావడం సంచలనంగా మారింది. ఈ వైరస్ చాలా ప్రమాదకరమైందని.. ఇది సోకితే వంద శాతం మరణం తథ్యమేననే వార్తలు మరోసారి తీవ్ర భయాందోళనలకు గురి చేస్తోంది.

కొవిడ్ జాతికి చెందిన మరో డేంజరస్ వైరస్‌పై చైనా ప్రయోగాలు చేస్తున్నట్లు అంతర్జాతీయ మీడియాల్లో కథనాలు రావడం పెను సంచలనంగా మారింది. వూహాన్‌లో జరిపిన ఓ అధ్యయనంలో ఈ విషయం బయటపడినట్లు ఆ మీడియా కథనాల ద్వారా తెలుస్తోంది. వూహాన్‌లో నిర్వహించిన అధ్యయన వివరాల ప్రకారం.. సార్స్‌కోవ్-2 కు చెందిన జీఎక్స్ పీ2వీ అనే సబ్ వేరియంట్‌పై చైనా శాస్త్రవేత్తలు ప్రయోగాలు చేస్తున్నారు. ఇది 2017లో వెలుగుచూసిన జీఎక్స్‌ వేరియంట్‌కు మ్యూటేషన్ అని సమాచారం. అయితే ఇంతకుముందు ఈ జీఎక్స్ వేరియంట్‌ను మలేషియన్‌ పాంగోలిన్స్‌ జంతువుల్లో గుర్తించారు.

అయితే ఈ జీఎక్స్ పీ2వీ మ్యుటేటెడ్ వైరస్‌ను ముందుగా చైనా శాస్త్రవేత్తలు.. ఎలుకలపై ప్రయోగించినట్లు తెలుస్తోంది. అయితే ఆ వైరస్‌ ఎలుకలపై పెను ప్రభావాన్ని చూపినట్లు సమాచారం. కేవలం 8 రోజుల్లోనే ఆ ఎలుకలు అన్నీ చనిపోయాయని ఆ అధ్యయనం వెల్లడించింది. ఈ జీఎక్స్ పీ2వీ వేరియంట్ కారణంగా ఎలుకల ఊపిరితిత్తులు, ఎముకలు, కళ్లు, మెదడు తీవ్రంగా దెబ్బతిన్నాయని అధ్యయనం తెలిపింది. ఆ ఎలుకలు బరువు తగ్గి చాలా బలహీనంగా మారాయని.. రెండు మూడు రోజుల్లోనే నడవలేని స్థితికి చేరుకుని ఆరోగ్యం పూర్తిగా క్షీణించినట్లు తెలుస్తోంది. ఈ జీఎక్స్ పీ2వీ వైరస్‌ చాలా ప్రమాదకరమైందని ఆ అధ్యయనం స్పష్టం చేసింది.

అయితే ఈ జీఎక్స్ పీ2వీ వైరస్‌.. మానవులపై ఎలాంటి ప్రభావం చూపిస్తుందనే దానిపై ఇప్పటికైతే స్పష్టత లేదు. అయినా ఎలుకలపై ఉన్న ప్రభావం, లక్షణాలే మనుషులపైనా ఉండొచ్చనే వాదనలు వినిపిస్తున్నాయి. ఈ జీఎక్స్ పీ2వీ వైరస్‌తో మనుషులకు పెను ముప్పు వాటిల్లనుందని అర్థమవుతోందని ఆ అధ్యయనం నిర్వహించినవారు పేర్కొన్నారు. ఈ అధ్యయనం బయటికి రావడంతో చైనా చేస్తున్న ప్రయోగాలు మరోసారి యావత్ ప్రపంచాన్ని తీవ్ర భయాందోళనలోకి నెట్టివేస్తున్నాయి. అయితే ఈ జీఎక్స్ పీ2వీ వైరస్‌కు సంబంధించిన ప్రయోగాలతో వూహాన్‌ ల్యాబ్‌కు ఎలాంటి సంబంధం లేదని ఆ అధ్యయనం తెలిపింది.

అయితే గతంలో మానవాళిని భయపెట్టిన కరోనా వైరస్‌.. ఆ వూహాన్ ల్యాబ్ నుంచే లీక్‌ అయ్యిందనే ఆరోపణలు ఉన్నాయి. అయితే ప్రపంచ దేశాలు, ఎన్నో అంతర్జాతీయ సంస్థలు కరోనా పుట్టుక చైనాలోనే అని పేర్కొన్నాయి. కానీ చైనా మాత్రం తమకేమీ సంబంధం లేదని చేతులు దులుపుకుంటోంది. అయితే ప్రపంచాన్ని వణికించిన కరోనా మహమ్మారి పుట్టుక రహస్యం ఇప్పటికీ వీడనేలేదు. ఈ వైరస్‌ను ప్రపంచ దేశాలపై జీవాయుధంగా ప్రయోగించాలని చైనా దాన్ని విడుదల చేసిందనే ఆరోపణలు తీవ్రంగా వెల్లువెత్తాయి.