పాకిస్థాన్‌పై ఇరాన్ ఎయిర్‌స్ట్రైక్.. తీవ్ర పరిణామాలుంటాయని హెచ్చరించిన పాక్

పాకిస్థాన్‌ లోని బలూచిస్థాన్‌ ప్రాంతంలో దాడులు చేసినట్లు ఇరాన్ ప్రకటించింది. ఆ ప్రాంతంలో ఉన్న తీవ్రవాదుల స్థావరాలే లక్ష్యంగా డ్రోన్లు, క్షిపణులతో దాడులు చేసినట్లు వెల్లడించింది. జైష్‌ అల్‌ అదిల్‌ అనే ఉగ్ర సంస్థకు చెందిన 2 ప్రధాన కార్యాలయాలపై దాడులు చేసినట్లు ఇరాన్ తెలిపింది. ఈ దాడుల్లో జైష్ అల్ అదిల్ రెండు స్థావరాలు ధ్వంసమైనట్లు పేర్కొంది. అయితే ఇంతకు ముందు బలూచిస్థాన్ కేంద్రంగా ఉన్న జైషే అల్ అదిల్ మిలిటెంట్లు తమ భద్రతా బలగాలపై దాడి చేశారని ఇరాన్ ఆరోపించింది. దీనికి ప్రతీకారంగానే బలూచిస్తాన్‌లోని ఉగ్ర స్థావరాలపై దాడి చేసినట్లు సమాచారం. సున్నీ మిలిటెంట్‌ గ్రూపు అయిన జైష్‌ అల్‌ అదిల్‌.. పాకిస్థాన్‌లోని బలూచిస్థాన్ కేంద్రంగా పని చేస్తూ ఇరాన్‌లోని సిస్థాన్‌-బలూచిస్థాన్‌లో కార్యకలాపాలను నిర్వహిస్తోంది.

అయితే ఇరాన్ చేసిన దాడులను పాకిస్థాన్ తీవ్రంగా ఖండించింది. తమ భూభాగంలోని తీవ్రవాద స్థావరాలే లక్ష్యంగా దాడి చేశామంటూ ఇరాన్‌ చెప్పడాన్ని తప్పుపట్టింది. ఇరాన్ చేసిన దాడుల్లో ఇద్దరు చిన్న పిల్లలు చనిపోయారని తెలిపింది. మరో ముగ్గురికి తీవ్ర గాయాలయ్యాయని చెప్పింది. ఇలాంటి చర్యలకు తీవ్రమైన పరిణామాలుంటాయని ఇరాన్‌కు పాకిస్థాన్ గట్టి హెచ్చరికలు జారీ చేసింది. ఇరాన్‌ చర్యలను ఖండిస్తూ ఆ దేశ రాయబారిని పిలిపించిన పాక్‌ విదేశాంగ కార్యాలయం.. తమ నిరసనను వ్యక్తం చేసింది. పాక్‌ గగనతలాన్ని దుర్వినియోగం చేస్తూ.. తమ దేశ సౌర్వభౌమాధికారాన్నే ఇరాన్ సవాల్‌ చేసిందని తీవ్ర స్థాయిలో ఆక్షేపించింది.

పాక్, ఇరాన్ దేశాల మధ్య సమాచారం ఇచ్చిపుచ్చుకోవడానికి కొన్ని మార్గాలు ఉన్నాయని ఈ సందర్భంగా పాకిస్థాన్‌ గుర్తు చేసింది. వాటిని కాదని.. ఇరాన్‌ ఇలా దాడులు చేయడాన్ని తీవ్రంగా ఖండిస్తున్నామని తెలిపింది. అయితే దాడులు సరిగ్గా ఎక్కడ జరిగాయనే విషయాన్ని మాత్రం పాక్‌ వెల్లడించలేదు. ఉగ్రవాదం అన్ని దేశాలకూ తీవ్ర ముప్పేనని పేర్కొన్న పాకిస్థాన్.. దాన్ని అన్ని దేశాలు కలిసికట్టుగా ఎదుర్కోవాల్సిన అవసరం ఉందని తెలిపింది. కానీ ఇలా ఏకపక్షంగా వ్యవహరించడం పొరుగు దేశాల మధ్య సత్సంబంధాలను మెరుగుపరచలేదని వ్యాఖ్యానించింది. దీని వల్ల రెండు దేశాల మధ్య ఉన్న ద్వైపాక్షిక బంధం తీవ్రంగా దెబ్బతినేలా ఇరాన్ చేసిందని పాక్‌ మండిపడింది.