పూర్ టు రిచ్ కాన్సెప్టు ఆవిష్కరించిన చంద్రబాబు

ఎన్టీఆర్‌ వర్ధంతి సందర్భంగా ఆయన స్వగ్రామం కృష్ణా జిల్లా నిమ్మకూరులో తెలుగుదేశం పార్టీ అధ్యక్షుడు చంద్రబాబు నాయుడు, భువనేశ్వరి దంపతులు పర్యటించారు. ఎన్టీఆర్‌, బసవతారకం విగ్రహాలకు పూలమాలలు వేసి నివాళులు అర్పించారు. అనంతరం ఏర్పాటు చేసిన సభలో ‘పూర్‌ టు రిచ్‌’ కాన్సెప్ట్‌ను ఆవిష్కరించారు టీడీపీ అధినేత. ఈ కాన్సెప్ట్ లక్ష్యాలను వివరించారు. పేదరిక నిర్మూలన, పేదలను సంపన్నులుగా చేసే లక్ష్యంతో ఈ కాన్సెప్ట్‌ను (Poor To Rich Policy) రూపొందించినట్లు చంద్రబాబు నాయుడు తెలిపారు. టీడీపీ మినీ మేనిఫెస్టోలో ఈ కాన్సెప్టును పెట్టినట్లు గుర్తుచేశారు. చంద్రబాబు ప్రకటించిన ‘పూర్ టు రిచ్’ కాన్సెప్టు గురించి ఇప్పుడు ఆంధ్రప్రదేశ్‌లో చర్చ జరుగుతోంది. ఈ నేపథ్యంలో ఈ కాన్సెప్టు వివరాలు..

 టీడీపీ ‘పూర్ టు రిచ్’ కాన్సెప్టు ముఖ్యాంశాలు:

★ సంపద సృష్టించి అది పేదలు అనుభవించేలా చేయడమే పేదరిక నిర్మూలన ప్రాజెక్టు (పూర్ టు రిచ్) ముఖ్య ఉద్దేశం అని చంద్రబాబు చెప్పారు.

★ దీని ద్వారా ఆర్థికంగా వెనుకబడిన వర్గాలకు చేయూత అందించడం, ఆదాయాన్ని రెట్టింపు చేసే మార్గాలను అన్వేషించడం లక్ష్యం.

★ ప్రభుత్వ, ప్రైవేటు, ప్రజల భాగస్వామ్యంతో ‘పూర్ టు రిచ్’ ప్రోగ్రామ్ కింద అభివృద్ధి పనులు చేపడతారు.

‘ఉదాహరణకు.. నిమ్మకూరు గ్రామంలో మొత్తం 1800 ఎకరాల వ్యవసాయ భూమి ఉంది. కానీ, గ్రామంలో ప్రస్తుతం వ్యవసాయం చేస్తోంది 80 మంది మాత్రమే. చాలా మంది ఇతర ప్రాంతాలకు వలస వెళ్లారు. గ్రామం నుంచి పారిశ్రామికవేత్తలుగా ఎదిగిన వారున్నారు. వారందరూ స్వగ్రామంలో కుటుంబాలను బాగు చేసే బాధ్యత తీసుకోవాలి. ప్రజల భాగస్వామ్యంతో అభివృద్ధి ప్రణాళికలను రూపొందించాలి. ప్రభుత్వం ప్రత్యక్షంగా లేదా ప్రైవేట్ సంస్థల ద్వారా సాయం అందిస్తుంది’ అని పూర్ టు రిచ్ కార్యక్రమం గురించి చంద్రబాబు నాయుడు వివరించారు.

ఇది ఆరంభం మాత్రమేనని, అందరి ఆలోచనలు తీసుకుని మరిన్ని విధానాలు జోడిస్తామని చంద్రబాబు నాయుడు చెప్పారు. పేదరిక నిర్మూలన పథకంలో పైలెట్‌ ప్రాజెక్టు కింద నిమ్మకూరు, నారావారిపల్లె గ్రామాలను ఎంపిక చేసినట్టు చంద్రబాబు నాయుడు తెలిపారు. ఎన్టీఆర్‌ మెమోరియల్‌ ట్రస్ట్‌ ఆధ్వర్యంలో సహకారం అందించి ఈ రెండు గ్రామాల్లో త్వరలో అభివృద్ధి కార్యక్రమాలు చేపడతామని హామీ ఇచ్చారు.