మణిపూర్‌లో మళ్లీ హింస.. ఐదుగురు పౌరులు మృతి.. పరిస్థితి మొదటికి

మెయితీ, కుకీ తెగల మధ్య వైరంతో గతేడాది ఈశాన్య రాష్ట్రం మణిపూర్ అట్టుడికిపోయింది. హింసాత్మక ఘటనలు, కాల్పులతో నిత్యం దద్దరిల్లిపోయింది. కేంద్ర బలగాలు రంగంలోకి దిగినా పరిస్థితి మారలేదు. అయితే గత కొన్ని రోజులుగా ఆ రాష్ట్రంలో హింస తగ్గి కొద్దిగా శాంతియుత పరిస్థితులు నెలకొంటున్న వేళ.. తాజాగా మరోసారి హింస చెలరేగింది. కాల్పుల మోతతో మళ్లీ మణిపూర్‌లో వణికిపోయింది. మణిపూర్‌లో జరిగిన వేర్వేరు ఘటనల్లో దుండగులు జరిపిన కాల్పుల్లో ఐదుగురు పౌరులు చనిపోయారు. బిష్ణుపూర్ జిల్లాలో నలుగురు పౌరులు చనిపోగా.. కాంగ్‌పోక్పి జిల్లాలో ఒక వ్యక్తి హత్యకు గురయ్యారు. ఈ ఘటనలతో రంగంలోకి దిగిన పోలీసులు నిందితుల కోసం గాలిస్తున్నారు.

అయితే బిష్ణుపూర్‌లో చనిపోయిన వారిని ఓనామ్ బమోంజావో సింగ్ (61), ఆయన కుమారుడు ఓనామ్ మణితోంబ సింగ్ (32), తియం సోమేంద్ర సింగ్ (55), నింగ్‌థౌజం నబద్విప్ సింగ్ (40)గా పోలీసులు గుర్తించారు. ఇక కాంగ్‌పోక్పిలో మరణించిన వ్యక్తిని తఖెల్లంబమ్ మనోరంజన్‌ అని తెలిపారు. అయితే అర్ధరాత్రి జరిగిన ఎదురుకాల్పుల్లోనే మనోరంజన్ మృతి చెందినట్లు పోలీసులు అనుమానం వ్యక్తం చేస్తున్నారు. స్థానికంగా ఉన్న ఓ బంకర్‌ నుంచి మనోరంజన్ మృతదేహాన్ని పోలీసులు స్వాధీనం చేసుకున్నారు.

మరోవైపు.. బుధవారం రాత్రి తౌబల్ జిల్లాలో జరిగిన కాల్పుల్లో ముగ్గురు బోర్డర్ సెక్యూరిటీ ఫోర్స్‌ సిబ్బందికి గాయాలయ్యాయి. అర్ధరాత్రి సమయంలో నిద్రిస్తున్న బీఎస్ఎఫ్ సిబ్బందిపై దుండగులు విచక్షణ రహితంగా కాల్పులకు తెగబడ్డారు. అంతకుముందు మంగళవారం అర్ధరాత్రి జరిగిన ఎదురుకాల్పుల్లో ఓ భద్రతా అధికారి మృతి చెందడం సంచలనంగా మారింది. గత ఏడాది మే 2 వ తేదీన మణిపూర్‌లో మెయితీ, కుకీ తెగల మధ్య ఘర్షణ ప్రారంభం అయింది. అప్పటి నుంచి రెండు తెగల ప్రజలు ఒకరిపై ఒకరు హింసకు దిగుతున్నారు. ఈ హింసాత్మక ఘటనల్లో 200 మందికిపైగా ప్రజలు చనిపోగా.. వేలాది మంది గాయాలపాలయ్యారు. అయితే కేంద్ర, రాష్ట్ర ప్రభుత్వాలు ఎన్ని చర్యలు చేపట్టినా.. మణిపూర్‌లో హింసాత్మక ఘటనలు తగ్గడం లేదు.