మిజోరంలోకి 600 మంది మయన్మార్ సైనికులు.. కేంద్రాన్ని అప్రమత్తం చేసిన ప్రభుత్వం
national | Suryaa Desk | Published : Sat, Jan 20, 2024, 10:32 PM
మయన్మార్‌లో నెలకొన్న అంతర్యుద్ధం భారత్‌పై ప్రభావాన్ని చూపిస్తోంది. మయన్మార్‌కు చెందిన వందలాది మంది సైన్యం.. మిజోరంలోకి చొరబడుతోంది. దీంతో అప్రమత్తమైన మిజోరం సీఎం లాల్‌దుహోమా.. కేంద్ర ప్రభుత్వానికి పరిస్థితిని వివరించారు. మయన్మార్‌లో ప్రస్తుతం చోటు చేసుకున్న పరిస్థితులతో అక్కడి సైన్యం, ప్రజలు.. భారత్‌లోకి చేరుకుంటున్నారని.. ఇలాంటి ఘటనలతో మిజోరంలో ఉద్రిక్త పరిస్థితులు నెలకొనే అవకాశం ఉందని లాల్‌దుహోమా పేర్కొన్నారు. సరిహద్దుల నుంచి మయన్మార్ సైనికులు భారత్‌లోకి ప్రవేశిస్తున్నారని.. మిజోరం సీఎం లాల్‌దుహోమా కేంద్ర ప్రభుత్వాన్ని ఆశ్రయించారు. వెంటనే మయన్మార్ సైన్యాన్ని తిరిగి వెనక్కి పంపించేలా చర్యలు తీసుకోవాలని కోరారు. అయితే ప్రస్తుత పరిస్థితులపై మిజోరం ముఖ్యమంత్రి లాల్‌దుహోమా.. కేంద్ర హోం శాఖ మంత్రి అమిత్‌ షాతో చర్చించారు. భారత్‌లో ఆశ్రయం పొందేందుకు మయన్మార్ ప్రజలు సరిహద్దులు దాటి మిజోరంలోకి ప్రవేశిస్తున్నారని చెప్పారు. మానవతా దృక్పథంతో తాము వారికి సాయం చేస్తున్నామని.. ఇప్పుడు ఆ దేశం నుంచి సైనికులు కూడా వస్తూన్నారని వివరించారు. ఇప్పటికే 400 మందిని వెనక్కి పంపించేసినట్లు అమిత్‌ షాతో సమావేశం తర్వాత సీఎం లాల్‌దుహోమా మీడియాకు వెల్లడించారు. మయన్మార్‌లో పెరుగుతున్న ఘర్షణలు అక్కడ అస్థిరతకు దారితీసే ప్రమాదం ఉందని తీవ్ర ఆందోళన వ్యక్తమవుతోంది. ఈ క్రమంలోనే కేంద్రాన్ని మిజోరం సీఎం అప్రమత్తం చేశారు.
మన దేశానికి పొరుగున ఉన్న మయన్మార్‌లో గత కొంతకాలంగా తీవ్ర ఉద్రిక్త పరిస్థితులు నెలకొన్నాయి. అక్కడి ప్రజా ప్రభుత్వాన్ని పడగొట్టి అధికారాన్ని చేజిక్కించుకున్న సైనిక పాలనకు వ్యతిరేకంగా అక్కడి పౌర సమాజం ఎదురు తిరుగుతోంది. ఆయుధాలు పట్టుకుని మిలిటరీ ప్రభుత్వాన్ని గద్దె దించేందుకు ప్రయత్నాలు చేస్తోంది. దీంతో ఇరు వర్గాల మధ్య తీవ్ర ఉద్రిక్తతలు, పోరు జరుగుతోంది. ఈ క్రమంలోనే పక్కనే ఉన్న భారత్‌లోకి మయన్మార్ నుంచి భారీగా ప్రజలు, సైనికులు వలస వస్తున్నారు. అక్కడి క్యాంపులో తలదాచుకుంటున్నట్లు మిజోరం ప్రభుత్వం తెలిపింది. ఇక మయన్మార్‌లో పరిపాలన కొనసాగిస్తున్న సైన్యానికి గత కొంతకాలంగా తీవ్ర ఎదురుదెబ్బలు తగులుతున్నాయి. ప్రజాస్వామ్య అనుకూలవాదులతో కూడిన సాయుధులు బృందాలుగా ఏర్పడి సైనిక ప్రభుత్వాన్ని సవాల్ చేస్తున్నాయి. ఈ నేపథ్యంలోనే ఇప్పటివరకు 600 మంది మయన్మార్ సైనికులు సరిహద్దులు దాటి భారత్‌లోకి ప్రవేశించినట్లు తెలుస్తోంది. రెబల్‌ గ్రూప్‌ అరాకన్‌ ఆర్మీ తమ శిబిరాలను స్వాధీనం చేసుకోవడంతో వారంతా మిజోరంలోని లాంగ్‌ట్లాయ్‌ జిల్లాలో ఆశ్రయం పొందుతున్నారని ప్రభుత్వ వర్గాలు వెల్లడించాయి. అస్సాం రైఫిల్స్ క్యాంపుల్లో మయన్మార్ సైన్యం ఉంటున్నట్లు సమాచారం.
ఇక 2021లో మయన్మార్‌లో ప్రజాస్వామ్య ప్రభుత్వాన్ని కూల్చి సైన్యం అధికారాన్ని చేజిక్కించుకుంది. మరోవైపు.. ప్రజాస్వామ్య అనుకూల గ్రూపులు పలు ప్రాంతాల్లో సమాంతర ప్రభుత్వాన్ని నడిపిస్తున్నాయి. ఈ క్రమంలో 2 వర్గాల మధ్య తీవ్ర ఘర్షణలతో మయన్మార్‌లో అంతర్యుద్ధం తీవ్రమైంది. ఈ దాడుల్లో త్రీబ్రదర్‌హుడ్‌ అలయన్స్‌ (టీబీఏ) కీలక పాత్ర పోషిస్తోంది. ఇందులో దేశంలో అత్యంత శక్తిమంతమైన సాయుధ తిరుగుబాటు సంస్థలుగా పేరున్న మయన్మార్ జాతీయ ప్రజాస్వామ్య కూటమి సైన్యం (ఎంఎన్‌డీఏఏ), టాంగ్‌ జాతీయ విమోచన సైన్యం(టీఎన్‌ఎల్‌ఏ), అరాకన్‌ ఆర్మీ(ఏఏ) కూడా పాల్గొంటున్నాయి.
|
|