టీడీపీ ఎమ్మెల్యే అభ్యర్థిగా ఎస్సై సుధాకర్,,,,సోషల్ మీడియాలో జోరుగా సాగుతున్న చర్చ

ఆంధ్రప్రదేశ్‌లో ఎన్నికల వేడి మొదలైంది. వైఎస్సార్‌సీపీ, టీడీపీ-జనసేనలు ఆ దిశగా కసరత్తును మొదలు పెట్టాయి. వైఎస్సార్‌సీపీ అభ్యర్థుల ఎంపికలో బిజీగా ఉంటే.. టీడీపీ-జనసేన పార్టీలు ప్రచారాన్ని మొదలు పెట్టాయి. అలాగే త్వరలోనే మేనిఫెస్టోతో పాటుగా అభ్యర్థుల్ని ఖరారు చేసే పనిలో ఉన్నారు. ఇదిలా ఉంటే.. టీడీపీ-జనసేన కూటమి అభ్యర్థుల ఎంపికపై సీరియస్‌గా ఫోకస్ పెట్టింది. ఈ క్రమంలో ఆశావహుల పేర్లు తెరపైకి వస్తున్నాయి.. కొందరు కొత్తవారికి కూడా అవకాశం ఇస్తారనే ప్రచారం జరుగుతోంది.

అనంతపురం జిల్లా గుంతకల్లు నియోజకవర్గం నుంచి మరో కొత్త పేరు తెరపైకి వచ్చింది. వచ్చే ఎన్నికల్లో పోలీస్ అధికారిని పోటీ చేయిస్తారని సోషల్ మీడియాలో ప్రచారం జరుగుతోంది.'జయహో బీసీ నిజాయితీని గుర్తించి టీడీపీ అధిష్టానం పిలుపుమేరకు గుంతకల్ నియోజకవర్గం నుంచిటీడీపీ ఎమ్మెల్యే అభ్యర్థిగా బరిలోకి దిగుతున్న ఎస్ఐ సుధాకర్ యాదవ్ గారికి హృదయపూర్వక శుభాకాంక్షలు' అంటూ కొందరు ట్వీట్లు చేస్తున్నారు. అంతేకాదు మరికొందరు ఏకంగా ఆయన్ను ట్యాగ్ చేస్తూ ఫేస్‌బుక్‌లో పోస్టులు కూడా పెట్టారు.

ఎస్సై సుధాకర్ గుంతకల్లు నియోజకవర్గం నుంచి టీడీపీ అభ్యర్థిగా బరిలోకి దిగుతారని చెబుతున్నారు. బీసీ వ్యక్తి, నిజాయితీగా పనిచేస్తున్నందుకు టీడీపీ అధిష్టానం ఆయన వైపు మొగ్గు చూపుతున్నట్లు చెబుతున్నారు కొందరు తెలుగు తమ్ముళ్లు. టీడీపీ అధిష్టానం పిలుపుతోనే ఆయన ఎన్నికల బరిలో దిగబోతున్నారని వారు చెప్పుకొస్తున్నారు. అయితే దీనిపై అధికారికంగా ఎలాంటి సమాచారం మాత్రం లేదు.

2009లో గుంతకల్లు అసెంబ్లీ నియోజకవర్గం ఏర్పడింది. 2009 అసెంబ్లీ ఎన్నికల్లో గుంతకల్లు నుంచి కాంగ్రెస్ అభ్యర్థి మధుసూదన్ గుప్తా విజయం సాధించారు. 2014 ఎన్నికల్లో టీడీపీ అభ్యర్థి జితేంద్ర గౌడ్ విజయం సాధించారు. 2019 ఎన్నికల్లో జితేంద్ర గౌడ్‌పై వైఎస్సార్‌సీపీ అభ్యర్థి వై వెంకట్రామిరెడ్డి గెలుపొందారు. అయితే ఈసారి టీడీపీ మరోసారి గుంతకల్లులో విజయం సాధించాలని భావిస్తోంది.. ప్రస్తుతం అక్కడ జితేంద్ర గౌడ్ పార్టీ బాధ్యతల్ని చూస్తున్నారు. కానీ ఎస్సై సుధాకర్ పేరు తెరపైకి రావడం ఆసక్తికరంగా మారింది.. సోషల్ మీడియాలో ప్రచారం జరుగుతోంది. దీనిపై ఎస్సై సుధాకర్ స్పందించాల్సి ఉంది.