జనసేనలో చేరిన జానీ మాస్టర్, పృధ్వీ రాజ్.. రంగంలోకి 'శ్యాంబాబు'

ఆంధ్రప్రదేశ్‌లో ఎన్నికల సందడి ఊపందుకుంది. ఇప్పటికే అధికార వైఎస్సార్ కాంగ్రెస్ పార్టీ.. ఎమ్మె్ల్యే, ఎంపీల అభ్యర్థులను ప్రకటించే పనిలో నిమగ్నమైంది. మరోవైపు.. పలు కీలక నేతల జంపింగ్ జపాంగులు కూడా జోరందుకున్నాయి. ఈ క్రమంలోనే.. వైసీపీలో టికెట్ దక్కని కొందరు కీలక నేతలు.. టీడీపీ, జనసేన వైపు చూస్తున్నారు. అదే సమయంలో.. టీడీపీలోని నాయకులు కూడా ఫ్యాన్ కిందికి చేరిపోతున్నారు. ఇలాంటి ఆసక్తికర పరిణామాల మధ్య.. సినీ ఇండస్ట్రీ నుంచి కూడా కొందరు ప్రముఖులు జనసేనలో చేరేందుకు ఆసక్తి చూపుతున్నారు. ఈ నేపథ్యంలోనే.. ప్రముఖ కొరియోగ్రాఫర్‌ జానీ మాస్టర్ జనసేనలో చేరారు. బుధవారం రోజున మంగళగిరిలోని జనసేన పార్టీ కేంద్ర కార్యాలయంలో జానీ మాస్టర్‌కు పార్టీ అధినేత పవన్ కళ్యాణ్.. కండువా కప్పి ఆహ్వానించారు.

సినిమాల్లోకి వచ్చినప్పటి నుంచే పవన్ కళ్యాణ్ అంటే ఎనలేని అభిమానం ఉన్న జానీ మాస్టర్.. డ్యాన్సర్ నుంచి స్టార్ కొరియోగ్రాఫర్‌గా ఎదిగారు. అయితే.. పవన్ కళ్యాణ్ ఫ్యాన్‌గా ఆయనను ఆదర్శంగా తీసుకునే జానీ మాస్టర్.. దానధర్మాల్లోనూ పవర్ స్టార్‌నే ఫాలో అవుతూ వార్తల్లో నిలుస్తున్నారు. కాగా.. ఇటీవల నిర్వహించిన సహాయ కార్యక్రమాల్లో అధికార పార్టీపై కొన్ని విమర్శలు చేయటం.. చర్చనీయాంశంగా మారింది. ఇటీవల జరిగిన అంగన్వాడీల సమ్మెలోనూ జానీ మాస్టర్ పాల్గొన్నారు. అంగన్వాడీలకు మద్దతుగా తన గళం విప్పారు. అంగన్వాడీల నిరసనలో ప్రాణాలు కోల్పోయిన ఓ అంగన్వాడీ కార్యకర్త కుటుంబాన్ని కలిసి ఆర్థిక సాయం సైతం అందజేశారు. దీంతో.. జానీ మాస్టర్ రాజకీయాల్లోకి వస్తున్నారని.. అది కూడా జనసేనలోనే చేరనున్నట్టు పెద్ద ఎత్తున ప్రచారం జరిగింది. ఆ ప్రచారాన్ని నిజం చేస్తూ.. ఈరోజు జనసేనాని ఆధ్వర్యంలో పార్టీలో చేరారు షేక్ జానీ మాస్టర్. అయితే.. జానీ మాస్టర్ జనసేన నుంచి నెల్లూరు జిల్లాలో ఏదో ఒకస్థానం నుంచి బరిలో దిగే అవకాశం ఉందనే వార్తలు వస్తున్నాయి.

ఇదే సమయంలో.. ప్రముఖ సినీ నటుడు పృధ్వీ రాజ్ కూడా జనసేన పార్టీలో చేరారు. పృధ్వీ రాజ్‌కు కూడా పవన్ కళ్యాణ్.. స్వయంగా కండువా కప్పి పార్టీలోకి సాదరంగా ఆహ్వానించారు. గతంలో వైస్సార్ కాంగ్రెస్ పార్టీలో చేరిన పృథ్వీ రాజ్ పలు కాంట్రవర్సీల తర్వాత.. అందులో నుంచి బయటకు వచ్చారు. వైసీపీలో ఉన్న సమయంలో.. శ్రీ వెంకటేశ్వర భక్తి ఛానెల్‌కు ఛైర్ పర్సన్‌గా వ్యవహరించారు. అదే సమయంలో తనపై పలు ఆరోపణలు రాగా.. పార్టీతో పాటు తన బాధ్యతలకు రాజీనామా చేశారు. చేరికల అనంతరం.. జనసేనానితో పృధ్వీ రాజ్ భేటీ అయ్యారు. ఎన్నికల్లో ప్రచారం గురించి ఇద్దరి మధ్య చర్చ జరిగినట్టు తెలుస్తోంది. ఎన్నికల ప్రచారంలో.. పృధ్వీ రాజ్ జనసేన తరుపున ప్రచారం నిర్వహించనున్నారు. బ్రో సినిమాలో పోషించిన శ్యాంబాబు గెటప్‌లోనే ప్రచారం నిర్వహించనున్నట్టు పృథ్వీ రాజ్ తెలిపారు. శ్రీకాకుళం నుంచి శ్రీశైలం వరకు ప్రచారం చేయనున్నట్లు పృధ్వీ రాజ్ వెల్లడించారు. వైసీపీలో ఎవరి జాతకం ఏంటీ అనేది తన దగ్గర పూర్తి వివరాలున్నాయన్నారు. లోకేశ్ దగ్గర రెడ్ డైరీ ఉన్నట్లు.. తన దగ్గర కూడా పీఆర్ డైరీ ఉందని చెప్పుకొచ్చారు.