బీజేపీతో వైసీపీకి కనిపించని పొత్తు.. జగనన్న చెప్పిన ఆ మాట ఏమైంది: వైఎస్ షర్మిల

ఆంధ్రప్రదేశ్‌లో కుమ్మక్కు రాజకీయాలు నడుస్తున్నాయన్నారు ఏపీ కాంగ్రెస్‌ పార్టీ చీఫ్‌ వైఎస్‌ షర్మిల. పాలక పక్షం, ప్రతిపక్షం బీజేపీతో ములాఖత్‌ అయ్యాయని ఆరోపించారు. విశాఖలో జరిగిన కాంగ్రెస్ పార్టీ కార్యకర్తల సమావేశంలో సీఎం జగన్, చంద్రబాబుపై ఘాటు వ్యాఖ్యలు చేశారు. బీజేపీతో వైఎస్సార్‌సీపీకి కంటికి కనిపించని పొత్తు పెట్టుకుందని.. ప్రత్యేక హోదాపై ప్రతిపక్ష నేతగా ఉన్నప్పుడు జగన్‌ గట్టిగా మాట్లాడారన్నారు. అధికారంలోకి వచ్చాక దానిపై పోరాటమే లేదని.. గంగవరం పోర్టులో రాష్ట్ర వాటాను అప్పనంగా ఇచ్చేశారని.. 30 ఏళ్ల లీజు తర్వాత గంగవరం పోర్ట్ ప్రభుత్వ పరం కావాల్సి ఉందని.. నిబంధనలను తుంగలో తొక్కి ప్రభుత్వ వాటా 10 శాతం తక్కువే అమ్మేశారన్నారు.

ఏపీలో చంద్రబాబువి కనిపించే పొత్తులు..వైఎస్సార్‌సీపీ మాత్రం కనిపించని పొత్తులని సెటైర్లు పేల్చారు. ప్రత్యేక హోదా పై జగన్ అన్న ఎంపీలు ఇస్తే తెస్తా అన్నారని.. అధికారంలో వచ్చిన వెంటనే మరిచి పోయారన్నారు. ఒక్క రోజు కూడా జగన్ అన్న ఉద్యమం చేసింది లేదని.. ఉత్తరాంధ్రను రెండు పార్టీలు మోసం చేశాయన్నారు. ఇక్కడ ఉన్న కంపెనీలను ప్రైవేట్ సంస్థలకు అప్పనంగా అప్పగిస్తున్నారని.. విశాఖ ఉక్కు కార్మాగారానికి తూట్లు పొడుస్తున్నారని ధ్వజమెత్తారు. విశాఖ ఉక్కు ప్రైవేటీకరణ చేయడం ఒక కుట్రని.. ఇందిరమ్మ హయాంలో ఏర్పడిన విశాఖ స్టీల్‌ను అమ్మే ప్రయత్నం చేస్తున్నారన్నారు.

వైఎస్సార్ హయాంలో 3 మిలియన్ టన్నుల ఉత్పత్తిని 7 మిలియన్ టన్నుల ఉత్పత్తి కి పెంచారన్నారు షర్మిల. ఇప్పుడు నష్టాల సాకుగా చూపి ప్రైవేటీకరణ చేయాలని చూస్తున్నారని.. దీంతో 30 వేల మంది కార్మికులను రోడ్డున పడేస్తున్నారన్నారు. వైఎస్సార్ హయాంలో నష్టాల్లో ఉన్న కంపెనీలను కేంద్ర ప్రభుత్వ కంపెనీలలో విలీనం చేశారన్నారు. విశాఖ కి రైల్వే జోన్ ఇచ్చారు.. ఇంకా అమలు కాలేదన్నారు. మెట్రో రైల్ ప్రాజెక్టు పత్తాక లేదని.. రాష్ట్రంలో కాంగ్రెస్,కేంద్రంలో కాంగ్రెస్ ఉన్నప్పుడు ఏది కావాలంటే అది జరిగిందన్నారు. రాష్ట్రంలో, కేంద్రంలో కాంగ్రెస్ అధికారంలో రావాలని.. బీజేపీ తొత్తులుగా ఉన్న వైఎస్సార్‌సీపీ,టీడీపీలను ఓడగొట్టాలన్నారు. బీజేపీతో ఇక్కడ పార్టీలు దోస్తీ అంశాన్ని ప్రజల్లోకి బలంగా తీసుకెళతామన్నారు. ఇటీవల ఆంధ్రప్రదేశ్ కాంగ్రెస్ పార్టీ పగ్గాలు చేపట్టిన షర్మిల దూకుడు పెంచారు. వైఎష్సార్‌సీపీతో పాటుగా టీడీపీ, బీజేపీలను కూడా టార్గెట్ చేశారు. అలాగే జిల్లాల్లో పర్యటిస్తూ కాంగ్రెస్ పార్టీ బలోపేతంపై సీరియస్‌గా ఫోకస్ పెట్టారు. అలాగే కాంగ్రెస్ పార్టీకి దూరంగా ఉంటున్న నేతల్ని కూడా తిరిగి పార్టీలోకి తీసుకొచ్చేందుకు ప్రయత్నిస్తున్నారు.. ఇటు వచ్చే ఎన్నికల్లో పోటీచేసే అభ్యర్థుల నుంచి దరఖాస్తుల్ని స్వీకరిస్తున్నారు.