ఏపీలో కాంగ్రెస్ పార్టీ తెలంగాణ తరహా స్ట్రాటజీ .. నేటి నుంచే ప్రారంభం, నిబంధనలివే

ఆంధ్రప్రదేశ్‌లో అసెంబ్లీతో పాటు పార్లమెంట్ ఎన్నికలు సమీపిస్తుండటంతో కాంగ్రెస్ పార్టీ అభ్యర్థుల వేటలో నిమగ్నమైంది. ఈ క్రమలో లోక్ సభ, అసెంబ్లీ ఎన్నికలలో పోటీ చేసే అభ్యర్థుల కోసం కాంగ్రెస్ కమిటీ దరఖాస్తులు సిద్ధం చేసింది. నేటి నుంచి దరఖాస్తుల స్వీకరిస్తున్నారు. దరఖాస్తులు స్వీకరించే సమయంలో పార్టీకి ఫండ్‌గా కొంత నగదు డిపాజిట్ చేయాలని నిబంధన పెట్టారు. లోక్ సభలో పోటీ చేసే జనరల్ అభ్యర్థికి రూ.25,000.. రిజర్వుడు లోక్ సభ స్థానానికి రూ. 15,000.. జనరల్ అసెంబ్లీ స్థానానికి రూ. 10,000 చెల్లించాలి.. రిజర్వుడు అసెంబ్లీ స్థానానికి రూ. 5,000 డిపాజిట్ చేయాల్సి ఉంటుంది.

డొనేషన్ ఫర్ దేశ్ అనే లింక్‌లో డిపాజిట్ చేయాలని కాంగ్రెస్ కమిటీ సూచించింది. అప్లికేషన్‌తో పాటు డిపాజిట్ రిసిఫ్ట్‌ను కూడా సబ్‌మిట్ చేయాలని సూచింది. ఆ ఫండ్‌ను పార్టీకి డొనేషన్ ఇచ్చినట్టుగా కమిటీ పరిగణిస్తుంది. ఏపీ కాంగ్రెస్ ఇంచార్జ్ ఠాకూర్ మొదటి దరఖాస్తును అందుకున్నారు. విజయవాడ ఆంధ్ర భవన్‌లో ఈ దరఖాస్తులను స్వీకరిస్తారని కాంగ్రెస్ పార్టీ తెలిపింది. ఆసక్తి ఉన్నవారు, ఆశావహులు తమ దరఖాస్తుల్ని అందజేయొచ్చని సూచించారు.

ఏపీ కాంగ్రెస్‌లో చేరిన వారికి కూడా అప్లికేషన్లు అందజేయనున్నారు. ఏపీ కాంగ్రెస్ సభ్యత్వమే అభ్యర్ధి మొదటి అర్హతగా చెబుతోంది కాంగ్రెస్. పూర్తి అర్హతల పరిశీలన అనంతరం అభ్యర్ధులను నిర్ణయిస్తామని ఇప్పటికే ఏపీ పీసీసీ అధ్యక్షురాలు షర్మిల తెలిపారు. ఏపీ కాంగ్రెస్ మాజీలకు పెద్దపీట వేయాలని భావిస్తున్నారు. అలాగే గతంలో పార్టీని వీడిన వారు తిరిగి కాంగ్రెస్ గూటికి చేరాలని ఏపీ పీసీసీ అధ్యక్షురాలు షర్మిల పిలుపునిచ్చింది. ఇప్పటికే మాజీలతో పాటు ఎమ్మెల్యేలు తమతో టచ్‌లో ఉన్నారని ఏపీసీసీ వర్గాలు చెబుతున్నాయి.

తెలంగాణ అసెంబ్లీ ఎన్నికల్లో కూడా కాంగ్రెస్ పార్టీ ఆశావహుల నుంచి దరఖాస్తుల్ని ఆహ్వానించింది. ఆ తర్వాత ఏఐసీసీ ఈ అప్లికేషన్లపై సమీక్ష చేసిన తర్వాత అభ్యర్థుల్ని ఫైనల్ చేశారు.. ఏపీలో కూడా ఇదే తరహా స్ట్రాటజీని ఫాలో అవుతున్నారు. అందుకే దరఖాస్తుల్ని ఆహ్వానించినట్లు కాంగ్రెస్ పార్టీ వర్గాలు చెబుతున్నాయి. మరోవైపు ఏపీసీసీ అధ్యక్షురాలు వైఎస్ షర్మిల రాష్ట్రంలో కాంగ్రెస్ పార్టీని బలోపేతం చేసేందుకు రంగంలోకి దిగారు. ఈ నెల 23 నుంచి 9 రోజుల పాటు రాష్ట్రవ్యాప్తంగా అన్ని జిల్లాల్లో పర్యటిస్తున్నారు. ఇచ్చాపురం నుంచి ఇడుపులపాయ వరకు ఈ పర్యటన కొనసాగుతుంది. ఈ పర్యటనలో భాగంగా ఆమె జిల్లాల వారీగా సమన్వయ సమావేశాలు ఏర్పాటు చేస్తారు. ప్రతిరోజు రెండు జిల్లాల్లో కోఆర్డినేషన్ సమావేశాలు నిర్వహిస్తున్నారు. అభ్యర్థుల ఎంపికపై కసరత్తు, ఆశావహుల దరఖాస్తుల స్వీకరణ, జిల్లాలలో పార్టీ పరిస్థితితో పాటు నూతన చేరికలు వంటి అంశాలపై ఆమె ప్రత్యేక దృష్టి సారించారు.