నాడు బాబాయ్‌ని.. నేడు నా సోదరి షర్మిలను: కాంగ్రెస్‌పై వైఎస్ జగన్ ఘాటు వ్యాఖ్యలు

తన సోదరి షర్మిల రెడ్డి కాంగ్రెస్‌లో చేరిక, పీసీసీ అధ్యక్షురాలిగా నియమించడం పట్ల ముఖ్యమంత్రి వైఎస్ జగన్మోహన్ రెడ్డి తొలిసారి స్పందించారు. కాంగ్రెస్ పార్టీ గతంలో చేసిన తప్పులే మళ్లీ చేస్తోందని, తన కుటుంబాన్ని విడగొట్టే పనులు మొదటి నుంచి చేస్తూనే ఉందని సంచలన వ్యాఖ్యలు చేశారు. అప్పుడు మా అమ్మపై పోటీకి మా బాబాయినే నిలబెట్టిన ఘనత కాంగ్రెస్‌దని ఆరోపించారు. అప్పుడు దేవుడే వాళ్లకి సరైన బుద్ది చెప్పాడని, ఇప్పుడు కూడా అదే జరుగుతోందని జగన్ దుయ్యబట్టారు. తిరుపతిలో జరిగిన ఇండియా టుడే ఎడ్యుకేషన్‌ సమ్మిట్‌లో జగన్‌ ఈ వ్యాఖ్యలు చేశారు.

కాంగ్రెస్‌ చెత్త రాజకీయాలు చేస్తోందని మండిపడ్డారు. కుటుంబాన్ని చీల్చి రాజకీయాలు చేస్తున్నారని, మా బాబాయ్‌ని నాపై పోటీకి దింపారని జగన్ దుయబట్టారు. గతంలో రాష్ట్రాన్ని విభజించి అన్యాయం చేశారని ఆరోపించారు. ఇదే సమయంలో తాము తిరిగి అధికారంలోకి రావడం ఖాయమని సీఎం పునరుద్ఘాటించారు. నావల్ల మేలు జరిగిందని భావిస్తేనే ఓటు వేయమని ధైర్యంగా అడుగుతున్నాని ఆయన అన్నారు. తప్పనిసరిగా మేం తిరిగి అధికారంలోకి వస్తామని ధీమా వ్యక్తం చేశారు. విద్య, వైద్యం, పరిపాలనా రంగాల్లో పెను మార్పులు తీసుకు వచ్చామని చెప్పారు.

వివక్ష లేకుండా అవినీతిరహితంగా, పారదర్శకంగా అర్హత ఉన్న వారికి అన్నీ అందించామన్నారు. మేనిఫెస్టోలోని 99.5 శాతం హామీలను నెరవేర్చామని తెలిపారు. మా ప్రభుత్వానికున్న విశ్వసనీయతకు నిదర్శనమని, కాంగ్రెస్‌ ఎప్పుడూ కూడా డర్టీ గేమ్‌ ఆడుతోందన్నారు. విభజించి రాష్ట్రాన్ని పాలించాలనుకున్నారని సీఎం జగన్ ఆగ్రహం వ్యక్తం చేశారు. రాష్ట్రాన్ని అన్యాయంగా విభజించారని, అలాగే మా కుటుంబాన్ని కూడా విడదీశారని మండిపడ్డారు. ‘నేను కాంగ్రెస్‌ నుంచి విడిపోయినప్పుడు గతంలో మా చిన్నాన్నకు మంత్రి పదవి ఇచ్చి మాపై పోటీకి పెట్టారు.. వారు పాఠాలు నేర్వేలేదు..వారి పార్టీ సారథ్య బాధ్యతలు మా సోదరికి ఇచ్చారు... కానw అధికారం అనేది దేవుడు ఇచ్చేది.. దేవుడ్ని నేను బలంగా నమ్మతాను.. ఆయనే అన్నీ చూస్తాడు’ అని అన్నారు.

ప్రతిపక్షాలు ఏవీ కూడా పథకాలు గురించి మాట్లాడవని, వాటి అమలు గురించీ మాట్లాడలేవని విరుచుకుపడ్డారు. గతంలోనూ ఇదే బడ్జెట్‌ ఉందని,..ఇప్పుడూ ఉంది కాని అప్పుడు డీబీటీ ఎందుకు జరగలేదు అని ప్రశ్నించారు. మార్పు ఏంటంటే.. కేవలం ముఖ్యమంత్రి మాత్రమే మారారని తెలిపారు. చంద్రబాబునాయుడు విషయంలో ప్రతీకారం అన్నది లేనేలేదని, సీఐడీని దుర్వినియోగం ఆరోపణలు అర్థరహితమని కొట్టిపారేశారు. చంద్రబాబుపై ఆరోపణలు, ఆధారాలు పరిశీలించాకే కోర్టులు నిర్ణయం తీసుకున్నాయని స్పష్టం చేశారు. పేదరికాన్ని నిర్మూలించాలంటే .. అది నాణ్యమైన చదువు ద్వారానే సాధ్యమని నేను నమ్ముతానని, విద్య మాత్రమే కాదు, నాణ్యమైన విద్య అనే ప్రతి ఒక్కరి హక్కుకావాలని సీఎం ఆకాంక్షించారు.