తైవాన్ వ్యక్తికి పద్మ భూషణ్ పురస్కారం.. అసలు ఎవరీ యాంగ్ లీ.. ఎందుకు ఇచ్చారంటే

75వ రిపబ్లిక్ డే సందర్భంగా పద్మ పురస్కారాలకు ఎంపికైన వారి పేర్లను కేంద్రం ప్రకటించింది. వివిధ రంగాల్లో విశేషంగా సేవలు అందించిన మొత్తం 132 మందిని ఈ సంవత్సరం పద్మ అవార్డులకు ఎంపిక చేసింది. ఇందులో ఐదుగురికి పద్మ విభూషణ్, 17 మందికి పద్మ భూషణ్, మరో 110 మందికి పద్మ శ్రీ అవార్డులు వరించాయి. అయితే వీరిలో తైవాన్‌కు చెందిన యాంగ్ లీకి పద్మ భూషణ్ పురస్కారం వరించింది. అయితే వివిధ రంగాల్లో ఉత్తమ సేవలు అందించిన వారికి ఇచ్చే పద్మ పురస్కారాలను యాంగ్ లీకి ఇవ్వడంపై చర్చ జరుగుతోంది. ఇంతకీ ఆయన ఎవరంటే ఫాక్స్‌కాన్ సంస్థ సీఈఓ.

66 ఏళ్ల ఫాక్స్‌కాన్ చీఫ్ ఎగ్జిక్యూటివ్ ఆఫీసర్ అయిన తైవాన్‌కు చెందిన యాంగ్ లీ.. 40 ఏళ్ల కాలంలో 3 కంపెనీలను స్థాపించారు. వ్యాపార వాణిజ్యం విభాగంలో యాంగ్‌ లీకి పద్మ భూషణ్‌ అవార్డును ఇవ్వనున్నట్లు కేంద్ర ప్రభుత్వం ప్రకటించింది. ప్రస్తుతం భారత్‌లో సెమీ కండక్టర్ ప్రణాళికల కోసం ఫాక్స్‌కాన్ సంస్థ సహకారం అందిస్తుంది. కరోనా మహమ్మారి వెలుగు చూసిన తర్వాత చైనా నుంచి తమ పెట్టుబడుల్ని ఫాక్స్‌‌కాన్ భారత్‌లో విస్తృతంగా పెట్టింది.

ఇప్పటికే తెలంగాణ, కర్ణాటకల్లో ఫాక్స్‌కాన్ సంస్థ తమ ప్లాంట్లను ఏర్పాటు చేసింది. ఇక తమిళనాడులో అయితే ఏకంగా ఐఫోన్ తయారీ యూనిట్‌ను ఏర్పాటు చేసింది. ప్రపంచంలోనే అతిపెద్ద సంస్థ అయిన ఐఫోన్ల తయారీ సంస్థ యాపిల్‌కు అతిపెద్ద సరఫరాదారుగా ఫాక్స్‌కాన్ సంస్థ కొనసాగుతుంది. 1978 లో తైవాన్ నేషనల్ చియావో తుంగ్ యూనివర్సిటీ నుంచి ఎలక్ట్రోఫిజిక్స్‌లో బీఎస్ డిగ్రీని పూర్తి చేసిన యాంగ్ లీ..1986లో యూనివర్సిటీ ఆఫ్ సదరన్ కాలిఫోర్నియా నుంచి కంప్యూటర్ ఇంజినీరింగ్‌లో ఎంఎస్ డిగ్రీ కంప్లీట్ చేశారు.

ఇక 75 వ రిపబ్లిక్ డేను పురస్కరించుకుని భారత ప్రభుత్వం 132 మందికి పద్మ అవార్డులను గురువారం ప్రకటించింది. పలు రంగాల్లో ఉత్తమ సేవలు అందించిన మొత్తం 132 మందికి పద్మ భూషణ్, పద్మ విభూషణ్, పద్మ శ్రీ పురస్కారాలను ప్రకటించింది. భారత మాజీ ఉపరాష్ట్రపతి వెంకయ్యనాయుడు, మెగాస్టార్ చిరంజీవి సహా మొత్తం ఐదుగురికి పద్మ విభూషణ్ అవార్డులు వరించాయి. ఇంకో 17 మందికి పద్మ భూషణ్, మరో 110 మంది పద్మ పురస్కారాలు దక్కించుకున్నారు. ఇక వ్యాపార పరిశ్రమ రంగంలో నలుగురు పద్మ పురస్కారాలు దక్కించుకోగా.. అందులో తైవాన్‌కు చెందిన యాంగ్ లీ, కర్ణాటకకు చెందిన సీతారామ్ జిందాల్‌లకు పద్మ భూషణ్.. మహారాష్ట్రకు చెందిన కల్పనా మోర్పారియా, కర్ణాటకకు చెందిన శశి సోనీలను పద్మశ్రీ అవార్డులు వరించాయి.